4 ແຂວງສໍາເລັດເຊື່ອມຊຶມມະຕິ 7ສະໄໜທີ Xຂອງຄະນະບໍລິຫານງານສູນກາງພັກ


...

...

09.01.2019 13:58     

   ແຂວງ ຫຼວງພະບາງ, ໄຊລະບູລີ, ຊຽງຂວາງ ແລະ ຫົວພັນ ໄດ້ສໍາເລັດການເຊື່ອມຊຶມມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 7 ສະໄໜທີ X ພາຍຫຼັງດໍາເນີນມາເປັນເວລາ 2 ວັນ ( ວັນທີ 7-8 ມັງກອນ 2019 ) ທີ່ສະໂມສອນກອງບັນຊາການທະຫານ ນະຄອນ-ຫຼວງພະບາງ ພາຍໃຕ້ການເປັນປະທານຂອງ ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີບັນດາເລຂາພັກແຂວງ ເຈົ້າແຂວງ-ບັນດາຮອງເລຂາພັກແຂວງ ຮອງເຈົ້າແຂວງ, ຄະນະບໍລິຫານງານພັກແຂວງ ແລະ ພະນັກງານຂັ້ນສູນກາງຄຸ້ມຄອງ ຈາກ 4 ແຂວງ ເຂົ້າຮ່ວມ ຈໍານວນ 124 ສະຫາຍ.
   ໃນວາລະກອງປະຊຸມຜູ້ເຂົ້າຮ່ວມໄດ້ເຊື່ອມຊຶມມະຕິ ຂອງຄະນະບໍລິຫານງານສູນກາງພັກ ສະບັບເລກທີ 057/ຄບສພ ລົງວັນທີ 19 ທັນວາ 2018 ວ່າດ້ວຍການເພີ່ມທະວີການນໍາພາແກ້ໄຂຄວາມທຸກຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ ແລະ ມະຕິ ຂອງຄະນະບໍລິການງານສູນກາງພັກສະໄໜທີ X ສະບັບເລກທີ 056/ຄບສພ ລົງວັນທີ 19 ທັນວາ 2018 ວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ ແລະ ໜັກແໜ້ນ.ພ້ອມດຽວກັນນັ້ນ, ສະຫາຍ ບຸນທອງ ຈິດມະນີ ກໍໄດ້ເນັ້ນໜັກໃຫ້ເຂັ້ມງວດຕໍ່ການຈັດຕັ້ງປະຕິບັດ ຄໍາສັ່ງ ຂອງນາຍົກລັດຖະມົນຕີ ສະບັບເລກທີ 12/ນຍ, ລົງວັນທີ 23 ສິງຫາ 2018 ວ່າດ້ວຍການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ, ພ້ອມທັງມີຄໍາຖາມເຈາະຈິ້ມນໍາບັນດາຜູ້ແທນກອງປະຊຸມເປັນຕົ້ນແມ່ນ: ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນທີ່ເປັນໄພອັນຕະລາຍຕໍ່ບົດບາດ-ຄວາມສາມາດນໍາພາຂອງພັກຢູ່ທ້ອງຖິ່ນ, ສາເຫດທີ່ພາໃຫ້ເກີດໄພອັນຕະລາຍດັ່ງກ່າວ; ສາເຫດຂອງຄວາມບໍ່ເດັດຂາດ, ເຂັ້ມງວດຂອງການປະຕິບັດນິຕິກໍາຕ່າງໆເພື່ອແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ; ຄວາມຮັບຜິດຊອບຂອງຄະນະພັກຕໍ່ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ມີຄືແນວໃດ, ບັນຫາທີ່ທົ່ວອົງຄະນະພັກທ້ອງຖິ່ນຄວນເອົາໃຈໃສ່ຕົ້ນຕໍແມ່ນຫຍັງ. ນອກຈາກນີິ້, ກໍໄດ້ຖາມເຈາະຈິ້ມກ່ຽວກັບການປັບປຸງຮາກຖານການເມືອງ ເປັນຕົ້ນແມ່ນ: ຄວາມສະດວກ, ຂໍ້ຫຍຸ້ງຍາກໃນການປັບປຸງຮາກຖານການເມືອງ, ບັນດາອົງການຈັດຕັ້ງມະຫາຊົນ, ອົງການ ແລະ ລັດວິສາຫະກິດ ມີຄືແນວໃດ,ການຢາກຍົກສູງຄວາມສາມາດນໍາພາຂອງໜ່ວຍພັກບ້ານ ແລະ ປັບປຸງອົງການຈັດຕັ້ງມະຫາຊົນ ແລະ 5 ໜ່ວຍງານຂອງບ້ານໃຫ້ເຂັ້ມແຂງຕ້ອງເອົາໃຈໃສ່ບັນຫາໃດ.ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນຢ່າງເປັນຂະບວນຟົດຟື້ນໃສ່ບັນຫາທີ່ຄົງຄ້າງທີ່ຕ້ອງຮີບຮ້ອນແກ້ໄຂ ແລະ ທິດທາງການແກ້ໄຂໃນຕໍ່ໜ້າ ໂດຍອີງໃສ່ ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 7 ສະໄໜທີ X ເປັນພື້ນຖານໃນການປະກອບຄຳເຫັນເຂົ້າໃສ່ຂົງເຂດເສດຖະກິດ-ການເງິນ, ມາດຕະການການຄຸ້ມຄອງໜີ້ສິນພາກລັດຂອງພາກສ່ວນກ່ຽວຂ້ອງ, ການຊໍາລະໜີ້ສາທາລະນະ, ມາດຕະການຊຸກຍູ້ສົ່ງເສີມເສດຖະກິດຕ່າງໆ, ການແກ້ໄຂການຮົ່ວໄຫຼຂອງງົບປະມານ, ມາດຕະການປະຢັດການໃຊ້ຈ່າຍບໍລິຫານ, ຍົກລະດັບການຄຸ້ມຄອງແຫຼ່ງລາຍຮັບງົບປະມານ, ການຄຸ້ມຄອງເງິນຕາຢ່າງເປັນລະບົບ, ການປັບປຸງລັດວິສາຫະກິດໃຫ້ມີປະສິດທິຜົນກວ່າເກົ່າ, ການປັບປຸງຮາກຖານການເມືອງໃນຕໍ່ໜ້າ ແລະ ອື່ນໆ. (ຂ່າວ: ວາລະສານ ກວດກາ)