ເປີດມູນນິທິສອງມືນາງຢ່າງເປັນທາງການ


...

11.02.2019 9:59     

   ມູນນິທິສອງມືນາງ ທີ່ເຮັດວຽກສົ່ງເສີມໃຫ້ປະຊາຊົນຕໍ່າຫູກທໍໄໝ, ປູກມອນລ້ຽງມ້ອນ ສາມາດນຳໃຊ້ພູມປັນຍາຂອງຕົນເອງໃນການສ້າງລາຍຮັບໃຫ້ແກ່ຄອບຄົວ. ນອກຈາກນີ້, ຍັງໄດ້ປະກອບສ່ວນຊ່ວຍ ເຫຼືອສັງຄົມ ເປັນຕົ້ນແມ່ນປະ ຊາຊົນຜູ້ທີ່ໄດ້ຮັບຜົນກະທົບຈາກໄພນຳ້ຖ້ວມໃນປີຜ່ານມາ ແລະ ບັນດາໂຮງຮຽນປະຖົມທີ່ເປັນເປົ້າໝາຍຂອງມູນນິທິ. ພິທີເປີດມູນນິທິດັ່ງກ່າວຢ່າງເປັນທາງການ ໄດ້ມີຂຶ້ນໃນວັນທີ 7 ກຸມພາ ຜ່ານມາ, ທີ່ນະຄອນຫຼວງວຽງຈັນ ໂດຍມີບັນດາລັດຖະມົນຕີ, ການຈັດຕັ້ງທີ່ກ່ຽວຂ້ອງທັງພາຍໃນ ແລະ ຕ່າງປະເທດເຂົ້າຮ່ວມ. ທ່ານນາງ ແກ້ວສາຍໃຈ ໄຊຍະສອນ ປະທານມູນນິທິ ສອງມືນາງ ໄດ້ກ່າວວ່າ: ແມ່ຍິງລາວມີມູນເຊື້ອດຸໝັ່ນຂະຫຍັນພຽນ, ມີຫົວຄິດປະດິດສ້າງ ແລະ ມີສີໄມ້ລາຍມືໃນການຕໍ່າແຜ່ນແພອັນປານີດງົດງາມ. ເພື່ອຈະຊ່ວຍໃຫ້ແມ່ຍິງ ແລະ ເດັກນ້ອຍ ທີ່ທຸກຍາກດ້ອຍໂອກາດ ທີ່ຢູ່ຫ່າງໄກສອກຫຼີກ ຫຼຸດພົ້ນອອກຈາກຄວາມທຸກຍາກ ຕາມແນວທາງນະໂຍບາຍຂອງພັກ ແລະ ລັດຖະບານ ແລະ ເປັນການຂະຫຍາຍໃຫ້ປະຊາຊົນລາວພວກເຮົາໄດ້ມີວຽກເຮັດງານທໍາເພີ່ມຂຶ້ນ ຈຶ່ງໄດ້ຕັດສິນໃຈສ້າງຕັ້ງມູນນິທິສອງມືນາງຂຶ້ນ ເພື່ອຊ່ວຍເຫຼືອສັງຄົມໃນການຕໍ່າຫູກທໍໄໝ, ປູກມອນລ້ຽງມ້ອນ ແລະ ເພື່ອໃຫ້ເຂົາເຈົ້າສາມາດນໍາໃຊ້ພູມປັນຍາຂອງຕົນເອງ ໄດ້ຢ່າງມີປະສິດທິ ຜົນ ແລະ ມີລາຍໄດ້ຫຼັກໃຫ້ແກ່ຄອບຄົວ. ນອກຈາກວຽກງານສົ່ງເສີມການຕໍາຫູກທໍໄໝ ແລະ ປູກມອນລ້ຽງມ້ອນແລ້ວ ໃນປີ 2018 ຜ່ານມາ ມູນນິທິສອງມືນາງ ຍັງໄດ້ມີກິດຈະກຳຊ່ວຍເຫຼືອດ້ານສັງຄົມຫຼາຍຢ່າງ ເປັນຕົ້ນແມ່ນ ໄດ້ຊ່ວຍເຫຼືອໃນກໍລະນີເກີດອຸທົກກະໄພນຳ້ຖ້ວມ ເມືອງສະໜາມໄຊ ແຂວງອັດຕະປື (ຫ້າສິບລ້ານກີບ) ໂດຍມອບຜ່ານກະຊວງແຮງງານ ແລະ ສະຫວັດດີການສັງຄົມ; ໄດ້ປະກອບເຄື່ອງຊ່ວຍເຫຼືອທີ່ສູນ ບ້ານຫາດຊາຍຍາວ ເມືອງສະໜາມໄຊ ແຂວງອັດຕະປື (ລວມມູນຄ່າ 70 ລ້ານກວ່າກີບ); ໄດ້ປະກອບສ່ວນຊ່ວຍເຫຼືອວັດຖຸ ແລະ ທຶນຮອນເຂົ້າໃນການຊ່ວຍເຫຼືອຜູ້ປະສົບໄພນຳ້ຖ້ວມຢູ່ແຂວງຄຳມ່ວນ (ມູນຄ່າລ້ານກີບ); ໄດ້ລົງໄປແຈກຢາຍວັດຖຸອຸປະກອນຊຸກຍູ້ການຮຽນ-ການສອນຂອງນັກຮຽນ ແລະ ຄູ-ອາຈານ ໃນໂຮງຮຽນເປົ້າໝາຍຂອງມູນນິທິສອງມືນາງ ລວມມູນຄ່າການຊ່ວຍເຫຼືອທັງໝົດໃນປີ 2018 ຜ່ານມາ 180 ລ້ານກວ່າກີບ. ໃນຕອນທ້າຍ ທ່ານ ນາງ ແກ້ວສາຍໃຈ ໄຊຍະສອນ ຍັງໄດ້ກ່າວສະແດງຄວາມຂອບ ໃຈ ແລະ ຮູ້ບຸນຄຸນມາຍັງການ ນຳພັກ-ລັດທຸກຂັ້ນ ແລະ ການ ຈັດຕັ້ງທີ່ກ່ຽວຂ້ອງທຸກພາກ ສ່ວນທັງພາຍໃນ ແລະ ຕ່າງ ປະເທດ ທີ່ໄດ້ໃຫ້ການສະໜັບ ສະໜູນ ແລະ ອູ້ມຊູຊ່ວຍເຫຼືອມູນນິທິສອງມືນາງຕະ ຫຼອດມາ. (ພາບ + ຂ່າວ: ທອງດໍາ + ສຸກສະຫວັນ)