​ສານອວຍພອນ ຂອງປະທານສູນກາງແນວລາວສ້າງຊາດ


...

10.12.2018 9:58     

   (ເນື່ອງໃນໂອກາດວັນບຸນປະເພນີປີໃໝ່ 2019 ຂອງບັນດາຊົນເຜົ່າ) ພີ່ນ້ອງປະຊາຊົນລາວບັນດາຊົນເຜົ່າ ໃນທົ່ວປະເທດທີ່ນັບຖື ແລະ ຮັກແພງ ! ເນື່ອງໃນໂອກາດງານບຸນປີໃໝ່ຂອງພີ່ນ້ອງບັນດາຊົນເຜົ່າ ໄດ້ວຽນມາບັນຈົບຄົບຮອບອີກວາລະໜຶ່ງ, ຊຶ່ງພີ່ນ້ອງບັນດາຊົນເຜົ່າ ເຄີຍຈັດຕັ້ງປະຕິບັດກັນມາເປັນເວລາດົນນານ, ໃນໄລຍະເວລາດຽວກັນນີ້ ພີ່ນ້ອງປະຊາຊົນລາວບັນດາຊົນເຜົ່າທົ່ວປະເທດ ກໍ່ພວມເບີກບານມ່ວນຊື່ນນຳຜົນສຳເລັດຂອງການສ້າງສາ ແລະ ພັດທະນາຄອບຄົວ ໃນ 1 ປີຜ່ານມາ ແລະ ການ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກຢ່າງເປັນຂະບວນການຟົດຟື້ນໃນທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວເຮົາ ແນໃສ່ນຳເອົາປະ ເທດຊາດອອກຈາກສະພາບຄວາມດ້ອຍພັດທະນາ. ຂ້າພະເຈົ້າ ຕາງໜ້າພັກລັດ ແລະ ສູນກາງແນວລາວສ້າງຊາດ ຂໍຖືໂອ ກາດອັນເປັນສີລິມຸງຄຸນນີ້ ສະແດງຄວາມປິຕິຍິນດີ ແລະ ຝາກຄຳຢື້ຢາມຖາມຂ່າວ ອັນສະໜິດສະໜົມ ແລະ ຄວາມສາມັກຄີມາຍັງພີ່ນ້ອງປະຊາຊົນລາວບັນດາຊົນເຜົ່າໃນທົ່ວປະເທດ, ພີ່ ນ້ອງຄົນລາວທີ່ດຳລົງຊີວິດ ແລະ ທຳມາຫາກິນຢູ່ຕ່າງປະເທດ ແລະ ຊາວຕ່າງດ້າວທີ່ດຳລົງຊີວິດຢູ່ສາທາລະນະລັດ ປະຊາ ທິປະໄຕ ປະຊາຊົນລາວ ມານະທີ່ນີ້ ຢ່າງສຸດອົກສຸດໃຈ. ດັ່ງພວກເຮົາຮູ້ນຳກັນແລ້ວວ່າ ປະເທດລາວປະກອບດ້ວຍຫຼາຍຊົນເຜົ່າທີ່ດຳລົງຊີວິດຢູ່ຮ່ວມກັນ ແຕ່ເໜືອຮອດໃຕ້, ພວກເຮົາມີມູນເຊື້ອສາມັກຄີປອງດອງຊ່ວຍເຫຼືອຊຶ່ງກັນ ແລະ ກັນ, ມີພື້ນຖານດ້ານເສດຖະກິດສັງຄົມຮ່ວມກັນ, ມີວັດທະນະທຳລາວ ຊຶ່ງແມ່ນວັດທະນະທຳລວມຂອງບັນດາຊົນເຜົ່າ, ມີພາສາລາວເປັນພາສາກາງ ແລະ ມີຕົວໜັງສືລາວເປັນຕົວໜັງສືທາງການຄຽງຄູ່ກັບການຮັກສາເອກະລັກຂອງບັນດາຊົນເຜົ່າ ເປັນຕົ້ນແມ່ນ ພາສາປາກເວົ້າ, ວັດທະນະທຳການດຳລົງຊີວິດ ແລະ ຂະນົບທຳນຽມຮີດຄອງປະເພນີອັນດີງາມ, ຄວາມເຊື່ອຖື ແລະ ອື່ນໆ ຊຶ່ງເຄີຍມີມານັບເປັນເວລາເຫິງນານ. ພັກ, ລັດ ແລະ ແນວລາວສ້າງຊາດ ຍາມໃດກໍຖືສຳຄັນ ແລະ ໃຫ້ຄວາມເຄົາລົບນັບຖືພີ່ນ້ອງບັນດາຊົນເຜົ່າທີ່ໄດ້ປະກອບສ່ວນອັນສຳຄັນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງນະໂຍບາຍຂອງພັກລັດ ເຮັດໃຫ້ປະຊາຊົນເຮົາເຕີບໃຫຍ່ຂະຫຍາຍຕົວ, ການພັດທະນາເສດຖະກິດສັງຄົມ ມີຜົນສຳເລັດໃໝ່ໃຫຍ່ຫຼວງ ແລະ ຕໍ່ເນື່ອງ. ລະດັບຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງພີ່ນ້ອງປະຊາຊົນລາວບັນດາຊົນເຜົ່າໄດ້ຮັບການຍົກສູງຂຶ້ນໝາຍຄວາມວ່າ ຄວາມທຸກຍາກແມ່ນໄດ້ຮັບການແກ້ໄຂຊຶ່ງເຮັດໃຫ້ຄວາມທຸກຍາກນັບມື້ນັບຫຼຸດໜ້ອຍຖອຍລົງ ແລະ ເຮັດໃຫ້ຄວາມຫຼຸດໂຕນກັນໃນດ້ານຕ່າງໆ ຂອງພີ່ນ້ອງປະຊາຊົນລາວບັນດາຊົນເຜົ່າໄດ້ຫຍັບມໍ່ເຂົ້າຫາກັນເທື່ອລະກ້າວ. ພີ່ນ້ອງປະຊາຊົນລາວບັນດາຊົນເຜົ່າທີ່ນັບຖື ແລະ ຮັກແພງ ! ຕາງໜ້າໃຫ້ພັກລັດ, ແນວລາວສ້າງຊາດທຸກຂັ້ນ ຂໍຮຽກຮ້ອງມາຍັງພີ່ນ້ອງປະ ຊາຊົນລາວບັນດາຊົນເຜົ່າ ຈົ່ງເຊີດຊູນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ, ເສີມຂະຫຍາຍສິດເປັນເຈົ້າຂອງປະເທດຊາດ, ເພີ່ມທະວີຄວາມເປັນເຈົ້າຕົນເອງ, ລຶບລ້າງແນວຄິດຄັບແຄບ, ຕີຕົວຕ່ຳ ຫຼື ຕີຕົວສູງ, ໝິ່ນປະໝາດຊົນເຜົ່າອື່ນ, ຕ້ານທຸກແນວຄິດ ແລະ ການກະທຳ ທີ່ເປັນການແບ່ງແຍກຄວາມສາມັກຄີ ແລະ ຄວາມສະເໝີພາບລະຫວ່າງຊົນເຜົ່າ; ພ້ອມກັນຍົກສູງສະຕິລະວັງຕົວ ຕໍ່ກົນອຸບາຍທີ່ຫວັງມ້າງເພທຳລາຍປະເທດເຮົາຂອງພວກອິດທິກຳລັງປໍລະປັກ ແລະ ພວກຄົນທີ່ບໍ່ຫວັງດີ. ເປັນເຈົ້າການປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງປະເທດຊາດບ້ານເມືອງ, ຈົ່ງອອກແຮງບຸກທະລຸໃນການແກ້ໄຂສິ່ງທີ່ຫຍໍ້ທໍ້ກົດໜ່ວງຕໍ່ການພັດທະນາ, ຕັ້ງໜ້າປະຕິບັດ 2 ໜ້າທີ່ຍຸດທະສາດ ແລະ ແນວທາງປ່ຽນແປງ ໃໝ່ ໃຫ້ສຳເລັດຜົນໂດຍສະເພາະແມ່ນສຸມໃສ່ຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ. ປະຕິບັດນະໂຍບາຍເຕົ້າໂຮມບ້ານນ້ອຍໃຫ້ກາຍ ເປັນບ້ານໃຫຍ່ສ້າງບ້ານໃຫຍ່ໃຫ້ກາຍ ເປັນຕົວເມືອງນ້ອຍຢູ່ຊົນນະບົດ ໂດຍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາໃຫ້ມີຄວາມຟົດຟື້ນກວ້າງຂວາງ, ໄດ້ຮັບຜົນດີ ແລະ ມີຊີວິດຊີວາ. ເອົາໃຈໃສ່ປົກປັກຮັກສາ ແລະ ເສີມຂະຫຍາຍເອກະລັກວັດທະນະທໍາ, ຮີດຄອງປະເພນີອັນດີງາມຂອງຊາດ ແລະ ຂອງບັນດາຊົນເຜົ່າ, ພັດທະນາເສດຖະກິດສັງຄົມ ຕາມທິດມີຄຸນນະພາບສີຂຽວ ແລະ ຍືນຍົງ ເປັນຕົ້ນແມ່ນປົກປັກຮັກສາສິ່ງແວດລ້ອມ ແລະ ການແກ້ໄຂຄວາມທຸກຍາກໃນສະເພາະໜ້າ ຈົ່ງຕັ້ງໜ້າສ້າງຄອບຄົວ ແລະ ເຕົ້າໂຮມຄວາມສາມັກຄີຢ່າງໜັກແໜ້ນເຂັ້ມແຂງ. ພ້ອມກັນນັ້ນ ມີຫຼາຍບ້ານໄດ້ເຮັດສຳເລັດ ແຜນການກາຍເປັນບ້ານທີ່ໄດ້ຮັບການປະກາດ ຫຼື ພວມສູ້ຊົນປະຕິບັດແຜນການສ້າງບ້ານວັດທະນະທຳ, ບ້ານແບບຢ່າງດ້ານສາທາລະນະສຸກ, ບ້ານປອດຄະດີ, ບ້ານປອດຢາເສບຕິດ, ບ້ານປ້ອມໝັ້ນສູ້ຮົບທີ່ມີຄວາມເຂັ້ມແຂງ, ບ້ານສາມັກຄີປອງດອງ ແລະ ບ້ານພັດທະນາ ຊຶ່ງເປັນການປະກອບສ່ວນໃຫ້ແກ່ປີທ່ອງທ່ຽວລາວ 2018 ແລະ ໄລຍະຕໍ່ໄປ ຂ່ຳນັບຊົມເຊີຍ ກອງປະຊຸມພົບປະຜູ້ຊົງຄຸນວຸດທິຊົນເຜົ່າທົ່ວປະເທດ ປີ 2018, ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ແລະ ວັນສຳ ຄັນອື່ນໆ ປີ 2019. ຂໍຮຽກຮ້ອງມາຍັງພີ່ນ້ອງຮ່ວມຊາດທຸກຊົນເຜົ່າ ຈົ່ງເອົາໃຈໃສ່ຕໍ່ການຈັດບຸນຂອງຊົນເຜົ່າຕົນເອງໃຫ້ຖືກຕ້ອງຕາມກາລະເທສະ, ຖືກຕ້ອງຕາມຮີດຄອງປະເພນີ ແລະ ມີການປະຢັດມັດທະຍັດ ເພື່ອໃຫ້ມີການສະສົມແກ່ການພັດທະນາໃນດ້ານຕ່າງໆໃນອະນາຄົດ. ພີ່ນ້ອງປະຊາຊົນລາວບັນດາຊົນເຜົ່າ ທີ່ນັບຖື ແລະ ຮັກແພງທັງຫຼາຍ ! ເນື່ອງໃນໂອກາດອັນເປັນເລີກງາມຍາມດີ ແລະ ມີຄວາມໝາຍສຳຄັນຕາມປະເພນີຂອງປະຊາຊົນລາວບັນດາຊົນເຜົ່າພວກເຮົາໃນປີນີ້, ຂ້າພະເຈົ້າຕາງໜ້າໃຫ້ແກ່ອົງການຈັດຕັ້ງພັກ, ລັດ, ສູນກາງແນວລາວສ້າງຊາດ ໃນນາມສ່ວນຕົວຂໍອວຍພອນໄຊອັນປະເສີດໃຫ້ພີ່ນ້ອງປະຊາຊົນລາວ ບັນດາຊົນເຜົ່າ, ວິລະຊົນແຫ່ງຊາດ, ນັກຮົບແຂ່ງຂັນ, ຄອບຄົວພະນັກງານ, ສະມາຊິກພັກ, ທະຫານ, ຕຳຫຼວດ, ຜູ້ຊົງຄຸນວຸດທິຂອງບັນດາຊົນເຜົ່າກໍຄືຜູ້ຊົງຄຸນວຸດທິໃນສາຂາອາຊີບຕ່າງໆໃນທົ່ວປະເທດ ແລະ ພີ່ນ້ອງຊາວລາວທີ່ຢູ່ຕ່າງປະເທດ ຈົ່ງມີສຸຂະພາບເຂັ້ມແຂງ, ມີອາຍຸໝັ້ນຍືນ ເປັນຫຼັກແຫຼ່ງແຫ່ງການເຕົ້າໂຮມຄວາມສາມັກຄີປອງດອງປະຊາຊົນລາວບັນດາຊົນເຜົ່າ ໃຫ້ເປັນປຶກແຜ່ນແໜ້ນໜາ ເພື່ອພ້ອມກັນປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມກ້າວໜ້າຈະເລີນຮຸ່ງ ເຮືອງສີວິໄລ ຕາມແນວທາງນະໂຍບາຍຂອງພັກລັດ ແລະ ຄວາມມຸ່ງຫວັງຂອງພວກເຮົາ. ຂໍອວຍພອນໃຫ້ບຸນປີໃໝ່ທີ່ເປັນປະເພນີຂອງບັນດາຊົນເຜົ່າ ຈົ່ງເປັນບຸນແຫ່ງຄວາມເບີກບານມ່ວນຊື່ນ ແລະ ມີຄວາມສຸກສົມຫວັງສຳລັບທຸກໆຄົນ ທີ່ເປັນເດັກນ້ອຍ, ຊາຍໜຸ່ມຍິງສາວ ຕະຫຼອດຮອດເຖົ້າແກ່ອາວຸໂສ ຂໍໃຫ້ເປັນບຸນແຫ່ງຄວາມຄິດເຖິງ, ຄວາມເປັນຫ່ວງເປັນໃຍຕໍ່ອະນາຄົດ, ຄວາມວັດທະນາຖາວອນ ແລະ ຄວາມຮັກໄຄ່ໄມຕີຂອງພີ່ນ້ອງປະຊາຊົນລາວບັນດາຊົນເຜົ່າໃນທົ່ວປະເທດ, ເປັນບຸນປະເພນີແຫ່ງປີທີ່ມີການສ້າງທ່ວງທ່າໃໝ່, ປັດໄຈໃໝ່ ເພື່ອຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າຕ່າງໆໃຫ້ດີຂຶ້ນເປັນກ້າວໆ ພ້ອມກັນຫຼຸດພົ້ນອອກຈາກຄວາມທຸກຍາກ ແລະ ຄວາມດ້ອຍພັດທະນາ. ໂດຍສະເພາະແມ່ນປະຊາຊົນລາວບັນດາຊົນເຜົ່າທີ່ຢູ່ເຂດພູດອຍທຸລະກັນດານຫ່າງໄກສອກຫຼີກ ໃຫ້ກ້າວຂຶ້ນສ້າງແບບແຜນດຳລົງຊີວິດໃໝ່ທີ່ສົດໃສ, ປົກປັກຮັກສາ ແລະ ສ້າງຂະບວນການຕ່າງໆຂໍ່ານັບຮັບຕ້ອນວັນບຸນສຳຄັນຂອງຊາດດ້ວຍຄວາມຫ້າວຫັນ ແລະ ມີຄວາມເບີກບານມ່ວນຊື່ນ. ຂໍອວຍພອນໃຫ້ພີ່ນ້ອງປະຊາຊົນລາວບັນດາຊົນເຜົ່າທີ່ດຳລົງຊີວິດ ແລະ ປະກອບອາຊີບທໍາ ມາຫາກິນຢູ່ຕ່າງປະເທດ ຈົ່ງມີສຸຂະພາບເຂັ້ມແຂງ, ມີຄວາມສຸກກາຍສະບາຍໃຈ, ຂໍໃຫ້ພີ່ນ້ອງຈົ່ງນຶກສະເໝີວ່າ: ປະຊາຊົນລາວບັນດາຊົນເຜົ່າ, ພັກລັດ ແລະ ປະເທດຊາດຂອງພວກເຮົາຍາມໃດກໍມີຄວາມຍິນດີຕ້ອນຮັບທຸກທ່ານທີ່ມີຄວາມຈິງໃຈ, ມີຄວາມບໍລິສຸດໃຈຢາກຫັນໜ້າມາປະກອບສ່ວນຕາມຄວາມສາມາດຂອງຕົນ ເພື່ອພ້ອມກັນສ້າງສາພັດທະນາມາຕຸພູມອັນແສນຮັກແຫ່ງນີ້ໃຫ້ຈະເລີນ ກ້າວໜ້າ ແລະ ຄົງຢູ່ຊົ່ວກາລະນານ. (ຂ່າວ: ສນຊ)