ທ່ານ ທອງລຸນ ສີສຸລິດ ໄດ້ຮັບຫຼຽນກຽດຕິຄຸນລັດຖະບານໂອຕຣິດ


...

11.02.2019 9:56     

   ພິທີປະດັບຫຼຽນກຽດຕິຄຸນ (Grand Tyrolian Eagle Award) ໃຫ້ທ່ານ ທອງລຸນ ສີສຸລິດ ນາຍົກລັດຖະມົນຕີ ປະທານກິດຕິມະສັກ ຄະນະກຳມະການບ້ານຊ່ວຍເຫຼືອເດັກນ້ອຍເອັສໂອເອັສລາວ (SOS)ຂຶ້ນໃນວັນທີ 8 ກຸມພາຜ່ານມາ ທີ່ຫ້ອງວ່າການ ສໍານັກງານນາຍົກລັດຖະມົນຕີ ໂດຍແມ່ນທ່ານ ກຶນເທີ ປລັດເຕີ (Gunther Platter) ເຈົ້າແຂວງໆ ທີໂຣນ ຕາງໜ້າລັດຖະບານ ປະເທດໂອຕຣິດ ເປັນຜູ້ປະດັບຫຼຽນດັ່ງກ່າວ ຊຶ່ງເປັນຫຼຽນສູງສຸດຂອງລັດຖະບານ ໂອຕຣິດ ມອບໃຫ້ຕ່າງປະເທດ.ການປະດັບຫຼຽນຄັ້ງນີ້, ເພື່ອເປັນການຍ້ອງຍໍສັນລະ ເສີນຄຸນງາມຄວາມດີໃຫ້ແກ່ທ່ານນາຍົກລັດຖະມົນຕີ ໃນການປະກອບສ່ວນຊ່ວຍເຫຼືອ ບ້ານເດັກນ້ອຍເອັສໂອເອັສລາວ, ທ່ານເປັນຜູ້ໜຶ່ງໃນການກໍ່ຕັ້ງໂຄງການບ້ານຊ່ວຍເຫຼືອເດັກນ້ອຍເອັສໂອເອັສລາວ ແຕ່ປີ 1993 ແລະ ຕະຫຼອດໄລຍະ 25 ປີ ທ່ານນາຍົກລັດຖະມົນຕີ ໄດ້ໃຫ້ຄວາມໃກ້ຊິດຕິດແທດ ຊີ້ນຳ-ນຳພາເອົາໃຈໃສ່ເປັນ ພິເສດຕໍ່ໂຄງການບ້ານຊ່ວຍ ເຫຼືອເດັກເອັສໂອເອັສລາວ ໃຫ້ເຕີບໃຫຍ່ຂະຫຍາຍຕົວ ແລະ ເປັນສະຖານທີ່ເບິ່ງແຍງລ້ຽງດູເດັກກຳພ້າ-ກຳພອຍ, ທີ່ດ້ອຍໂອກາດໃຫ້ມີຊີວິດທີ່ດີໃນສັງຄົມ. ທ່ານນາຍົກລັດຖະມົນຕີໄດ້ກ່າວສະແດງຄວາມຂອບໃຈຕໍ່ລັດຖະບານ ໂອຕຣິດ ທີ່ໄດ້ໃຫ້ການຊ່ວຍເຫຼືອລັດຖະບານລາວຕະຫຼອດໄລຍະຜ່ານມາໂດຍສະເພາະການຊ່ວຍເຫຼືອໃນໂຄງການບ້ານຊ່ວຍເຫຼືອເດັກ ເອັສໂອເອັສ ຊຶ່ງເປັນການປະກອບສ່ວນອັນສຳຄັນໃຫ້ແກ່ລັດຖະບານລາວ ໃນຄວາມພະຍາຍາມເພື່ອບັນລຸພັນທະຂອງຕົນພາຍໃຕ້ສົນທິສັນຍາຂອງອົງການສະຫະປະຊາຊາດວ່າດ້ວຍສິດທິເດັກ ແລະ ເປົ້າໝາຍການພັດທະນາແບບຍືນຍົງ, ລວມທັງການບັນລຸເປົ້າໝາຍແຜນພັດທະນາໂຄງການບ້ານຊ່ວຍເຫຼືອເດັກ ເອັສໂອ ເອັສ ແຕ່ນີ້ຮອດປີ 2030. ລັດຖະບານ ສປປ ລາວ ຖືວ່າໂຄງການບ້ານຊ່ວຍເຫຼືອເດັກເອັສໂອເອັສລາວ ເປັນຂອງຂວັນອັນລຳ້ຄ່າທີ່ອົງ ການ SOS ສາກົນ ມອບໃຫ້ລັດ ຖະບານລາວ ເພື່ອເປັນບ່ອນຢູ່ອາໃສ ສຳລັບເດັກກຳພ້າ-ກຳພອຍ, ດ້ອຍໂອກາດຂາດທີ່ເພິ່ງພາອາໃສ, ຂາດຜູ້ເບິ່ງແຍງລ້ຽງດູ ເທົ່າທີ່ພວກເຂົາຄວນຈະໄດ້ຮັບ, ບ້ານຊ່ວຍເຫຼືອເດັກນ້ອຍເອັສໂອເອັສລາວ ໄດ້ໃຫ້ການດູແລເບິ່ງແຍງໃຫ້ຄວາມຮັກ, ຄວາມອົບອຸ່ນ ຕາມຫຼັກການຂອງອົງການ SOS ສາກົນ ແລະ ສອດຄ່ອງກັບຮີດຄອງປະເພນີອັນດີງາມຂອງລາວຄື: ເປັນແມ່ລູກກັນ, ເປັນອ້າຍເອື້ອຍນ້ອງກັນ, ເປັນຄອບຄົວດຽວກັນ ແລະ ເປັນບ້ານດຽວກັນ, ໃຫ້ເດັກໄດ້ຮັບການລ້ຽງດູເບິ່ງແຍງຊີວິດການເປັນຢູ່, ສຸຂະພາບ, ໄດ້ຮັບການສຶກສາ ແລະ ມີອາຊີບ. ໃນໂອກາດດຽວກັນ, ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ປະທານຄະນະກຳມະການບ້ານຊ່ວຍເຫຼືອເດັກນ້ອຍເອັສໂອເອັສລາວ ຕາງໜ້າລັດຖະບານ ສປປ ລາວ ໄດ້ປະດັບຫຼຽນໄຊພັດທະນາ ຊັ້ນ III ໃຫ້ແກ່ ທ່ານ ກຶນເທີ ປລັດ ເຕີ ຊຶ່ງເປັນສະມາຊິກຂອງອົງການ SOS ສາກົນ ທີ່ໄດ້ປະກອບສ່ວນ ແລະ ໃຫ້ການສະໜັບສະໜູນດ້ານວັດຖຸ ແລະ ງົບປະມານ ໃຫ້ແກ່ອົງການ SOS ສາກົນ ເປັນຈຳນວນຫຼວງຫຼາຍ, ລວມທັງໂຄງການບ້ານຊ່ວຍເຫຼືອເດັກນ້ອຍເອັສໂອເອັສລາວ. ປັດຈຸບັນ ສປປ ລາວ ມີບ້ານຊ່ວຍເຫຼືອເດັກນ້ອຍເອັສໂອເອັສລາວ 6 ແຫ່ງ ໃນທົ່ວປະເທດ, ມີເດັກນ້ອຍຜູ້ດ້ອຍໂອກາດຫຼາຍກ່ວາ 600 ຄົນ ໄດ້ຮັບການຊ່ວຍເຫຼືອ ແລະ ຮຽນຈົບຈາກບ້ານຊ່ວຍເຫຼືອເດັກ SOS ແລະ ມີ 1 ພັນກວ່າຄົນ ກຳລັງໄດ້ຮັບການເບິ່ງແຍງ ດູແລໃນປັດຈຸບັນ. (ຂ່າວ: ທອງດຳ. ພາບ ສຸກສະຫວັນ)