ສະພາແຫ່ງຊາດຈັດກອງປະຊຸມເຊື່ອມຊຶມມະຕິ 7 ສະໄໝທີ X ຂອງພັກ


...

08.02.2019 9:46     

   ສະພາແຫ່ງຊາດ ໄດ້ຈັດກອງປະຊຸມເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ຂອງສູນກາງພັກ ໃຫ້ແກ່ພະນັກງານ-ລັດຖະກອນຢູ່ພາຍໃນສະພາແຫ່ງຊາດໃນວັນທີ 7 ກຸມພານີ້ ໂດຍການເປັນປະທານ ຂອງ ສະຫາຍ ພົນໂທ ແສງນວນ ໄຊຍະລາດ ເລຂາທິການສູນກາງພັກ, ເລຂາຄະນະພັກ, ຮອງປະທານສະພາແຫ່ງຊາດ. ທ່ານໄດ້ກ່າວເປີດກອງປະຊຸມຄັ້ງນີ້ ຊຶ່ງມີບາງຕອນ ສໍາຄັນວ່າ: ເນື້ອໃນການເຊື່ອມຊຶມມະຕິ 7 ສະໄໝທີ X ຂອງພັກໃນຄັ້ງນີ້ ເປັນບັນຫາທີ່ສຳຄັນຫຼາຍ ຕິດພັນໂດຍກົງກັບຄວາມຮັບຜິດຊອບການເມືອງ ຂອງຄະນະພັກ-ຄະນະນໍາ ແຕ່ລະຂັ້ນ. ສະນັ້ນ ຈຶ່ງຮຽກຮ້ອງມາຍັງບັນດາສະຫາຍ ຈົ່ງເຊີດຊູຄວາມຮັບຜິດຊອບ, ເສີມຂະຫຍາຍຫົວຄິດປະດິດສ້າງ, ກ້າເວົ້າຄວາມຈິງ, ກ້າສະເໜີບັນຫາ-ສະເໜີວິທີທາງແກ້ໄຂທີ່ຖືກຕ້ອງ, ສອດຄ່ອງກັບຫົວໜ່ວຍຮາກຖານຂອງຕົນ. ບັນຫາສຳຄັນແມ່ນພວກເຮົາຕ້ອງໄດ້ກຳແໜ້ນ ສະພາບຈຸດພິເສດ ແລະ ບັນຫາຕົວຈິງຂອງສຳນັກງານ, ແຜນການລະອຽດຂອງອົງການ ກົມກອງຂອງຕົນ. ບັນດາສະຫາຍ ພ້ອມກັນຍົກສູງຄວາມຮັບຜິດຊອບໜ້າທີ່ການເມືອງ ເຮັດໃຫ້ການເຊື່ອມຊຶມຜັນຂະຫຍາຍ ມະຕິ 7 ສະໄໝທີ X ຂອງພັກໃນເທື່ອນີ້ ສາມາດບັນລຸຜົນສຳເລັດຕາມຈຸປະສົງ ແລະ ລະດັບຄາດ ໝາຍທີ່ວາງໄວ້. ໃນກອງປະຊຸມ, ສະຫາຍ ວິໄລວົງ ບຸດດາຄຳ ກຳມະການສູນກາງພັກ ຄະນະປະຈຳພັກສະພາແຫ່ງຊາດ ປະທານກຳມາທິການແຜນການ, ການເງິນ ແລະ ການກວດສອບ ໄດ້ຂຶ້ນເຜີຍແຜ່ມະຕິ ເລກທີ 057/ຄບສພ ວ່າດ້ວຍການເພີ່ມທະວີການນຳພາແກ້ໄຂ ຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ, ຊຶ່ງໄດ້ຍົກໃຫ້ເຫັນກ່ຽວກັບສະພາບຄວາມຫຍຸ້ງຍາກດ້ານເສດຖະກິດ-ການເງິນ ແລະ ບັນດາສາເຫດຕົ້ນຕໍ, ໄດ້ຍົກໃຫ້ເຫັນຢ່າງເປັນລະບົບສົມຄວນໃນຄວາມຫຍຸ້ງຍາກດ້ານການເງິນງົບປະມານ, ບັນຫາໜີ້ສິນສາທາລະນະ ແລະ ຄວາມອ່ອນແອຂອງວຽກງານແຜນການ-ການເງິນກໍຄືເສດຖະກິດມະຫາພາກເວົ້າລວມ; ເຜີຍແຜ່ໃຫ້ຮູ້ກ່ຽວກັບທິດທາງ, ມາດຕະການແກ້ໄຂ ແລະ ການຊີ້ນຳຈັດຕັ້ງປະຕິບັດ ເພື່ອເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ. ສະຫາຍ ນາງ ສີໃສ ລືເດດມູນສອນ ກຳມະການສູນກາງພັກ, ຮອງເລຂາຄະນະບໍລິຫານງານສູນກາງພັກ, ຮອງປະທານສະພາແຫ່ງຊາດ ໄດ້ຂຶ້ນເຜີຍແຜ່ເຊື່ອມຊຶມມະຕິເລກທີ 056/ຄບສພ, ຊຶ່ງໄດ້ຍົກໃຫ້ເຫັນກ່ຽວກັບສະພາບຄວາມເປັນຈິງ ຂອງຮາກຖານການເມືອງໃນປັດຈຸບັນ, ໃຫ້ເຫັນດ້ານດີ-ດ້ານອ່ອນຂອງການກໍ່ສ້າງຮາກຖານການເມືອງໃນໄລຍະຜ່ານມາ; ທັດສະນະພື້ນຖານ ແລະ ທິດທາງໜ້າທີ່ກ່ຽວກັບການປັບປຸງຮາກຖານການເມືອງໃນ ຕໍ່ໜ້າ ແລະ ມາດຕະການຈັດຕັ້ງປະຕິບັດ ໃນການປັບປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ ແລະ ໜັກແໜ້ນ. ວາລະຂອງການເຜີຍແຜ່ເຊື່ອມຊຶມມະຕິ 7 ສະໄໝທີ X ຂອງພັກຄັ້ງນີ້, ຍັງໄດ້ເປີດກ້ວາງການປະກອບຄຳຄິດຄຳເຫັນແລະ ຄົ້ນຄວ້າປຶກສາຫາລືຢ່າງກົງໄປກົງມາ ຕໍ່ບັນຫາທີ່ຄວນຂະຫຍາຍ, ບັນຫາທີ່ຕ້ອງໄດ້ເອົາໃຈໃສ່ປັບປຸງແກ້ໄຂ ແລະ ອື່ນໆຢ່າງພາວະວິໄສ, ສ້າງສັນ, ຖືກຕ້ອງ ແລະ ແທດເໝາະກັບຄວາມເປັນຈິງ. (ຂ່າວ + ພາບ: ສຸກສະຫວັນ)