ສສຊ ຮັບຮອງຮ່າງປະມວນກົດໝາຍແພ່ງ


...

07.12.2018 9:30     

   ບັນດາສະມາຊິກສະພາແຫ່ງຊາດ (ສສຊ) ໄດ້ພ້ອມກັນປະກອບຄຳຄິດເຫັນໃສ່ຮ່າງປະມວນກົດໝາຍແພ່ງ ເພື່ອເຮັດໃຫ້ເນື້ອໃນຮັດກຸມຂຶ້ນ ແລະ ແທດເໝາະກັບສະພາບການພັດທະນາເສດຖະກິດສັງຄົມ.
ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ໃນວັນທີ 6 ທັນວານີ້ ພາຍໃຕ້ການເປັນປະທານຂອງ ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ, ມີບັນດາ ສສຊ ໄດ້ປະກອບຄຳຄິດເຫັນໃສ່ຮ່າງປະມວນກົດໝາຍແພ່ງ ທີ່ສະເໜີໂດຍ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ. ທ່ານ ໄຊສີ ສັນຕິວົງ ໄດ້ກ່າວວ່າ: ຮ່າງປະມວນກົດໝາຍແພ່ງມີຄວາມສຳຄັນ ແລະ ຈຳເປັນຢ່າງພາວະວິໄສທີ່ ສປປ ລາວຕ້ອງໄດ້ກຳນົດຂຶ້ນເປັນບ່ອນອີງໃນການດັດປັບການປະພຶດຂອງຄົນໃນສັງຄົມໃຫ້ໄປຕາມແນວທາງນະໂຍບາຍຂອງພັກທີ່ວາງອອກໃນແຕ່ລະໄລຍະ ເພື່ອແນໃສ່ຮັບປະກັນຄວາມສະຫງົບປອດໄພ, ປົກປ້ອງສິດຜົນປະໂຫຍດອັນຊອບທຳຂອງພົນລະເມືອງ ທັງເປັນການສ້າງເງື່ອນໄຂໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດ ຊຶ່ງປະມວນກົດໝາຍດັ່ງກ່າວຈະສາມາດຊ່ວຍໃຫ້ແກ້ໄຂບັນຫາ ຫຼື ຂໍ້ຂັດແຍ່ງທີ່ເກີດຂຶ້ນໃນສັງຄົມ ແລະ ຈັດຕັ້ງປະຕິບັດກົດໝາຍກໍ່ຈະດີຂຶຶ້ນກວ່າເກົ່າ ເພາະຈະຊ່ວຍແກ້ໄຂຊ່ອງວ່າງ ແລະ ຂໍ້ຂັດກັນຂອງກົດໝາຍຕ່າງໆ ຫຼື ແກ້ໄຂຄວາມຈະແຈ້ງຊັດເຈນ ທັງເຮັດໃຫ້ການນຳໃຊ້ກົດໝາຍເປັນເອກະພາບກັນ ພ້ອມກັນນັ້ນ ປະມວນກົດໝາຍແພ່ງຍັງກຳນົດຫຼັກການໃໝ່ທີ່ຍັງບໍ່ທັນມີ ໃຫ້ສາມາດດັດປັບ ແລະ ຕອບສະໜອງໄດ້ກັບຄວາມຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມໃນປັດຈຸບັນ ແລະ ຕໍ່ໜ້າ ສິ່ງສຳຄັນຍັງສາມາດຈຳແນກໃຫ້ຮູ້ໄດ້ວ່າ ເປັນຄະດີແພ່ງ ແລະ ອາຍາ ນອກຈາກນັ້ນປະມວນກົດໝາຍແພ່ງ ແລະ ອາຍາປະກອບສ່ວນເປັນກົດໝາຍໃນການເຊື່ອມໂຍງກັບສາກົນໃນຂົງເຂດຍຸຕິທຳຂອງ ສປປ ລາວ, ສຳລັບໂຄງປະກອບຂອງຮ່າງປະມວນກົດໝາຍ ມີ 9 ພາກ 51 ໝວດ 630 ມາດຕາ.
ຫຼັງຈາກນັ້ນ ບັນດາ ສສຊ ໄດ້ສຸມໃສ່ປະກອບຄຳເຫັນຢ່າງກົງໄປ ກົງມາດ້ວຍຄວາມສ້າງສັນໃສ່ຮ່າງປະມວນກົດໝາຍດັ່ງກ່າວ ຊຶ່ງມີຫຼາຍບັນຫາສະເໜີໃຫ້ອະນຸກຳມະການກ່ຽວຂ້ອງປັບປຸງເນື້ອໃນໃຫ້ຄົບຖ້ວນ ແລະ ສົມບູນຂຶ້ນ ກ່ອນຈະລົງຄະແນນຮັບຮອງເອົາດ້ວຍສຽງສ່ວນຫຼາຍ.
(ຂ່າວ-ພາບ: ແສງຈັນ)