ກວດກາສູນກາງພັກເຊື່ອມຊຶມເອກະສານສຳຄັນຂອງພັກ


...

...

11.01.2019 9:02     

   ຄະນະກວດກາສູນກາງພັກ-ອົງການກວດກາລັດຖະບານ ໄດ້ເປີດກອງປະຊຸມເຊື່ອມຊຶມເນື້ອໃນມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ທີ່ສະໂມສອນຂອງຄະນະກວດກາສູນກາງພັກ ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ປະທານອົງການກວດກາລັດຖະບານ ທັງເປັນຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີບັນດາຄະນະປະຈໍາພັກ, ຄະນະພັກ, ຫົວໜ້າກົມ-ຮອງຫົວໜ້າກົມ ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ. ທ່ານ ບຸນທອງ ຈິດມະນີ ກ່າວວ່າ: ກອງປະຊຸມຄັ້ງນີ້, ເພື່ອເຮັດໃຫ້ພະນັກງານ-ຄຸ້ມຄອງ, ພະນັກງານສະມາຊິກພັກ, ລັດຖະກອນ ໄດ້ຮັບຮູ້, ເຂົ້າໃຈແຈ້ງ ກ່ຽວກັບສະພາບຄວາມຫຍຸ້ງ ຍາກທາງດ້ານເສດຖະກິດ-ການເງິນຂອງປະເທດ ໃນໄລ ຍະທີ່ຜ່ານມາ ແລະ ຜົນສະ ທ້ອນໃນສະເພາະໜ້າ ແລະ ຍາວນານ; ກໍາແໜ້ນ ແລະ ເຊື່ອມຊຶມເປັນເອກະພາບຢ່າງສູງກັບທັດສະນະ, ທິດທາງ, ວິທີການ ແລະ ມາດຕະການ ທີ່ສູນກາງພັກວາງອອກ,ສ້າງຄວາມຕັດສິນໃຈແກ້ໄຂດ້ານເສດຖະກິດ-ການເງິນໃນຕໍ່ໜ້າ; ຄົ້ນຄວ້າກໍານົດບັນດາມາດຕະການແທດຕົວຈິງ ແລະ ມີປະສິດທິຜົນສູງ ເພື່ອແກ້ໄຂສະພາບດັ່ງກ່າວ, ສ້າງຂະບວນການຈັດຕັ້ງປະ ຕິບັດຢ່າງແຂງແຮງ, ທົ່ວເຖິງ ກໍໃຫ້ເກີດມີການຫັນປ່ຽນຕົວຈິງ ທີ່ມີລັກສະນະບຸກທະລຸໃນທຸກຂົງເຂດວຽກງານ ເພື່ອຍູ້ແຮງການພັດທະນາດ້ານຕ່າງໆ ໃຫ້ບັນລຸຄາດໝາຍທີ່ກອງປະຊຸມໃຫຍ່ຄັ້ງທີ X ຂອງພັກວາງອອກ. ນອກຈາກນີ້, ບັນດາຜູ້ເຂົ້າຮ່ວມຍັງໄດ້ຮັບຟັງ ມະຕິຂອງຄະນະບໍລິຫານງານສູນກາງພັກ ສະບັບເລກທີ 057/ຄບສພ ລົງວັນທີ 19 ທັນວາ 2018 ວ່າດ້ວຍການເພີ່ມທະວີການນໍາພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ ແລະ ມະຕິຂອງຄະນະບໍລິຫານງານສູນກາງພັກສະໄໝທີ X ສະບັບເລກທີ 056/ຄບສພ ລົງວັນທີ 19 ທັນວາ2018 ວ່າດ້ວຍການປັບປຸງຮາກຖານການ ເມືອງ ຂອງລະບອບປະຊາທິ ປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ. ໃນໂອກາດດັ່ງກ່າວ ທ່ານຍັງໄດ້ເນັ້ນໜັກ ໃຫ້ເຂັ້ມງວດຕໍ່ການຈັດຕັ້ງປະຕິບັດຄໍາສັ່ງຂອງທ່ານນາຍົກ ລັດຖະມົນຕີ ສະບັບເລກທີ 12/ນຍ ລົງວັນທີ 23 ສິງຫາ 2018 ວ່າດ້ວຍການຈັດຕັ້ງປະຕິບັດ 8 ມາດຕະການ ຊຸກຍູ້ເສດຖະກິດ ພ້ອມທັງມີຄໍາຖາມເຈາະຈີ້ມຕໍ່ທີ່ປະຊຸມ ເປັນຕົ້ນ: ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ເປັນໄພອັນຕະລາຍ ຕໍ່ບົດບາດຄວາມສາມາດນໍາພາຂອງພັກຢູ່ແຕ່ລະຂັ້ນ, ສາເຫດທີ່ພາໃຫ້ເກີດໄພອັນຕະລາຍດັ່ງກ່າວ, ຍ້ອນຄວາມບໍ່ເດັດຂາດ,ເຂັ້ມງວດຂອງການປະຕິບັດນິຕິກໍາຕ່າງໆ; ກອງປະຊຸມ ຍັງໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນຢ່າງກົງໄປກົງມາ ຕໍ່ບັນຫາທີ່ຄົງຄ້າງທີ່ຕ້ອງຮີບຮ້ອນແກ້ໄຂ ແລະ ທິດທາງການແກ້ໄຂໃນຕໍ່ໜ້າ ໂດຍອີງໃສ່ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ເປັນພື້ນຖານ ໃນການປະກອບຄໍາເຫັນໃສ່ຂົງເຂດເສດຖະກິດ-ການເງິນ, ມາດຕະການຄຸ້ມຄອງໜີ້ສິນພາກລັດຂອງພາກສ່ວນກ່ຽວຂ້ອງ, ການຊໍາລະໜີ້ສິນສາທາລະນະ, ມາດຕະການຊຸກຍູ້ສົ່ງເສີມເສດຖະກິດຕ່າງໆ, ການແກ້ໄຂການຮົ່ວໄຫຼຂອງງົບປະມານ, ມາດຕະການປະຢັດການໃຊ້ຈ່າຍບໍລິຫານ, ຍົກລະດັບການຄຸ້ມຄອງແຫຼ່ງລາຍຮັບງົບປະມານ, ການຄຸ້ມຄອງເງິນຕາຢ່າງເປັນລະບົບ, ການປັບປຸງວິສາຫະກິດໃຫ້ມີປະສິດທິຜົນກວ່າເກົ່າ, ການປັບປຸງຮາກຖານການເມືອງໃນຕໍ່ໜ້າ ແລະ ການປັບປຸງຮາກຖານການເມືອງຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະໜັກແໜ້ນ. ( ຂ່າວ: ແສງຈັນ)