ຄະນະຜູ້ແທນຂັ້ນສູງ ທຫລ ເຄື່ອນໄຫວຢ້ຽມຢາມ ສສ ຫວຽດນາມ


...

11.01.2019 9:07     

   ຄະນະຜູ້ແທນຂັ້ນສູງຂອງທະນາຄານແຫ່ງ ສປປ ລາວ ຊຶ່ງນຳໂດຍທ່ານ ສອນໄຊ ສິດພະໄຊ ກຳມະການສຳຮອງສູນກາງພັກ ຜູ້ວ່າການທະນາຄານແຫ່ງ ສປປ ລາວ ພ້ອມຄະນະ ໄດ້ເດີນທາງຢ້ຽມຢາມ ແລະ ເຮັດວຽກຮ່ວມກັບການນຳຂັ້ນສູງຂອງທະນາຄານແຫ່ງລັດ ສສ ຫວຽດນາມ ທີ່ນະຄອນຫຼວງ ຮ່າໂນ້ຍ ລະຫວ່າງ ວັນທີ 7 ຫາວັນທີ 10 ມັງກອນ 2019 ແລະ ໃນໂອກາດດັ່ງກ່າວ, ຄະນະຜູ້ແທນຂັ້ນສູງຂອງທະນາຄານແຫ່ງ ສປປ ລາວ ໄດ້ເຂົ້າຢ້ຽມຂາໍ່ນັບທ່ານ ຫງວຽນ ຊວັນຟຸກ ກຳມະການກົມການເມືອງສູນກາງພັກກອມມູນິດຫວຽດນາມ ນາຍົກລັດຖະມົນຕີແຫ່ງ ສສ ຫວຽດນາມ ທີ່ສໍານັກງານນາຍົກ ລັດຖະມົນຕີແຫ່ງ ສສ ຫວຽດ ນາມ ໃນວັນທີ 9 ມັງກອນ ຜ່ານມາ. ທ່ານ ສອນໄຊ ສິດພະໄຊ ໄດ້ກ່າວສະແດງຄວາມເຄົາລົບນັບຖືຢ່າງສູງມາຍັງທ່ານນາຍົກ ລັດຖະມົນຕີແຫ່ງ ສສ ຫວຽດ ນາມ ແລະ ພ້ອມທັງໄດ້ລາຍງານຜົນຂອງກອງປະຊຸມພົບປະ ແລະ ແລກປ່ຽນບົດຮຽນລະ ຫວ່າງທະນາຄານແຫ່ງ ສປປ ລາວ ແລະ ທະນາຄານແຫ່ງ ລັດ ສສ ຫວຽດນາມ ຊຶ່ງໄດ້ຮັບຜົນສຳເລັດອັນຈົບງາມ ແລະ ຂະນະດຽວກັນຍັງໄດ້ຖືເອົາ ສສ ຫວຽດນາມ ເປັນປະເທດທຳອິດໃນການເຄື່ອນໄຫວ ແລະ ເຮັດວຽກຂອງຕົນພາຍຫຼັງທີ່ໄດ້ມີການຮັບຮອງເປັນຜູ້ວ່າການທະນາຄານແຫ່ງ ສປປ ລາວຈາກກອງປະຊຸມສະ ໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ໃນທ້າຍປີ 2018 ຜ່ານມານີ້. ໃນໂອກາດດັ່ງກ່າວ; ທ່ານ ຫງວຽນ ຊວັນຟຸກ ໄດ້ສະແດງຄວາມຍິນດີຕ້ອນຮັບຄະນະຜູ້ແທນຂັ້ນສູງຂອງທະນາຄານແຫ່ງ ສປປ ລາວ ແລະ ຍັງໄດ້ອ່ວຍພອນໃຫ້ທ່ານ ສອນໄຊ ສິດພະໄຊ ຈົ່ງປະສົບຜົນສໍາເລັດໃນໜ້າທີ່ການງານໃໝ່, ປະກອບສ່ວນເຂົ້າໃນການພົວ ພັນ ແລະ ຮ່ວມມືລະຫວ່າງທະ ນາຄານກາງຂອງ 2 ປະເທດໃຫ້ກ້າວສູ່ລວງເລິກຍິ່ງໆຂຶ້ນ. (ຂ່າວ: ຣັດສະໝີ ດວງສັດຈະ)