ສູນກາງຊາວໜຸ່ມເຊື່ອມຊຶມມະຕິ 7 ສະໄໝທີ X ຂອງພັກ


...

06.02.2019 9:15     

   ຄະນະບໍລິຫານງານພັກ ສູນກາງຊາວໜຸ່ມປະຊາຊົນ ປະຕິວັດລາວ ( ສຊປລ ) ໄດ້ຈັດຕັ້ງກອງປະຊຸມເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ແລະ ບັ້ນດຳເນີນຊີວິດການເມືອງພາຍໃນພັກ ປະຈຳປີ 2018 ຂຶ້ນໃນວັນທີ 5 ກຸມພານີ້, ທີ່ ສຊປລ, ໂດຍການເປັນປະທານຂອງສະຫາຍ ອາລຸນໄຊ ສູນນະລາດເລຂາຄະນະບໍລິຫານງານພັກ ສຊປລ, ມີບັນດາຮອງເລຂາພັກ, ພະນັກງານຫຼັກແຫຼ່ງ ແລະ ສະມາຊິກພັກອ້ອມຂ້າງ ສຊປລ ເຂົ້າຮ່ວມ. ກອງປະຊຸມຄັ້ງນີ້ໄດ້ເຊື່ອມຊຶມບັນດາເອກະສານຄຳແນະນຳຂອງຄະນະກວດກາສູນກາງພັກສະບັບເລກທີ 358/ຄກສພ ກ່ຽວກັບການດຳເນີນຊີວິດການເມືອງພາຍໃນພັກ ເພື່ອກ້າວສູ່ກອງປະຊຸມໃຫຍ່ 3 ຂັ້ນ, ເຊື່ອມຊຶມເອກະສານມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X, ມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕ ປະຊາຊົນໃຫ້ມີຄວາມເຂັ້ມແຂງ ແລະ ໜັກແໜ້ນ, ມະຕິວ່າດ້ວຍການເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ, ເຊື່ອມຊຶມຄຳແນະນຳຂອງຄະນະຈັດຕັ້ງສູນກາງພັກສະບັບເລກທີ 784/ຄຈສພ ກ່ຽວກັບການດຳເນີນກອງປະຊຸມໃຫຍ່ຂອງພັກ, ເຊື່ອມຊຶມດຳລັດວ່າດ້ວຍການພົ້ນທຸກ ແລະ ມາດຕະຖານພັດທະນາ, ເຊື່ອມຊຶມຄຳສັ່ງເລກທີ 01/ກມສພ, ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເຊື່ອມຊຶມຄຳແນະນຳເລກທີ 291/ຄຈສພ ກ່ຽວກັບການຈັດຕັ້ງປະຕິບັດຄຳສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເຊື່ອມຊຶມບົດແນະນຳຂອງຄະນະບໍລິຫານງານພັກ ສຊປລ ກ່ຽວກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຜ່ານຮ່າງບົດສະຫຼຸບຕີລາຄາບັ້ນດຳເນີນຊີວິດການເມືອງພາຍໃນພັກປະຈຳປີ 2018. ທັງໝົດນັ້ນເພື່ອໃຫ້ພະນັກງານຫຼັກແຫຼ່ງ ແລະ ສະມາຊິກທຸກສະຫາຍໄດ້ເຊື່ອມຊຶມກຳແໜ້ນບັນດາເອກະສານສຳຄັນຕ່າງ ໆ ເພື່ອນຳເອົາເນື້ອໃນຈິດໃຈດັ່ງກ່າວໄປຜັນຂະຫຍາຍໝູນໃຊ້ເປັນບົດຮຽນໃນວຽກງານຕົວຈິງໃຫ້ມີຜົນສຳເລັດເປັນກ້າວໆ . (ຂ່າວ: ພູວັນ, ພາບ : ສຳນານ)