ສະຫຼຸບການຈັດຕັ້ງປະຕິບັດວຽກງານແຜນການ-ການເງິນ ປະຈຳປີ


...

...

09.01.2019 9:37     

   ກະຊວງແຜນການ ແລະ ການລົງທຶນໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານແຜນການ-ການເງິນປະຈຳປີ 2018 ແລະ ທິດທາງປີ 2019 ຂຶ້ນໃນວັນທີ 8 ມັງກອນ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີບັນດາຮອງລັດຖະມົນຕີກະຊວງແຜນການ ແລະ ການລົງທຶນ, ຮອງລັດຖະມົນຕີກະຊວງການເງິນ, ພ້ອມດ້ວຍບັນດາພະນັກງານ-ລັດຖະກອນທົ່ວຂະແໜງແຜນການ ແລະ ການລົງທຶນກັບຂະແໜງການເງິນເຂົ້າຮ່ວມ. ໃນກອງປະຊຸມ, ທ່ານ ສົມດີ ດວງດີ ໄດ້ກ່າວບາງຕອນສຳຄັນວ່າ : ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປີ 2018 ແມ່ນເປັນໄລຍະບາດລ້ຽວອັນສຳຄັນເພາະເປັນປີທີສາມຂອງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ການປະເມີນຜົນການຈັດຕັ້ງປະຕິບັດກາງສະໄໝ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII (2016-2020) ນອກຈາກນີ້ ປີ 2018 ພວກເຮົາກໍໄດ້ຮັບຜົນກະທົບຢ່າງຮ້າຍແຮງຈາກໄພທຳມະຊາດ-ນໍ້າຖ້ວມຢ່າງໜັກໜ່ວງໃນທົ່ວປະເທດ. ເສດຖະກິດມະຫາພາກເຖິງຈະມີຈຸດບອບບາງແຕ່ກໍ່ໄດ້ຮັບການປັບປຸງຢູ່ໃນຈັງຫວະທີ່ດີຂຶ້ນ ແລະ ໂດຍລວມເສດ ຖະກິດມະຫາພາກຍັງມີຄວາມໝັ້ນທ່ຽງ ແລະ ສະຖຽນລະພາບ, ລວມຍອດຜະລິດຕະພັນ ພາຍໃນ (GDP) ປີ 2018 ເພີ່ມ ຂຶ້ນ 6,5% ຕໍ່ປີ, GDP ສະ ເລ່ຍຕໍ່ຫົວຄົນບັນລຸ 2.599 ໂດລາ ສູງກວ່າຄາດໝາຍທີ່ີວາງໄວ້ເລັກນ້ອຍ (ມະຕິສະພາ 2.536 ໂດລາ) ລວມຍອດລາຍໄດ້ແຫ່ງຊາດ (GNI) ຕໍ່ຫົວຄົນບັນລຸ 2.209 ໂດລາບັນລຸໄດ້ເກີນແຜນ, ອັດຕາເງິນເຟີ້ຢູ່ໃນລະດັບຕາໍ່ ແລະ ອັດຕາແລກປ່ຽນເໜັງຕີງໃນລະດັບທີ່ຄຸ້ມຄອງໄດ້, ການລົງທຶນຂອງລັດທຽບໃສ່ແຜນ 2018 ເຫັນວ່າມີຈຳນວນຫຼຸດລົງເລັກນ້ອຍເນື່ອງຈາກງົບປະມານພາຍໃນມີຈຳກັດ ແລະ ເງິນຊ່ວຍເຫຼືອຈາກຕ່າງປະເທດກໍມີທ່າອ່ຽງຫຼຸດລົງ. ສຳລັບດ້ານແຜນງົບປະ ມານແຫ່ງລັດ ເຫັນວ່າຍັງມີຄວາມຫຍຸ້ງຍາກສົມຄວນ ຊຶ່ງຜ່ານມາການສະ ຫຼຸບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2018 ທີ່ຜ່ານມາສາມາດປະຕິບັດລາຍຮັບ ງົບປະມານທັງໝົດ 95,45% ຂອງແຜນການປີ ຊຶ່ງອີງຕາມໂຕເລກດັ່ງກ່າວ ງົບປະມານປີ 2018 ຂາດດຸນທັງໝົດ 7.567 ຕື້ກີບ ຫຼື ປະມານ 4,96% ຂອງ GDP ແຜນຂາດດຸນທີ່ສະພາຮັບຮອງມີຈຳນວນ 7.357 ຕື້ກວ່າກີບ ຫຼື ເທົ່າກັບ 4,92% ຂອງ GDP. ທ່ານໄດ້ໃຫ້ຮູ້ຕື່ມອີກວ່າ: ສຳລັບແຜນພັດທະນາເສດຖະກິດ-ສັງຄົມແຫ່ງຊາດ ປີ 2019 ຈະຕ້ອງສູ້ຊົນປະຕິບັດຕາມມະ ຕິຂອງສະພາແຫ່ງຊາດ ໂດຍສະເພາະລວມຍອດຜະລິດຕະ ພັນພາຍໃນ (GDP) ໃຫ້ຂະ ຫຍາຍຕົວ 6,7% ຂຶ້ນໄປ ແລະ ເສດຖະກິດມະຫາພາກມີສະ ຖຽນລະພາບ ໂດຍພື້ນຖານ, ສືບ ຕໍ່ຟື້ນຟູ ແລະ ປັບປຸງພື້ນຖານໂຄງລ່າງທີ່ໄດ້ຮັບຜົນເສຍຫາຍຈາກໄພທຳມະຊາດໃຫ້ເຂົ້າສູ່ ສະພາບປົກກະຕິ, ສຸມໃສ່ພັດ ທະນາຊົນນະບົດ ແລະ ລຶບລ້າງຄວາມທຸກຍາກ, ພັດທະນາຊັບພະຍາກອນມະນຸດ ໂດຍເອົາໃຈໃສ່ຂະແໜງການສຶກສາ ແລະ ສາທາລະນະສຸກ ພ້ອມກັນນັ້ນກໍຖືສຳຄັນການພັດທະ ນາ ແລະ ຍົກສູງສີມືແຮງງານ. ໃນໂອກາດເຂົ້າຮ່ວມກອງປະ ຊຸມຄັ້ງນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ໃຫ້ກຽດ ໂອ້ລົມ ໂດຍທ່ານໄດ້ເນັ້ນໜັກ ບາງບັນຫາສຳຄັນດັັ່ງນີ້: 1. ຜັນຂະຫຍາຍມະຕິກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ແລະ ດຳລັດ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດປະຈຳປີ 2019 ໃຫ້ເປັນຮູບປະທຳ. 2. ເພື່ອເຮັດໃຫ້ເສດຖະກິດສືບຕໍ່ຂະຫຍາຍຕົວຕາມຄາດ ໝາຍທີ່ວາງໄວ້ 6,7% ຂຶ້ນໄປ, ທຸກຂະແໜງການ ແລະ ທ້ອງ ຖິ່ນຕ້ອງປະສານສົມທົບກັນໃນການສືບຕໍ່ຈັດຕັ້ງປະຕິບັດ 8 ມາດຕະການຊຸກຍູ້ເສດຖະ ກິດໃຫ້ມີຄວາມຄືບໜ້າຢ່າງເປັນຮູບປະທຳ ແລະ ລາຍງານ ຄວາມຄືບໜ້າໃຫ້ລັດຖະ ບານ ໃນແຕ່ລະໄລຍະ. 3. ເລັ່ງປະ ຕິຮູບວຽກງານຢ່າງຮອບດ້ານ ແລະ ແຂງແຮງຕາມຍຸດທະສາດທີ່ລັດຖະບານໄດ້ຮັບຮອງໃຫ້ມີຄວາມຄືບໜ້າໄວ ແລະ ຮັບປະ ກັນການເກັບລາຍຮັບໃຫ້ໄດ້ຕາມແຜນ ແລະ ລື່ນແຜນໄດ້ຍິ່ງເປັນການດີ. 4. ປະຕິຮູບລະ ບົບການລົງທຶນຂອງລັດໃຫ້ມີການຫັນປ່ຽນ, ເຄັ່ງຄັດຕາມລະບຽບກົດໝາຍໃຫ້ລົງທຶນມີຈຸດສຸມ, ມີປະສິດທິຜົນ ແລະ ສອດຄ່ອງຕາມງົບປະມານບໍ່ໃຫ້ ມີໜີ້ສິນສະສົມເພີ່ມຂຶ້ນ. 5. ສິ່ງ ທີ່ສຳຄັນຕັດສິນແມ່ນຈະຕ້ອງ ໄດ້ເອົາໃຈໃສ່ສຶກສາອົບຮົມ ການເມືອງ-ແນວຄິດໃຫ້ພະນັກ ງານຢູ່ຂົງເຂດແຜນການ-ການລົງທຶນ ແລະ ຂົງເຂດການ ເງິນ. 6. ສືບຕໍ່ປັບປຸງລັດວິສາ ຫະກິດ. 7. ສືບຕໍ່ຍູ້ແຮງ ການ ລົງທຶນເອກະຊົນພາຍ ໃນ ແລະ ຕ່າງປະເທດໃຫ້ເປັນກຳລັງ ຕົ້ນ ຕໍໃນການຊຸກຍູ້ການ ເຕີບໂຕຂອງເສດຖະກິດໂດຍສະ ເພາະຕ້ອງປະສານງານຢ່າງໜັກແໜ້ນລະຫວ່າງບັນດາຂະ ແໜງການ ເພື່ອປັບປຸງບັນດາລະບຽບການ ແລະ ກົນໄກຕ່າງໆທີ່ຕິດພັນກັບ 10 ຕົວຊີ້ວັດຄວາມສະດວກ ໃນການດຳເນີນທຸລະກິດ. 8. ພັດທະນາເຂດເສດຖະກິດພິເສດໃຫ້ກາຍເປັນທ່າແຮງໜຶ່ງທີ່ສຳຄັນໃນການດຶງດູດການລົງທຶນຂອງເອກະຊົນ. 9. ການປະເມີນຜົນໂຄງການລົງທຶນຂອງລັດຕ້ອງປະຕິບັດຢ່າງເຂັ້ມງວດຖືກຕ້ອງຕາມຫຼັກວິຊາການ ແລະ ສອດຄ່ອງກັບກົດໝາຍ ແລະ ລະບຽບການທີ່ກ່ຽວຂ້ອງ. 10. ວຽກງານຂົນຂວາຍດຶງດູດການຊ່ວຍເຫຼືອທາງການ ເພື່ອການພັດທະນາທັງໃນກອບຫຼາຍຝ່າຍ ແລະ ສອງຝ່າຍຈະຕ້ອງມີລັກສະນະເປັນເຈົ້າການ ແລະ ສ່ອງແສງຄວາມຕ້ອງການດ້ານການພັດ ທະນາຂອງປະເທດໃຫ້ຫຼາຍຂຶ້ນ. 11. ເພີ່ມທະວີການເປັນເຈົ້າການໃນວຽກງານການຮ່ວມມືສອງຝ່າຍລາວ-ຫວຽດນາມ ແລະ ລາວ-ຈີນ. 12. ປັບປຸງລະບົບຂໍ້ມູນສະຖິຕິໃຫ້ມີຄຸນນະພາບສູງຂຶ້ນ ແລະ ສາມາດເຂົ້າເຖິງໄດ້ຢ່າງສະດວກ ໂດຍຜັນຂະຫຍາຍກົດໝາຍ ແລະ ຍຸດທະສາດທີ່ໄດ້ຮັບຮອງແລ້ວ. 13. ເຄັ່ງຄັດປະຕິບັດມາດຕະ ການປະຢັດໃນທົ່ວຂົງເຂດບໍ ລິຫານລັດ ເພື່ອເປັນແບບຢ່າງໃຫ້ແກ່ສັງຄົມ. 14. ກຳນົດການ ແບ່ງງານ ແລະ ຄວາມຮັບ ຜິດຊອບລະຫວ່າງກະຊວງ ແລະ ທ້ອງຖິ່ນໃນການຈັດຕັ້ງປະຕິບັດວຽກງານຕາມທິດ 3 ສ້າງ ແລະ ກະກຽມສະຫຼຸບທ້າຍສະໄໝຂອງແຜນການ 5 ປີ ຄັ້ງທີ VIII (2016-2020) ພ້ອມນີ້ກໍໃຫ້ຄົ້ນຄວ້າ ແລະ ກະກຽມສ້າງແຜນ 5 ປີ ຄັ້ງທີ IX (2021-2025) ເພື່ອເປັນພື້ນຖານທາງດ້ານເນື້ອໃນໃຫ້ແກ່ບົດລາຍງານການເມືອງຕໍ່ກອງປະຊຸມໃຫຍ່ຂອງພັກ ຄັ້ງທີ XI. (ຂ່າວ-ພາບ : ສຸກສາຄອນ)