ທະນາຄານຮ່ວມພັດທະນາ ຮ່ວມມືກັບການບິນລາວ


...

28.03.2019 9:17     

   ທະນາຄານຮ່ວມພັດທະ ນາ (JDB) ແລະ ລັດວິສາຫະກິດການບິນລາວ ໄດ້ຈັດພິທີເປີດບໍລິການຜະລິດຕະພັນບັດ ຮ່ວມທຸລະກິດຄື: ບັດ VISA CREDIT " JDB CHAMPA SUPER GOLD " ຂຶ້ນເມື່ອບໍ່ດົນຜ່ານມານີ້ ທີ່ຫ້ອງປະຊຸມໃຫຍ່ ທະນາຄານຮ່ວມພັດທະນາ ຢ່າງເປັນທາງການ ໂດຍເປັນກຽດເຂົ້າຮ່ວມມີ ທ່ານ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, ທ່ານ ສຸລິສັກ ທໍານຸວົງ ຫົວໜ້າກົມຄຸ້ມຄອງລະບົບຊໍາລະສະສາງ ທະນາຄານແຫ່ງ ສປປ ລາວ, ທ່ານ ບຸນແຕ່ງ ສີມູນ ຮອງຫົວໜ້າກົມການບິນພົນລະເຮືອນ, ທ່ານ ບຸນມາ ຈັນທະວົງສາ ຜູ້ອໍານວຍການໃຫຍ່ລັດວິສາຫະກິດການບິນລາວ, ທ່ານ ເອກະພັນ ພະພິທັກ ປະທານສະພາບໍລິຫານ ທະນາຄານຮ່ວມພັດທະນາ ແລະ ຜູ້ບໍລິຫານລະດັບສູງ ຕະຫຼອດຮອດພະນັກງານ ວິຊາການທີ່ກ່ຽວຂ້ອງ ທັງສອງຝ່າຍ ເຂົ້າຮ່ວມຢ່າງພ້ອມພຽງ.
    ທະນາຄານຮ່ວມພັດທະ ນາ ໄດ້ມີການບໍລິການ ການເງິນແບບຄົບວົງຈອນ ພ້ອມທັງຍົກສູງການບໍລິການ ໃຫ້ເປັນທີ່ຍອມຮັບຂອງສັງຄົມລາວ ແລະ ກ້າວສູ່ສາກົນ ເທື່ອລະກ້າວ "JDB ຍົກສູງວຽກງານ ບໍລິການ ໃຫ້ເປັນທີ່ພໍໃຈ ທັນຍຸກທັນສະໄໝ ໄດ້ມາດຕະຖານສາກົນ ຖືເອົາຄວາມຕ້ອງການຂອງລູກຄ້າເປັນຫຼັກ, ພັດທະນາຜະລິດຕະພັນດ້ວຍລະບົບເຕັກໂນໂລຊີທັນສະໄໝ,ສ້າງຜົນປະໂຫຍດໃຫ້ແກ່ທຸກຝ່າຍສາມາດເຕີບໃຫຍ່ ຂະຫຍາຍ ຕົວໄປພ້ອມກັນ ແລະ ເປັນສ່ວນປະກອບທີ່ສຳຄັນໃນການພັດທະນາປະເທດຊາດ " ດ້ວຍການຮ່ວມມື ກັບລັດວິສາຫະກິດ ການບິນລາວ ໃນຮູບແບບໃໝ່, ສ້າງຜະລິດຕະພັນບັດໃຫ້ມີຄວາມຫຼາກຫຼາຍ, ບັດ JDB CHAMPA SUPER GOLD ເປັນບັດເຄດິດທີ່ໄດ້ຮັບສິດທິປະໂຫຍດ ແລະ ການບໍລິການເສີມ ທີ່ຫຼາກຫຼາຍ ຈາກ 4 ພາກສ່ວນ ຮ່ວມມືກັນລະຫ່ວາງ ທະນາຄານຮ່ວມພັດທະນາ, ການບິນລາວ, VISA ແລະ ບໍລິສັດ ວຽງຈັນປະກັນໄພ, ເປັນບັດເຄຣດິດ Visa ມີບັນຊີເງິນຝາກຄໍ້າປະກັນ 2.000 ໂດລາຂຶ້ນໄປ ແລະ ສາມາດໃຊ້ໄດ້ 90% ຂອງວົງເງິນບັນຊີເງິນຝາກ, ສາມາດໃຊ້ຊໍາລະຄ່າສິນຄ້າ ແລະ ຄ່າບໍລິການຮ້ານຄ້າ ທີ່ມີສັນຍາລັກ ຫຼື ໂລໂກ້ VISA ທົ່ວໂລກ, ຊື້ສິນຄ້າອອນລາຍຜ່ານ ເວບໄຊ, ນອກຈາກນັ້ນຍັງສາມາດຖອນເງິນສົດຜ່ານຕູ້ເອທີເອັມ ຫຼື ໜ້າເຄົາເຕີ້ທະນາຄານ ທີ່ມີສັນຍາລັກ ຫຼື ໂລໂກ້ VISA ທົ່ວໂລກ ແລະ ໃຊ້ເປັນບັດສະມາຊິກການບິນລາວເພື່ອສະສົມໄລຍະທາງການບິນ ແລະ ແລກເອົາສິດທິພິເສດຕ່າງໆ ກັບການບິນລາວ, ໃຊ້ຫ້ອງຮັບຮອງພິເສດທີ່ສະໜາມບິນ ເມື່ອທ່ານ ເດີນທາງກັບການບິນລາວໂດຍບໍ່ເສຍຄ່າ 2 ຄັ້ງ ຫຼື ໃຊ້ໄລຍະເດີນທາງ ສະສົມຕາມເງື່ອນໄຂ, ນອກຈາກນັ້ນ ທ່ານຈະໄດ້ຮັບ ສິດທິພິເສດ ແລະ ສ່ວນຫຼຸດ ຈາກຮ້ານຄ້າທົ່ວໂລກ ທີ່ມີ ເຄື່ອງໝາຍ visa ແລະ ສ່ວນຫຼຸດ ຈາກບັນດາຮ້ານຄ້າສະມາຊິກ ທີ່ເຂົ້າຮ່ວມໂຄງການ ກັບ JDB ສູງສຸດ 50%, ສາມາດຄວບຄຸມ ແລະ ຕິດຕາມການເຄື່ອນໄຫວຂອງບັດ ຜ່ານ Mobile App: JDB YES ນອກຈາກນັ້ນ ຍັງເພີ່ມການຄຸ້ມຄອງອຸບັດເຫດທົ່ວໂລກ 24 ຊົ່ວໂມງ ວົງເງິນສູງເຖິງ 50 ລ້ານກີບ .
    ທະນາຄານຮ່ວມພັດ ທະນາເປັນທະນາຄານທີ່ໝັ້ນ ຄົງ ແລະ ຂະຫຍາຍຕົວໄວ ປັດຈຸບັນທະນາຄານຮ່ວມພັດ ທະນາ ມີໜ່ວຍບໍລິການທັງໝົດ 60 ໜ່ວຍບໍລິການ ໃນຂອບເຂດທົ່ວປະເທດ ເພື່ອໃຫ້ປະຊາຊົນບັນດາເຜົ່າທີ່ຢູ່ທຸກຂົງເຂດ ໄດ້ເຂົ້າເຖິງແຫ່ງທຶນ ທີ່ໝັ້ນຄົງ, ເຂົ້າເຖິງການບໍລິ ການດ້ານການເງິນແບບຄົບວົງ ຈອນ, ພ້ອມກັນນັ້ນ JDB ກໍໄດ້ພັດທະນາທະນາຄານໃຫ້ກາຍເປັນ Digital Banking ເທື່ອລະກ້າວ, ສ້າງຜົນປະ ໂຫຍດສູງສຸດໃຫ້ກັບລູກຄ້າ. ໂດຍໄປຕາມຄຳຂວັນຂອງທະ ນາຄານຮ່ວມພັດທະນາທີ່ວ່າ: "ເຕີບໃຫຍ່ໄປພ້ອມກັນ".
(ຂ່າວ-ພາບ: JDB)