ລັດຖະບານລາວ ມອບໃບຍ້ອງຍໍໃຫ້ ບໍລິສັດເອເຊຍພັດທະນາ-ກໍ່ສ້າງ


...

07.12.2018 9:30     

   ທ່ານ ຄໍາເຈນ ວົງໂພສີ ເຈົ້າແຂວງຜົ້ງສາລີ ຕາງໜ້າໃຫ້ລັດຖະບານມອບໃບຍ້ອງຍໍໃຫ້ ບໍລິສັດ ເອເຊຍລົງທຶນພັດທະນາ-ກໍ່ສ້າງ ຈໍາກັດຜູ້ດຽວ ທີ່ມີຜົນງານ ແລະ ຄຸນງາມຄວາມດີ ໃນການປະກອບສ່ວນທຶນຮອນເຂົ້າໃນການພັດທະນາແຂວງຜົ້ງສາລີ ໃນປີ 2018 ລວມມູນຄ່າ 150 ລ້ານກີບ.
   ພິທີຍ້ອງຍໍຄັ້ງນີ້ ໄດ້ຈັດຂຶ້ນໃນວັນທີ 4 ທັນວາຜ່ານມານີ້ ທີ່ ສໍານັກງານ ບໍລິສັດດັ່ງກ່າວ ບ້ານໂພນສີນວນ ເມືອງສີສັດຕະນາກ ນະຄອນຫຼວງວຽງຈັນ ຮັບໂດຍ ທ່ານ ພຶດສະພາ ພູມມະສັກ ປະທານບໍລິສັດ ເອເຊຍລົງທຶນພັດທະນາ-ກໍ່ສ້າງ ຈໍາກັດຜູ້ດຽວ ມີບັນດາພາກສ່ວນກ່ຽວຂ້ອງ ແລະ ວິຊາການຂອງບໍລິສັດເຂົ້າຮ່ວມ.
   ໂອກາດດັ່ງກ່າວ ທ່ານ ພຶດສະພາ ພູມມະສັກ ໄດ້ກ່າວສະແດງຄວາມຂອບໃຈຕໍ່ພັກ-ລັດຖະບານ ກໍ່ຄື ການນໍາແຂວງຜົ້ງສາລີ ທີ່ໄດ້ໃຫ້ຄວາມໄວ້ເນື້ອເຊື່ອໃຈຕໍ່ບໍລິສັດຂອງພວກຂ້າພະເຈົ້າໃນການພັດທະນາແຂວງຜົ້ງສາລີ ແລະ ພ້ອມທີ່ຈະສືບຕໍ່ພັດທະນາພື້ນຖານໂຄງລ່າງເພື່ອສະໜອງໄຟຟ້າ, ນໍ້າປະປາ ໃຫ້ປະຊາຊົນສາມາດນໍາໃຊ້ໄດ້ເປັນປົກກະຕິ, ສືບຕໍ່ພັດທະນາເສັ້ນທາງຄົມມະນາຄົມຈາກທາງດິນແດງ ໃຫ້ມາເປັນທາງປູຢາງ ແລະ ຈາກເສັ້ນທາງປູຢາງຈໍານວນໜຶ່ງ ມາເປັນເສັ້ນ ທາງປູດ້ວຍເບຕົງ. ນອກນັ້ນຍັງຈະສືບຕໍ່ໃຫ້ການຊ່ວຍເຫຼືອແຂວງຜົ້ງສາລີໃນຮູບແບບທາງກົງ ແລະ ທາງອ້ອມ ບໍ່ວ່າຈະເປັນທາງດ້ານທຶນຮອນ ວັດຖຸຕ່າງໆ ເພື່ອພັດທະນາເມືອງບຸນເໜືອ ເປັນເມືອງທີ່ໜ້າຢູ່ ແລະ ໜ້າທ່ຽວຊົມ. ນອກຈາກໄດ້ຮັບໃບຍ້ອງຍໍຈາກລັດຖະບານແລ້ວ ທ່ານເຈົ້າແຂວງຜົ້ງສາລີ ໄດ້ມອບໃບຍ້ອງຍໍຂັ້ນແຂວງ ໃຫ້ກັບບໍລິສັດ ທີ່ໄດ້ໃຫ້ການອຸປະຖໍາເງິນສົດເຂົ້າໃນການຈັດງານສະເຫຼີມສະຫຼອງປີທ່ອງທ່ຽວລາວ 2018 ທີ່ແຂວງຜົ້ງສາລີ.
(ຂ່າວ: ບໍລິສັດ ເອເຊຍລົງທຶນພັດທະນາ-ກໍ່ສ້າງ)