ປີຜ່ານມາ ສະພາແຫ່ງຊາດ ແກ້ໄຂຄຳຮ້ອງຂໍ ຄວາມເປັນທຳໄດ້ 488 ເລື່ອງ


...

11.02.2019 9:57     

   ໃນປີ 2018 ຜ່ານມາ ສະພາແຫ່ງຊາດ ສາມາດແກ້ໄຂຄຳຮ້ອງທຸກຂອງປະຊາຊົນໄດ້ 448 ເລື່ອງ, ກວມເອົາ 54,28% ຂອງຈຳນວນຄຳຮ້ອງທຸກທັງ ໝົດ ແລະ ພະນັກງານລັດຖະ ກອນກໍໄດ້ຮັບການຍ້ອງຍໍ. ສະພາແຫ່ງຊາດ ໄດ້ສະ ຫຼຸບການເຄີື່ອນໄຫວວຽກງານ ປະຈຳປີ 2018 ແລະ ທິດທາງແຜນການປະຈຳປີ 2019 ຂຶ້ນໃນຕອນເຊົ້າທີ 8 ກຸມພາຜ່ານມາ ທີ່ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ໄດ້ຂຶ້ນຜ່ານບົດ ສະ ຫຼຸບການເຄື່ອນໄຫວວຽກງານພາຍໃນ ສະພາແຫ່ງຊາດ ໃນ 1 ປີຜ່ານມາວ່າ: ປະຕິບັດຕາມພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດໃນປີຜ່ານມາເຫັນວ່າມີອັນພົ້ນເດັ່ນກວ່າປີຜ່ານໆມາໂດຍສະເພາະການກະກຽມເນື້ອໃນໃຫ້ແກ່ກອງປະຊຸມສະໄໝສາມັນເທື່ອທີ 5 ແລະເທື່ອທີ 6 ຂອງສະພາແຫ່ງຊາດຊຸດທີ VIII ຊຶ່ງຄະນະປະຈຳສະພາແຫ່ງຊາດ ໄດ້ເອົາໃຈໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກເຂົ້າໃນການປະຕິບັດສິດ ແລະ ໜ້າທີ່ຂອງສະພາແຫ່ງຊາດ, ຈັດຕັ້ງປະຕິບັດວຽກງານຕ່າງໆຕາມຂັ້ນຕອນທີ່ກົດໝາຍກຳນົດ, ເພີ່ມທະວີການປະສານງານແຕ່ຫົວທີກັບພາກສ່ວນຕ່າງໆ, ດ້ວຍເຫດນັ້ນຜ່ານການດຳເນີນກອງປະຊຸມສະໄໝສາມັນຂອງສະພາແຫ່ງຊາດຈຳນວນ 2 ຄັ້ງສາມາດພິຈາລະນາ 45 ເນື້ອໃນ ແລະ ຮັບຮອງເປັນມະຕິກອງປະຊຸມສະພາແຫ່ງຊາດຈຳນວນ 38 ສະບັບໃນນີ້ຮັບຮອງເອົາກົດໝາຍໄດ້ຈຳນວນ 20 ສະບັບກວມເອົາ 74,07% ຂອງແຜນການປີ, ໃນນີ້ກົດໝາຍສ້າງ ໃໝ່ 11 ສະບັບ ແລະ ກົດໝາຍປັບປຸງ 9 ສະບັບ, ທາບທາມຮ່າງກົດໝາຍ 2 ສະບັບ, ພິຈາລະນາຮັບຮອງເອົາບັນຫາສຳຄັນພື້ນຖານຂອງຊາດເຊັ່ນ: ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈຳປີ 2018, ວຽກງານຂອງສະພາແຫ່ງຊາດ, ວຽກງານອົງການໄອຍະການປະຊາຊົນສູງສຸດ,ສານປະຊາຊົນສູງສຸດ, ອົງການກວດສອບແຫ່ງລັດ, ການແຕ່ງຕັ້ງສະມາຊິກລັດຖະບານຈຳນວນໜຶ່ງ ແລະວຽກອື່ນໆ.ຮັບຮອງເອົາແຜນການຕິດຕາມກວດກາຂອງສະພາແຫ່ງຊາດປະຈຳປີ 2019. ນອກນັ້ນຍັງໄດ້ຮັບຟັງການຊີ້ແຈງຂອງ 20 ພາກສ່ວນທີ່ພົວພັນກັບ 32 ເນື້ອໃນ. ຄະນະປະຈຳສະພາແຫ່ງຊາດໄດ້ເອົາໃຈໃສ່ດຳເນີນກອງປະຊຸມຂອງຕົນໄດ້ຈຳນວນ 24 ຄັ້ງ, ພິຈາລະນາ 101 ເນື້ອໃນ ແລະ ອອກເປັນມະຕິຂອງຄະນະປະຈຳສະພາແຫ່ງຊາດຈຳນວນ 70 ສະບັບ, ໃຫ້ສັດຕະຍາບັນແກ່ສົນທິສັນຍາ ແລະ ສັນຍາສາກົນ ທີ່ ສປປ ລາວ ເປັນພາຄີໄດ້ຈຳນວນ 4 ສະບັບ,ພິຈາລະນາຕໍ່ໂຄງການພັດທະນາໄຟຟ້າພະລັງນ້ຳ, ການຫັນປ່ຽນທີ່ດິນປ່າປ້ອງກັນແຫ່ງຊາດລັກສະນະຊົ່ວຄາວ, ການນໍາໃຊ້ຄັງສະສົມແຫ່ງລັດ, ການເກັບອາກອນຊົມໃຊ້ເພີ່ມເຕີມຈາກເບຍນໍາເຂົ້າ ແລະ ເບຍລາຄາຖືກ, ຮັບຮອງເອົາບຸກຄະລາກອນຂອງສານປະຊາ ຊົນ ແລະ ອື່ນໆ. ນອກນັ້ນ ສະພາແຫ່ງຊາດຍັງໄດ້ເອົາໃຈໃສ່ແກ້ໄຂຄຳຮ້ອງຂໍຄວາມເປັນທຳຂອງປະຊາຊົນໄດ້ 488 ເລື່ອງ, ກວມເອົາ 54,28% ຂອງຈຳນວນຄຳຮ້ອງທັງໝົດ, ຈາກຜົນງານການເຄື່ອນໄຫວວຽກງານໃນປີ2018 ຜ່ານມາສະພາແຫ່ງຊາດໄດ້ມີການຍ້ອງຍໍຊົມເຊີຍການຈັດຕັ້ງ ແລະ ບຸກຄົນດີເດັ່ນປະກອບມີການຍ້ອງຍໍການຈັດຕັ້ງ 12 ພາກສ່ວນ, (ໃບຍ້ອງຍໍຄະນະປະຈຳສະພາແຫ່ງຊາດ) ໃຫ້ບຸກຄົນມີ 301 ຄົນ (ໃນນີ້ໃບຍ້ອງຍໍຂອງຄະນະປະຈຳສະພາແຫ່ງຊາດຈຳນວນ 32 ຄົນ, ໃບຍ້ອງຍໍຄະນະເລຂາທິການສະພາແຫ່ງຊາດຈຳນວນ 232 ຄົນ ແລະ ໃບຊົມເຊີຍຂອງຄະນະເລຂາທິການສະພາແຫ່ງຊາດຈຳນວນ 37 ຄົນ. (ຂ່າວ-ພາບ: ພູວຽງຄຳ)