ລັດຖະມົນຕີ ກະຊວງ ພາຍໃນ ຕ້ອນຮັບຄະນະຜູ້ແທນ ສສ ຫວຽດນາມ


...

07.12.2018 9:30     

   ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນ ສສ ຫວຽດນາມ ຊຶ່ງນຳໂດຍ ທ່ານ ດັງ ແທ່ງ ຕຸງ ຫົວໜ້າກົມເອກະສານ ແລະ ສຳເນົາແຫ່ງລັດ ກະຊວງພາຍໃນ ສສ ຫວຽດນາມ ໃນວັນທີ 5 ທັນວານີ້ ທີ່ກະຊວງດັ່ງກ່າວ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໃນໂອກາດນີ້ ທ່ານ ຄຳໝັ້ນ ສູນວິເລີດ ກໍ່ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຊົມເຊີຍຕໍ່ ທ່ານ ດັງ ແທ່ງ ຕຸງ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຊຶ່ງຈະເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ສປປ ລາວ-ສສ ຫວຽດນາມ ໃຫ້ຂະຫຍາຍຕົວຍິ່ງຂຶ້ນ ພ້ອມທັງສະແດງຄວາມຂອບໃຈຢ່າງສູງ ຕໍ່ທຸກການຊ່ວຍເຫຼືອ ແລະ ການສະໜັບສະໜູນຂອງລັດຖະບານ ສສ ຫວຽດນາມ.
ພ້ອມດຽວກັນນີ້ ທ່ານ ດັງ ແທ່ງ ຕຸງ ກໍ່ໄດ້ສະແດງຄວາມຂອບໃຈເປັນຢ່າງສູງຕໍ່ທ່ານ ລັດຖະມົນຕີກະຊວງພາຍໃນ ທີ່ໄດ້ໃຫ້ການຕ້ອນຮັບອັນອົບອຸ່ນ.
(ຂ່າວ-ພາບ: ບຸນຕອມ)