ນະຄອນຫຼວງວຽງຈັນ ເຊື່ອມຊຶມ ມະຕິ 7 ສະໄໝທີ X ຂອງພັກ


...

06.02.2019 9:03     

   ຫ້ອງວ່າການນະຄອນ ຫຼວງວຽງຈັນ ໄດ້ຈັດກອງປະຊຸມ ເຊື່ອມຊຶມເນື້ອໃນມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ຂອງພັກຂຶ້ນ ທີ່ ຫ້ອງປະຊຸມຂອງຫ້ອງການດັ່ງກ່າວ, ພາຍໃຕ້ການເປັນປະທານຂອງທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ເລຂາ ຄະນະພັກ ເຈົ້າຄອງນະຄອນ ຫຼວງວຽງຈັນ, ມີບັນດາຮອງເລຂາຄະນະພັກ, ຫົວໜ້າພະແນກ-ຮອງຫົວໜ້າພະແນກ ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ. ການເຊື່ອມຊຶມຄັ້ງນີ້,ເພື່ອ ເຮັດໃຫ້ພະນັກງານ-ຄຸ້ມຄອງ,ພະນັກງານສະມາຊິກພັກ, ລັດຖະກອນ ໄດ້ຮັບຮູ້, ເຂົ້າໃຈແຈ້ງ ກ່ຽວກັບສະພາບຄວາມຫຍຸ້ງຍາກ ທາງດ້ານເສດຖະກິດ-ການເງິນ ຂອງປະເທດ ໃນໄລຍະທີ່ຜ່ານມາ ແລະ ຜົນສະທ້ອນໃນສະເພາະໜ້າ ແລະ ຍາວນານ; ກໍາແໜ້ນ ແລະ ເຊື່ອມຊຶມເປັນເອກະພາບຢ່າງສູງກັບທັດສະນະ, ທິດທາງ, ວິທີການ ແລະ ມາດຕະການ ທີ່ສູນກາງພັກວາງອອກ, ສ້າງຄວາມຕັດສິນໃຈແກ້ໄຂດ້ານເສດຖະກິດ-ການເງິນໃນຕໍ່ໜ້າ; ຄົ້ນຄວ້າກໍານົດ ບັນດາມາດຕະການແທດ ຕົວຈິງ ແລະ ມີປະສິດທິຜົນສູງ ເພື່ອແກ້ໄຂສະພາບດັ່ງກ່າວ, ສ້າງຂະບວນການຈັດຕັ້ງປະຕິ ບັດ ຢ່າງແຂງແຮງ, ທົ່ວເຖິງ ກໍ່ໃຫ້ເກີດມີການຫັນປ່ຽນຕົວຈິງ ທີ່ມີລັກສະນະບຸກທະລຸໃນທຸກຂົງເຂດວຽກງານ ເພື່ອຍູ້ແຮງການພັດທະນາ ດ້ານຕ່າງໆ ໃຫ້ບັນລຸຄາດໝາຍທີ່ກອງປະຊຸມໃຫຍ່ຄັ້ງທີ X ຂອງພັກວາງອອກ. ໃນກອງປະຊຸມ ທ່ານ ອານຸພາບ ຕຸນາລົມ ກໍາມະການສູນກາງພັກ ຮອງເລຂາຄະນະພັກ ປະທານສະພາປະຊາຊົນ ນວ ໄດ້ຂຶ້ນເຜີຍແຜ່ມະຕິຂອງຄະນະບໍລິຫານງານສູນກາງພັກ ສະບັບເລກທີ 057/ຄບສພ ລົງວັນທີ 19 ທັນວາ 2018 ວ່າດ້ວຍ ການເພີ່ມທະວີການນໍາພາ ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ, ຈາກນັ້ນ, ທ່ານ ສີຫຸນ ສິດທິລືໄຊ ຮອງເລຂາຄະນະພັກ ຮອງເຈົ້າຄອງ ນວ ກໍໄດ້ເຜີຍແຜ່ມະຕິຂອງຄະນະບໍລິຫານງານສູນກາງ ພັກສະໄໝທີ X ສະບັບເລກທີ 056/ຄບສພ ລົງວັນທີ 19 ທັນວາ 2018 ວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ. ກອງປະຊຸມ ຍັງໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນຢ່າງກົງໄປກົງມາ ຕໍ່ບັນຫາທີ່ຄົງຄ້າງທີ່ຕ້ອງຮີບຮ້ອນແກ້ໄຂ ແລະ ທິດທາງການແກ້ໄຂໃນຕໍ່ໜ້າ ໂດຍອີງໃສ່ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ເປັນພື້ນຖານ ໃນການປະກອບຄໍາເຫັນໃສ່ຂົງເຂດເສດຖະກິດ-ການເງິນ, ມາດຕະການຄຸ້ມຄອງໜີ້ສິນພາກລັດຂອງພາກສ່ວນກ່ຽວຂ້ອງ, ການຊໍາລະໜີ້ສິນສາທາລະນະ, ມາດຕະການຊຸກ ຍູ້ສົ່ງເສີມເສດຖະກິດຕ່າງໆ, ການແກ້ໄຂການຮົ່ວໄຫຼຂອງງົບປະມານ, ມາດຕະການປະຢັດການໃຊ້ຈ່າຍບໍລິຫານ, ຍົກລະດັບການຄຸ້ມຄອງແຫຼ່ງລາຍຮັບງົບປະມານ, ການຄຸ້ມຄອງເງິນຕາຢ່າງເປັນລະບົບ, ການປັບປຸງວິສາຫະກິດໃຫ້ມີປະສິດທິຜົນກວ່າເກົ່າ, ການປັບປຸງຮາກຖານການເມືອງໃນຕໍ່ໜ້າ ແລະ ການປັບປຸງຮາກຖານການເມືອງຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ. ( ຂ່າວ: ແສງຈັນ)