ທ່ານ ທອງລຸນ ສີສຸລິດ ຕ້ອນຮັບຄະນະຜູ້ແທນ ກອງປະຊຸມໂຕະມົນ


...

10.12.2018 9:57     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຄະນະຜູ້ແທນຂອງຄູ່ຮ່ວມພັດທະນາທີ່ເຂົ້າຮ່ວມກອງປະຊຸມໂຕະມົນ ປະຈຳປີ 2018, ຊຶ່ງນຳໂດຍທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານນາງ ຄາລີນາ ອິມໂມເນັນ ຜູ້ປະສານງານອົງການສະຫະປະຊາຊາດ ທັງເປັນຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ ໃນວັນທີ 7 ທັນວານີ້ ທີ່ສຳນັກງານນາຍົກລັດຖະມົນຕີ, ເພື່ອ ລາຍງານຜົນກອງປະຊຸມໂຕະມົນ ປະຈຳປີ 2018. ໃນໂອກາດດັ່ງກ່າວ ທ່ານ ທອງລຸນ ສີສຸລິດ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍໍ່ຄະນະຜູ້ແທນດັ່ງກ່າວ ທີ່ໄດ້ເດີນທາງມາຢ້ຽມຢາມ ແລະເຮັດວຽກຢູ່ ສປປ ລາວ ໃນຄັ້ງນີ້, ຊຶ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍການພົວພັນຮ່ວມມືທີ່ມີຢູ່ແລ້ວໃຫ້ຂະຫຍາຍຕົວຍິ່ງຂຶ້ນ. ໃນການພົບປະຄັ້ງນີ້ທ່ານ ນາງ ຄາລີນາ ອິມໂມເນັນ ໄດ້ຕາງໜ້າບັນດາຄະນະຜູ້ ແທນ ສະແດງຄວາມຂອບໃຈ ແລະ ຮູ້ສຶກເປັນກຽດທີ່ໄດ້ເຂົ້າຮ່ວມກອງປະຊຸມໃນຄັ້ງນີ້ ພ້ອມນັ້ນ ກໍໄດ້ສະຫຼຸບລາຍງານໂດຍຫຍໍ້ເຖິງຜົນສຳເລັດຂອງກອງປະຊຸມດັ່ງນີ້: ກອງປະຊຸມໂຕະມົນ ປະຈຳປີ 2018 ຄັ້ງນີ້ ໄດ້ຈັດຂຶ້ນທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ເປັນເວລາ 2 ມື້ ຄື: ວັນທີ 4 ທັນວາ 2018 ແມ່ນກອງປະຊຸມສົນທະນາລະດັບວິຊາການ ແລະ ການໄປຢ້ຽມຢາມໂຄງການພັດທະນາພາກສະໜາມ 2 ແຫ່ງ ຄື: 1) ໂຄງການກໍ່ສ້າງທາງລົດໄຟລາວ-ຈີນ ບ້ານນາຄູນນ້ອຍ ເມືອງນາຊາຍທອງ ນະຄອນຫຼວງວຽງຈັນ, 2) ກຸ່ມປູກພືດຜັກກະສິກຳອິນຊີ ອໍແກນິກຟາມ ທີ່ບ້ານທ່າຊ້າງ ເມືອງປາກງື່ມ ນະຄອນຫຼວງວຽງຈັນ ແລະ ວັນທີ 5 ທັນວາ 2018 ແມ່ນກອງປະຊຸມປຶກສາຫາລືລະດັບນະໂຍບາຍ ຊຶ່ງສາມາດສັງລວມປະເດັນສຳຄັນຂອງກອງປະຊຸມໄດ້ດັ່ງນີ້: ເພື່ອບັນລຸໄດ້ໝາກຜົນຕາມທີ່ໄດ້ກຳນົດໄວ້ໃຫ້ສຳເລັດ ຕາມແຜນ ພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ຢ່າງແທ້ຈິງນັ້ນ ແມ່ນຮຽກຮ້ອງໃຫ້ມີການເພີ່ມທະວີຄວາມເປັນເຈົ້າການຂອງລັດຖະບານໃນການປະຕິບັດໜ້າທີ່ວຽກງານໃຫ້ມີຄວາມວ່ອງໄວ, ມີຄວາມທັນສະໄໝ ແລະ ມີປະສິດທິຜົນຫຼາຍຂຶ້ນກວ່າເກົ່າ ລວມທັງການສະໜັບສະໜູນທາງດ້ານການເງິນ ແລະ ທາງດ້ານເຕັກນິກວິຊາການ ຈາກບັນດາຄູ່ຮ່ວມພັດທະນາເຂົ້າໃນແຜນພັດທະນາ ຂອງແຕ່ລະຂະແໜງການ ແລະ ທ້ອງຖິ່ນ ສະນັ້ນ ໃນການຂັບເຄື່ອນ ການພັດທະນາ ຂອງ ສປປ ລາວ ທັງໃນປັດຈຸບັນ ກໍ່ຄືໃນຕໍ່ໜ້າ ໃຫ້ມີສະຖຽນລະພາບ, ຍືນຍົງ ແລະ ຄວາມໝັ້ນຄົງທາງດ້ານເສດຖະກິດ ຕາມຍຸດທະສາດຂອງລັດຖະບານກໍຄືຂອງສາກົນ ນັ້ນ ຄະນະຜູ້ແທນຂອງຄູ່ຮ່ວມພັດທະນາໄດ້ໃຫ້ຄຳໝັ້ນສັນຍາ ຈະຄຽງບ່າ ຄຽງໄຫຼ່ ກັບລັດຖະບານ ໃນການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນການບັນລຸຕາມຈຸດປະສົງ ທີ່ໄດ້ປຶກສາຫາລືກັນຂອງ 4 ຫົວຂໍ້: 1).ດ້ານເສດຖະກິດ; 2).ການພັດທະນາຊັບພະຍາກອນມະນຸດ ແລະ ສັງຄົມ; 3).ການ ນຳໃຊ້ຊັບພະຍາກອນທຳມະຊາດ ແລະ ປົກປັກຮັກສາສິ່ງ ແວດລ້ອມ ການກຽມຄວາມພ້ອມໃນການຮັບມືກັບໄພພິບັດທາງທຳມະຊາດ ແລະ ການປ່ຽນແປງດິນຟ້າອາກາດທີ່ຈະເກີດຂຶ້ນ; 4). ວຽກຈຸດສຸມປິ່ນອ້ອມທີ່ຕິດພັນກັບຫຼາຍຂະແໜງການ. (ຂ່າວ-ພາບ: ບຸນຕອມ)