ສານ​ສະ​ແດງ​ຄວາມ​ເຫັນ​ໃຈ


04.02.2019 9:35     

   ສະຫາຍ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ແລະ ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງສານສະແດງຄວາມເຫັນໃຈ ເຖິງ ສະຫາຍ ມີເກັນ ດີເອັດສ ກາແນນ ແບຣມູເດັດສ ປະທານສະພາ ແຫ່ງ ລັດ ແລະ ສະພາລັດຖະມົນຕີ ແຫ່ງ ສາທາລະນະລັດ ກູບາ ເມື່ອບໍ່ດົນມານີ້ ເນື້ອໃນສານມີດັ່ງນີ້: ພວກຂ້າພະເຈົ້າ ມີຄວາມໂສກເສົ້າ ແລະ ເສຍໃຈເປັນ ຢ່າງຍິ່ງ ທີ່ໄດ້ຮັບຂ່າວວ່າ ລົມພາຍຸ ທໍນາໂດ ໄດ້ພັດເຂົ້າສູ່ ປະເທດ ຂອງສະຫາຍ ເມື່ອບໍ່ດົນມານີ້, ອັນໄດ້ເຮັດໃຫ້ມີ ປະ ຊາຊົນເສຍຊີວິດ ແລະ ບາດເຈັບຈຳນວນໜຶ່ງ ແລະ ຊັບສິນ ຖືກທຳລາຍຢ່າງໜັກໜ່ວງ. ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະ ລັດ ປະຊາທິປະໄຕ ປະຊາຊົນລາວ, ພວກຂ້າພະເຈົ້າ ຂໍສະແດງ ຄວາມເຫັນໃຈ ແລະ ເສົ້າສະຫຼົດໃຈຢ່າງສຸດຊຶ້ງມາຍັງສະຫາຍ ແລະ ຜ່ານໄປຍັງລັດຖະບານ ແລະ ປະຊາຊົນກູບາ ໂດຍສະ ເພາະຄອບຄົວຂອງຜູ້ປະສົບເຄາະຮ້າຍຈາກໄພທຳມະຊາດຄັ້ງນີ້ດ້ວຍ. ພວກຂ້າພະເຈົ້າ ຫວັງຢ່າງຍິ່ງວ່າ ພາຍໃຕ້ການນຳພາ ຂອງສະຫາຍ, ຜົນກະທົບຂອງໂສກນາດຕະກຳໄພພິບັດດັ່ງກ່າວ ຈະໄດ້ຮັບການແກ້ໄຂ ແລະ ຊີວິດການເປັນຢູ່ຂອງປະຊາຊົນ ທີ່ ໄດ້ຮັບການຟື້ນຟູໃຫ້ກັບຄືນສູ່ຄວາມປົກກະຕິ ໃນເວລາໄວໆ ເທົ່າທີ່ຈະເປັນໄດ້.