ຮອງປະທານສະພາແຫ່ງຊາດ ຕ້ອນຮັບຄະນະຜູ້ແທນກຳປູເຈຍ


...

01.04.2019 9:49     

   ທ່ານ ແສງນວນ ໄຊຍະ ລາດ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ນິນ ສຸພົນ ສະມາຊິກສະພາແຫ່ງຊາດ ປະທານກໍາມາທິການ ທີ 9 ສະພາແຫ່ງ ຣາຊະອານາຈັກ ກໍາປູ ເຈຍ ພ້ອມດ້ວຍຄະນະ ໃນວັນທີ 28 ມີນາຜ່ານມາ ທີ່ສະພາ ແຫ່ງຊາດ; ໃນໂອກາດເດີນທາງມາ ຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງ ວັນທີ 27-30 ມີນາ ຜ່ານມາ. ໃນໂອກາດດັ່ງກ່າວ, ທ່ານ ຮອງປະທານສະພາແຫ່ງຊາດ, ໄດ້ສະແດງຄວາມຕ້ອນຮັບ ຊົມເຊີຍ ແລະ ຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ນາງ ນິນ ສຸພົນ ພ້ອມດ້ວຍຄະນະ, ຊຶ່ງເປັນການປະກອບສ່ວນຈັດຕັ້ງຜັນຂະຫຍາຍຜົນສໍາເລັດຂອງການພົບປະການນໍາສູງສຸດ ຂອງສະພາແຫ່ງຊາດ ສປປລາວ ແລະ ສະພາແຫ່ງຊາດ ແຫ່ງຣາຊະອານາຈັກກໍາປູເຈຍ ທີ່ຜ່ານມາ ແລະ ທັງເປັນການປະກອບສ່ວນສໍາຄັນເຂົ້າໃນການເສີມສ້າງສາຍພົວພັນມິດຕະພາບ ຖານບ້ານໃກ້ເຮືອນຄຽງ ທີ່ເປັນມູນເຊື້ອ ລະຫວ່າງ ສປປ ລາວ ແລະ ຣາຊະອານາຈັກກໍາປູເຈຍ ກໍຄື ການພົວພັນຮ່ວມມື ລະຫວ່າງ ສອງອົງການນິຕິບັນຍັດ ເວົ້າລວມ,ເວົ້າສະເພາະ ການພົວພັນ ລະຫວ່າງສອງກໍາມາທິການ ໃຫ້ມີບັນຍາກາດອັນໃໝ່ ແລະ ນັບມື້ນັບດີຂຶ້ນ. ໃນໂອກາດນີ້, ທ່ານ ນາງ ນິນ ສຸພົນ ໄດ້ຕາງໜ້າໃຫ້ກັບຄະນະ ສະແດງຄວາມຂອບໃຈຕໍ່ທ່ານ ຮອງປະທານສະພາແຫ່ງຊາດ ທີ່ໃຫ້ການຕ້ອນຮັບອັນອົບອຸ່ນໃນຄັ້ງນີ້ອີກດ້ວຍ. ໃນວັນດຽວກັນ ທີ່ສະ ພາແຫ່ງຊາດ, ກໍໄດ້ມີການ ພົບປະສອງຝ່າຍ, ຊຶ່ງຈຸດປະ ສົງ ເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບ,ຄວາມສາມັກຄີ ແລະ ການຮ່ວມມື ຖານບ້ານໃກ້ເຮືອນຄຽງ ທີ່ເປັນມູນເຊື້ອອັນດີງາມມາແຕ່ບູຮານນະການ ລະຫວ່າງ ສອງຊາດ ລາວ-ກໍາປູເຈຍ ເວົ້າລວມ,ເວົ້າສະເພາະ ລະຫວ່າງ ສອງກຳມາທິການ ກໍຄື ສອງສະພາແຫ່ງຊາດ ໃຫ້ນັບມື້ນັບດີຍິ່ງໆຂຶ້ນ ເພື່ອປະຕິບັດຕາມບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມື ລະຫວ່າງ ສະພາແຫ່ງຊາດລາວ-ສະພາແຫ່ງຊາດ ກໍາປູເຈຍ; ຝ່າຍລາວ ນໍາໂດຍ ທ່ານ ບຸນປອນ ສີສຸລາດ ປະທານກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ, ຝ່າຍ ຣາຊະອານາຈັກກໍາປູເຈຍ ນໍາໂດຍ ທ່ານ ນາງ ນິນ ສຸພົນ ສະມາຊິກສະພາແຫ່ງຊາດ ປະທານກໍາມາທິການທີ 9 ຂອງສະພາແຫ່ງຊາດ ແຫ່ງຣາຊະອານາຈັກກໍາປູເຈຍ ພ້ອມດ້ວຍຄະນະ; ໃນໂອກາດນີ້ ຕ່າງຝ່າຍ ກໍໄດ້ລາຍງານ ການເຄື່ອນໄຫວວຽກງານໃຫ້ກັນ ແລະ ກັນຊາບ. ທ່ານບຸນປອນ ສີສຸລາດ ກ່າວວ່າ: ເພື່ອສືບຕໍ່ຮ່ວມມື ລະຫວ່າງ ກໍາມາທິການທັງສອງ ສະເໜີທິດທາງດັ່ງຕໍ່ໄປນີ້: ໃຫ້ສືບຕໍ່ແລກປ່ຽນຄະນະຜູ້ແທນນໍາກັນ ເພື່ອຢ້ຽມຢາມ ແລະຖອດຖອນບົດຮຽນນໍາກັນ ໂດຍສະເພາະຂັ້ນກໍາມາທິການສອງຝ່າຍ; ສະເໜີໃຫ້ກໍາມາທິການ ຊຸກຍູ້ໃຫ້ລັດຖະບານຂອງຕົນ ສືບຕໍ່ຈັດຕັ້ງປະຕິບັດ ບັນດາສັນຍາ,ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືທີ່ສອງລັດຖະບານ ໄດ້ລົງນາມຮ່ວມ ໃຫ້ເປັນຮູບປະທໍາ ແລະ ມີປະສິດທິຜົນດີກວ່າເກົ່າ ເປັນຕົ້ນ: ຊຸກຍູ້ໃຫ້ ສອງລັດຖະບານສໍາເລັດການປະຕິບັດ ສັນຍາ ຊື້-ຂາຍໄຟຟ້ານໍາກັນ, ຊຸກຍູ້ໃຫ້ການກໍ່ສ້າງຂົວຂ້າມ ເຊລໍາເພົາ ແລະ ເສັ້ນທາງເຊື່ອມຕໍ່ຮ່ວມກັນ ລະຫວ່າງ ສອງລັດຖະບານ ໃຫ້ປະກົດຜົນເປັນຈິງ, ສະໜັບສະໜູນ ແລະ ອໍານວຍຄວາມສະດວກ ໃຫ້ປະຊາຊົນສອງຊາດ ຕາມຊາຍແດນ ໄປ-ມາຫາສູ່ກັນ, ຮ່ວມມືແລກປ່ຽນຄ້າຂາຍ ນໍາກັນ ໃຫ້ນັບມື້ຂະຫຍາຍຕົວຍິ່ງໆຂຶ້ນ; ສະເໜີໃຫ້ມີການແລກປ່ຽນຂໍ້ມູນຂ່າວສານນໍາກັນ ກ່ຽວກັບການຕິດຕາມກວດກາ, ການສ້າງ ແລະ ປັບປຸງກົດໝາຍ ກໍຄື ການຝຶກອົບຮົມ ໃຫ້ບຸກຄະລາກອນ ໃນຫົວຂໍ້ຕ່າງໆ ທີ່ຕ່າງຝ່າຍໃຫ້ຄວາມສົນໃຈ ແລະ ສະເໜີ ເພີ່ມທະວີການສະໜັບສະໜູນ ແລະ ການຊ່ວຍເຫຼືອຊຶ່ງກັນ ແລະ ກັນ ໃນເວທິພາກພື້ນ ແລະ ສາກົນ. (ຂ່າວ: ແສງຈັນ)