ສນຊ ແລະ ອົງການອຸຍນີເຊັບສືບຕໍ່ ການຮ່ວມມືໃນຕໍ່ໜ້າ


...

08.02.2019 9:45     

   ທ່ານ ໄຊສົມພອນ ພົມວິ ຫານ ກຳມະການກົມການ ເມືອງສູນກາງພັກ ປະທານສູນກາງແນວລາວສ້າງຊາດ ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ໂອກຕາວຽນ ວີໂວນ ຜູ້ຕາງໜ້າອົງການອຸຍນີເຊັບ (UNICEF) ປະຈຳ ສປປ ລາວ ເມື່ອວັນທີ 7 ກຸມພານີ້ ທີ່ສູນກາງແນວລາວສ້າງຊາດ (ສນຊ). ໂອກາດນີ້, ທ່ານ ປະທານ ສນຊ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດການຮ່ວມມືຂອງອົງການອຸຍນີເຊັບ ແລະ ສນຊ ໃນໄລຍະຜ່ານມາ ໂດຍສະເພາະແມ່ນວຽກງານໂພຊະນາການ,ການສັກຢາກັນພະຍາດ, ວຽກງານສຸຂະອະນາໄມ, ວຽກງານການຕ້ານ ແລະ ສະກັດກັ້ນການໃຊ້ຄວາມຮຸນແຮງ ຕໍ່ແມ່ຍິງ ແລະ ເດັກນ້ອຍ ຢູ່ບັນດາແຂວງເປົ້າໝາຍ. ໂອກາດນີ້, ທ່ານ ໂອກຕາວຽນ ວີໂວນ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ ທ່ານ ປະທານ ສນຊ ທີ່ໄດ້ຕ້ອນຮັບຢ່າງອົບອຸ່ນ ແລະ ໄດ້ລາຍງານຜົນສຳເລັດການຮ່ວມມື ລະຫວ່າງ ສນຊ ແລະ ອົງການອຸຍນີເຊັບ ໃນການເຄື່ອນໄຫວໃນໄລຍະຜ່ານມາ ແລະ ທິດທາງແຜນການເຄື່ອນໄຫວໃນປີຕໍ່ໜ້າ ຢູ່ທີ່ ສປປ ລາວ ໃຫ້ທ່ານ ໄຊສົມພອນ ພົມວິຫານ ໄດ້ຮັບຊາບ. (ຂ່າວ: ສນຊ)