ອັດຕະປືເລັ່ງບຸກເບີກເຂດການຜະລິດທີ່ຖືກ ຜົົົົົນກະທົບຢູ່ເມືອງສະໜາມໄຊ


...

11.02.2019 9:58     

   ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ ພ້ອມດ້ວຍຄະນະໄດ້ຊຸກຍູ້ໃຫ້ຄະນະກຳມະການໄພພິບັດແຂວງອັດຕະປື ເມື່ອບໍ່ດົນຜ່ານມາ ເພື່ອສືບຕໍ່ເລັ່ງຈັດສັນເນື້ອທີ່ທຳການຜະລິດກະສິກຳໃຫ້ໄວໃນປີນີ້, ຂະນະທີ່ີປະຊາຊົນຜູ້ຖືກຜົນກະທົບຖືກຍົກຍ້າຍໃຫ້ເຂົ້າຢູ່ສູນພັກ ຊົ່ວຄາວສຳເລັດ. ແນວໃດກໍຕາມ ທ່ານ ນາງ ວິໄລພອນ ວໍລະພິມ ຫົວໜ້າພະແນກກະສິກຳ-ປ່າໄມ້ແຂວງ ຢັ້ງຢືນແລ້ວ ໃນໂອກາດທີ່ ທ່ານ ຮອງນາຍົກລັດຖະມົນຕີເຄື່ອນ ໄຫວລົງຕິດຕາມໃນພື້ນທີ່ເຂດການຜະລິດຕົວຈິງໃນວັນທີ 7 ກຸມພາ ຜ່ານມານີ້ວ່າ: ເພື່ອຊ່ວຍເຫຼືອປະຊາຊົນຜູ້ປະສົບເຄາະຮ້າຍທີ່ອາໄສຢູ່ສູນພັກ ຊົ່ວຄາວໄດ້ຮັບການດຳລົງຊີວິດເປັນປົກກະຕິໃນລະດັບພື້ນຖານນີ້ ທາງອົງການຈັດຕັ້ງຂອງແຂວງ ໂດຍສົມທົບກັບເມືອງ ແມ່ນໄດ້ຈັດສັນເນື້ອທີ່ການຜະລິດຮອງຮັບໃຫ້ປະຊາຊົນແລ້ວຈຳນວນ 2.140 ເຮັກຕາ, ມາຮອດປັດຈຸບັນບຸກເບີກໄດ້ 424 ເຮັກຕາ ແລະ ຄາດວ່າຈະໃຫ້ສຳເລັດທັນໃນລະດູການຜະລິດປີນີ້ຕາມຈິດໃຈທີ່ທ່ານຮອງນາຍົກຊີ້ນຳຢ່າງແນ່ນອນ. ທ່ານ ນາງ ວິໄລພອນ ວໍລະພິມ ໄດ້ກ່າວອີກວ່າ: ອີງຕາມຜົນຂອງການສຳຫຼວດວິໄຈດິນ ແລະ ຄຸນນະພາບຂອງດິນໃນພື້ນທີ່ບຸກເບີກປ່າຜະລິດຂອງປະຊາຊົນນັ້ນ ເຫັນໄດ້ວ່າຈຸດດົງບາກເປັນເຂດທີ່ມີຄວາມເໝາະສົມໃນການປູກເຂົ້າ ແລະ ປູກຫຍ້າໃຫ້ສັດມີຈຳນວນ 1.022,38 ເຮັກຕາ, ຈຸດທ່າແສງຈັນແມ່ນມີຄວາມເໝາະສົມໃນການປູກເຂົ້າມີເນື້ອທີ່138,95 ເຮັກຕາ, ຈຸດຕໍມໍຢອດແມ່ນມີຄວາມເໝາະສົມໃນການປູກສາລີ-ປູກມັນຕົ້ນມີເນື້ອທີ່510,13 ເຮັກຕາ ແລະ ຈຸດປິນດົງແມ່ນມີຄວາມເໝາະສົມໃນການປູກມັນຕົ້ນມີເນື້ອທີ່ 468,09 ເຮັກຕາ. ໃນການເຄື່ອນໄຫວເຮັດ ວຽກຄັ້ງນີ້ ທ່ານຮອງນາຍົກ ລັດຖະມົນຕີໄດ້ລົງພື້ນທີ່ຕິດ ຕາມ, ກວດກາພື້ນທີ່ໃນເຂດບຸກເບີກການຜະລິດຕົວຈິງກຳນົດປ່າຜະລິດ 4 ຈຸດນັ້ນຊຶ່ງທ່ານໄດ້ເນັ້ນໃຫ້ຄະນະນຳຂອງແຂວງ ແລະ ພາກສ່ວນກ່ຽວຂ້ອງກວດຄືນຢ່າງລະອຽດກ່ຽວກັບການບຸກເບີກເນື້ອທີ່ການຜະລິດໃນເຂດທີ່ກຳນົດໃຫ້ບຸກເບີກ ໂດຍສົມທົບກັບພາກສ່ວນກ່ຽວຂ້ອງໃຫ້ລະອຽດ ຕາມສັນຍາ, ລະບຽບການຊົດເຊີຍ ແລະ ບັນຫາອື່ນໆຢ່າງສົມເຫດສົມຜົນພ້ອມທັງໃຫ້ຮີບຮ້ອນສົ່ງເສີມໃຫ້ປະຊາຊົນໄດ້ເລີ່ມເຮັດການຜະລິດໃຫ້ທັນລະດູການ, ຕາມແຜນການທີ່ວາງໄວ້ສຳລັບໃນການຜະລິດເພື່ອຫັນວິກິດເປັນໂອກາດໃນການຊ່ວຍເຫຼືອປະຊາຊົນນັ້ນທາງແຂວງຍັງຈະໄດ້ຈັດການຜະລິດໂດຍອີງໃສ່ທ່າແຮງຂອງການຕະຫຼາດໃຫ້ເປັນອັນລະອຽດຕື່ມອີກ, ໃນເວລາດຽວກັນ ທ່ານ ຮອງນາຍົກ ຍັງໄດ້ສືບຕໍ່ຢ້ຽມຢາມພົບປະກັບອໍານາດການປົກຄອງຂອງບ້ານ ແລະ ຄອບຄົວຂອງປະຊາຊົນຢ່າງໃກ້ຊິດໃນພື້ນທີ່ສູນພັກຊົ່ວຄາວເຊັ່ນ: ຈຸດຕໍມໍຢອດ, ຈຸດປິນດົງ ແລະ ຈຸດອື່ນໆ ເພື່ອຊັກຖາມໃນເລື່ອງສະພາບການເປັນຢູ່ຂອງປະຊາຊົນເປັນຕົ້ນ ບັນຫາສຸຂະພາບ, ສະຖານທີ່ພັກເຊົາ, ອາຫານການກິນ, ເຄື່ອງນຸ່ງຫົ່ມ, ເຄື່ອງໃຊ້ທີ່ຈຳເປັນ, ການຕອບສະໜອງຄວາມຮຽກຮ້ອງຕ້ອງການອັນຈຳເປັນແລະຮີບດ່ວນຂອງປະຊາຊົນແລະອື່ນໆ. ພ້ອມກັນນັ້ນ, ທ່ານຍັງໄດ້ສົ່ງຄຳອວຍພອນໃຫ້ແກ່ຜູ້ປະສົບໄພ ພ້ອມທັງໄດ້ໂອ້ລົມຕໍ່ປະຊາຊົນຈົ່ງມີຈິດໃຈເຂັ້ມແຂງ, ອຸ່ນອ່ຽນທຸ່ນທ່ຽງ, ພ້ອມກັນປະຕິບັດຕາມຄຳແນະນຳຂອງຂັ້ນເທິງກໍ່ຄືການນຳພັກ-ລັດເພື່ອຫຼີກລ່ຽງຄວາມສ່ຽງຕ່າງໆທີ່ຈະຕາມມາ, ຊຶ່ງພັກ-ລັດແລະພາກສ່ວນທີ່ກ່ຽວຂ້ອງຈະເອົາໃຈໃສ່ຢ່າງເຕັມທີ່ເພື່ອຊ່ວຍເຫຼືອແລະຟື້ນຟູສະພາບທີ່ເກີດຂຶ້ນຢ່າງສຸດຄວາມສາມາດ, ສິ່ງສຳຄັນໄລຍະກາງນີ້ແມ່ນການແກ້ໄຂບັນຫາການຈັດສັນເນື້ອທີ່ການຜະລິດ ເພື່ອແກ້ໄຂເຮັດໃຫ້ສະພາບການຊີວິດການເປັນຢູ່ຂອງປະຊາຊົນກັບຄືນສູ່ປົກກະຕິ. (ຂ່າວ: ມາລາທິບ)