ສະຫຼຸບວຽກງານ ປກຊ-ປກສ ປະຈຳປີ 2018


...

01.04.2019 9:49     

   ກອງປະຊຸມສະຫຼຸບຖອດຖອນບົດຮຽນວຽກງານປ້ອງກັນຊາດ (ປກຊ) - ປ້ອງກັນຄວາມສະຫງົບ(ປກສ) ຂອງ 3 ແຂວງ, ນະຄອນຫຼວງ ແລະ 2 ກອງພົນປະຈໍາປີ 2018 ໄດ້ຈັດຂຶ້ນໃນວັນທີ 27 ມີນາຜ່ານມາ ຢູ່ສະໂມສອນຂອງກອງບັນຊາການທະຫານແຂວງຫຼວງພະບາງ ໂດຍການເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ, ມີປະທານປກຊ-ປກສ ນະຄອນຫຼວງວຽງຈັນ, ເລຂາພັກແຂວງ, ປະທານຄະນະກໍາມະການປກຊ - ປກສ ແຂວງວຽງຈັນ, ຫຼວງພະບາງ ແລະ ແຂວງໄຊຍະບູລີ, ກອງພົນທີ 1, ກອງພົນທີ 2, ມີພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ. ໃນກອງປະຊຸມທ່ານ ພົນຈັດຕະວາ ຄໍາຫຼ້າ ວົງວິໄລ ກໍາມະການພັກແຂວງ ຫົວໜ້າການທະຫານກອງບັນຊາການທະຫານແຂວງຫຼວງພະບາງ ໄດ້ຂຶ້ນຜ່ານບົດສະຫຼຸບວຽກງານປ້ອງກັນຊາດ - ປ້ອງກັນຄວາມສະຫງົບທັງສອງພາກ, ໂດຍໄດ້ຍົກໃຫ້ເຫັນການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ພາຍໃນ 3 ແຂວງ, ນະຄອນຫຼວງ ແລະ 2 ກອງພົນ ປະຈໍາປີ 2018 ແລະ ທິດທາງແຜນການປີ 2019. ກອງປະຊຸມໄດ້ເອກະພາບກັນໃນການຈັດຕັ້ງປະຕິບັດວຽກງານປ້ອງກັນຊາດ - ປ້ອງກັນຄວາມສະຫງົບ ໃນຊຸມປີຜ່ານມາໂດຍສອດຄ່ອງກັບເງື່ອນໄຂຂອງແຕ່ລະທ້ອງຖິ່ນ, ຊຶ່ງສາມາດຍາດໄດ້ຜົນງານຫຼາຍດ້ານເປັນຕົ້ນແມ່ນໄດ້ພ້ອມກັນຮັກສາໄດ້ ຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມ, ລະບົບການເມືອງຢູ່ຂັ້ນຮາກຖານບ້ານໄດ້ຮັບການປັບປຸງດີຂຶ້ນ, ເສດຖະກິດກໍໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່ານັບມື້ດີຂຶ້ນ, ກໍາລັງປ້ອງກັນຊາດ - ປ້ອງກັນຄວາມສະຫງົບໄດ້ມີການປັບປຸງ, ເຕີບໃຫຍ່ເຂັ້ມແຂງ ແລະ ທັນສະໄໝເປັນກ້າວໆ. ບົດສະຫຼຸບຍັງໄດ້ຍົກໃຫ້ເຫັນຈຸດດີ, ຈຸດອ່ອນ, ຂໍ້ບົກຜ່ອງ ໂດຍສະເພາະແມ່ນວຽກງານຮັບປະກັນເຮັດໃຫ້ສະພາບມີຄວາມສະຫງົບ, ວຽກງານປັບປຸງກໍ່ສ້າງກໍາລັງ, ວຽກງານພະລາທິການ - ເຕັກນິກ ແລະ ວຽກງານພົວພັນຕ່າງປະເທດເຫຼົ່ານີ້ເປັນຕົ້ນ ຊຶ່ງຈະຕ້ອງໄດ້ພ້ອມກັບປັບປຸງແກ້ໄຂໃນຕໍ່ໜ້າໃຫ້ນັບມື້ດີຂຶ້ນ. ໃນໂອກາດນີ້ ທ່ານ ພົນເອກ ຈັນສະໝອນ ຈັນຍາລາດ ກໍໄດ້ຮຽກຮ້ອງ ແລະ ເນັ້ນໃຫ້ທັງສອງກໍາລັງສືບຕໍ່ຈັດຕັ້ງປະຕິບັດແນວທາງ ປ້ອງກັນຊາດ - ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ, ໃຫ້ເລິກເຊິ່ງ ແລະ ກວ້າງຂວາງ, ສົມທົບກັບວຽກງານປ້ອງກັນຊາດ - ປ້ອງກັນຄວາມສະຫງົບ ກັບການພັດທະນາເສດຖະກິດ - ສັງຄົມ ແລະ ການພົວພັນຮ່ວມມືກັບຕ່າງປະເທດຢ່າງກົມກຽວ, ເພື່ອຮັບປະກັນໃຫ້ທັງ 3 ແຂວງ, ນະຄອນຫຼວງ ແລະ ບັນດາແຂວງໃກ້ຄຽງ ມີຄວາມສະຫງົບປອດໄພໂດຍສຸມໃສ່ສ້າງບ້ານປ້ອມໝັ້ນ, ກຸ່ມບ້ານສູ້ຮົບຕິດລຽນ, ຕິດພັນກັບການສ້າງ - ກຸ່ມບ້ານພັດທະນາຮອບດ້ານ, ພ້ອມກັນນັ້ນກໍຕ້ອງປັບປຸງກໍ່ສ້າງກໍາລັງປ້ອງກັນຊາດ - ປ້ອງກັນຄວາມສະຫງົບ ໃຫ້ມີຄວາມເຂັ້ມແຂງ-ໜັກແໜ້ນ, ເປັນກໍາລັງຈົ່ງຮັກພັກດີ, ມີຄວາມສາມາດ, ມີຈັນຍາທໍາ, ຈັນຍາ ບັນໃນການເຮັດໜ້າທີ່ວຽກງານ, ໄປພ້ອມກັນນັ້ນກໍຕ້ອງບໍາລຸງກໍ່ສ້າງກໍາລັງກອງຫຼອນ, ປ້ອງກັນຄວາມສະຫງົບບ້ານ ແລະ ກໍາລັງປ້ອງກັນຕົວຢູ່ບັນດາສໍານັກງານ - ອົງການ, ບໍລິສັດລັດວິສາຫະກິດ ທົ່ວທັງ 3 ແຂວງ ແລະ ນະຄອນຫຼວງ. ຮັກສາແໜ້ນຄວາມສາມັກຄີເປັນເອກະພາບພາຍໃນພັກ - ລັດ, ປະຊາຊົນບັນດາເຜົ່າ ແລະ ກໍາລັງປະກອບອາວຸດໃຫ້ແໜ້ນແຟ້ນ, ເປັນເຈົ້າການຕ້ານ ແລະ ທັບມ້າງທຸກຮູບການແຊກແຊງເຄື່ອນໄຫວມ້າງເພທໍາລາຍ ຂອງພວກອິດທິກໍາລັງປໍລະປັກ ແລະ ກຸ່ມຄົນທີ່ບໍ່ຫວັງດີໃຫ້ປະລາໄຊລົງ. (ພາບ: ວັນນະແສງ ຄຸນທະຈັກ, ຂໍ້ມູນ: ສົມພອນ ສຸວັນທອນ)