ສຳເລັດກອງປະຊຸມວຽກງານອະໄພຍະໂທດທົ່ວປະເທດ


...

07.02.2019 9:22     

   ກອງປະຊຸມສະຫຼຸບວຽກ ງານອະໄພຍະໂທດທົ່ວປະ ເທດ ປະຈຳປີ 2018 ແລະ ທິດ ທາງໜ້າທີ່ວຽກງານຈຸດສຸມປີ 2019 ໄດ້ຈັດຂຶ້ນໃນວັນທີ 6 ກຸມພານີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກຳມະການອະໄພຍະໂທດລະດັບຊາດ, ມີທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ, ມີບັນດາຮອງຫົວໜ້າ, ຫົວໜ້າພະແນກ, ຮອງຫົວໜ້າພະແນກໄອຍະການທົ່ວປະເທດ ແລະ ພະນັກງານ ວິຊາການເຂົ້າຮ່ວມ. ໃນໄລຍະດໍາເນີນກອງປະຊຸມທ່ານ ຄໍາສານ ສຸວົງ ໄດ້ຜ່ານຮ່າງບົດສະຫຼຸບວຽກງານອະໄພຍະໂທດທົ່ວປະເທດ ປະຈໍາປີ 2018 ແລະ ທິດທາງໜ້າທີ່ວຽກງານຈຸດສຸມປີ 2019 ມີບາງຕອນສໍາຄັນວ່າ: ນັກໂທດທີ່ໄດ້ຮັບການອະໄພຍະໂທດຕາມລັດຖະດໍາລັດຂອງປະທານປະເທດໃນປີ 2018 ມີທັງໝົດ 1.711 ຄົນ, ໃນນັ້ນ ມີຍິງ 300 ຄົນ, ຕ່າງປະເທດ 28 ຄົນ, ຍິງ 11 ຄົນ, ນັກໂທດຕະຫຼອດຊີວິດ 15 ຄົນ,ຍິງ 2 ຄົນ, ຊຶ່ງໄດ້ແຍກອອກເປັນສອງປະເພດຄື: ອະໄພຍະໂທດຫຼຸດຜ່ອນໂທດທັງໝົດ 1.364 ຄົນ, ຍິງ 234 ຄົນ, ຕ່າງປະເທດ 24 ຄົນ, ຍິງ 9 ຄົນ,ນັກໂທດຕະຫຼອດຊີວິດ 15 ຄົນ, ຍິງ 2 ຄົນ,ໃນນີ້ ມີນັກໂທດຄະດີຢາເສບຕິດມີ 1.281 ຄົນ, ຍິງ 219 ຄົນ, ຕ່າງປະເທດ 20 ຄົນ, ຍິງ 8 ຄົນ, ນັກໂທດຄະດີທົ່ວໄປ ມີ 83 ຄົນ, ຍິງ 15 ຄົນ,ຕ່າງປະເທດ 4 ຄົນ, ຍິງ 1 ຄົນ ແລະ ອະໄພຍະໂທດປ່ອຍຕົວ ມີທັງໝົດ 347 ຄົນ, ຍິງ 66 ຄົນ, ຕ່າງປະເທດ 4 ຄົນ, ຍິງ 2 ຄົນ ໃນນີ້ ມີນັກໂທດຄະດີຢາເສບຕິດ 333 ຄົນ, ຍິງ 66 ຄົນ, ຕ່າງປະເທດ 4 ຄົນ,ຍິງ 2 ຄົນ ແລະ ນັກໂທດຄະດີທົ່ວໄປມີ 14 ຄົນ. ຄະນະກໍາມະການອະໄພຍະໂທດລະດັບກະຊວງ, ແຂວງ, ນະຄອນຫຼວງໄດ້ເກັບຄ່າປັບໃໝ ແລະ ຄ່າເສຍຫາຍທາງແພ່ງທີ່ນັກໂທດສໍາລະໃນບັ້ນຄົ້ນຄວ້າສະເໜີໃຫ້ອະໄພຍະໂທດປະຈໍາປີ 2018 ມີດັ່ງນີ້: ເກັບຄ່າປັບໃໝທາງອາຍາມີ 2 ຕື້ກວ່າກີບ, 6 ພັນບາດ (ສະກຸນເງິນໄທ) ແລະ ເກັບຄ່າ ເສຍຫາຍທາງແພ່ງມີທັງໝົດ 500 ລ້ານກວ່າກີບ, 25 ລ້ານດົງ (ສະກຸນເງິນຫວຽດນາມ), 7.600 ບາດ ແລະ ມອບຄືນໃຫ້ໂຈດທາງແພ່ງແລ້ວ 400 ລ້ານກວ່າກີບ, ສ່ວນຍັງເຫຼືອທາງພະແນກຍຸຕິທໍາແຂວງ, ນະຄອນຫຼວງເກັບຮັກສາໄວ້ ເພື່ອສືບຕໍ່ມອບໃຫ້ໂຈດທາງແພ່ງ. ສໍາລັບມາດຕະການຈັດຕັ້ງປະຕິບັດວຽກງານອະໄພຍະໂທດປີ 2019 ຈະເພີ່ມທະວີສຶກສາອົບຮົມການເມືອງ-ແນວຄິດ, ຈັດຕັ້ງເຊື່ອມຊຶມ ລັດຖະບັນຍັດ, ແນວທາງນະໂຍບາຍ ກໍຄືບັນດາເອກະສານຕ່າງໆ ທີ່ກ່ຽວຂ້ອງກັບວຽກງານອະໄພຍະໂທດ ເພື່ອໃຫ້ເຫັນໄດ້ຄວາມສໍາຄັນ ແລະ ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຄະນະກໍາມະການອະໄພຍະໂທດແຕ່ລະລະດັບ ແລະຊ່ວຍວຽກຕ່າງໆໃຫ້ສູງຂຶ້ນຈັດຕັ້ງເຜີຍແຜ່ລັດຖະບັນຍັດ ແລະ ເອກະສານຕ່າງໆໃຫ້ແກ່ຊັ້ນຄົນ-ສັງຄົມຢ່າງກວ້າງຂວາງ. (ຂ່າວ : ບຸນທົງ)