ກະຊວງການເງິນ ປະຕິບັດນະໂຍບາຍ ອຸດໜູນ ບຳນານ ແລະ ປະກາດແຕ່ງຕັ້ງບາງກົມ


...

02.04.2019 9:04     

   ໃນວັນທີ 29 ມີນາ ຜ່ານມາ ທີ່ກະຊວງການເງິນ, ໄດ້ຈັດພິທີປະກາດການຈັດຕັ້ງປະຕິບັດນະໂຍບາຍຕໍ່ພະນັກງານຂັ້ນຄະນະນຳກະຊວງການເງິນອອກພັກການ-ຮັບການອຸດໜູນບໍານານ ແລະ ປະກາດການຈັດຕັ້ງຂັ້ນຫົວໜ້າກົມ, ຮັກສາການຫົວໜ້າກົມ, ຮອງຫົວໜ້າກົມ, ຮອງຫົວໜ້າຫ້ອງ ການກະຊວງການເງິນ; ພາຍໃຕ້ການເປັນປະທານຂອງທ່ານ ສົມດີ ດວງດີ ຮອງນາຍົກ ລັດຖະມົນຕີ ລັດຖະມົນຕີກະຊວງການເງິນ, ມີຫົວໜ້າຫ້ອງການກະຊວງ, ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກອ້ອມຂ້າງກະຊວງການເງິນ ພ້ອມດ້ວຍພະນັກງານຫຼັກແຫຼ່ງຂະແໜງການເງິນເຂົ້າຮ່ວມ. ໂອກາດດັ່ງກ່າວ,ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໄດ້ຜ່ານດໍາລັດຂອງນາຍົກລັດຖະມົນຕີ ສະບັບເລກທີ 38/39/40/07/ນຍ, ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອຸດໜູນບໍານານຈໍານວນ 4 ທ່ານ, ປະກອບມີ ທ່ານ ສີລາ ວຽງແກ້ວ ກໍາມະການຄະນະພັກກະຊວງ ຮອງລັດຖະມົນຕີກະຊວງການເງິນ, ທ່ານ ຄຸນຍົນ ຄໍາມະນີ ກຳມະການປະຈໍາພັກກະຊວງ ຫົວໜ້າກົມຈັດຕັ້ງ ແລະ ພະນັກງານ, ທ່ານ ສັງວອນ ພັນທະວິໄລ ກໍາມະການຄະນະພັກກະຊວງ, ຫົວໜ້າກົມງົບປະມານແຫ່ງລັດ, ທ່ານ ຈັນທະສິດ ເສນາພັນ ຫົວໜ້າກົມບັນຊີ ກະຊວງການເງິນ ແລະ ອີງຕາມດໍາລັດຂອງນາຍົກລັດຖະມົນຕີ ເລກທີ 348/ນຍ, ວ່າດ້ວຍການແຕ່ງຕັ້ງຫົວໜ້າກົມບັນຊີ ກະຊວງການເງິນ, ແຕ່ງຕັ້ງ ທ່ານ ນາງ ດາວອນ ທອງຈັນ ເປັນຫົວໜ້າກົມບັນຊີ ກະຊວງການເງິນ. ພ້ອມດຽວກັນນີ້, ຍັງໄດ້ປະກາດແຕ່ງຕັ້ງຜູ້ຮັກສາການຊົ່ວຄາວຂັ້ນຫົວໜ້າກົມ, ອີງຕາມຂໍ້ຕົກລົງຂອງກະຊວງການເງິນ ສະບັບເລກທີ 0829/0830/0869/ກງ. ໂດຍໄດ້ແຕ່ງຕັ້ງ ທ່ານ ອຸໄທ ອິນທິລາດ ຮອງຫົວໜ້າກົມຈັດຕັ້ງ ແລະ ພະນັກງານ ເປັນຜູ້ຮັກສາການຊົ່ວຄາວຫົວໜ້າກົມຈັດຕັ້ງ ແລະ ພະນັກງານ, ແຕ່ງຕັ້ງ ທ່ານ ພູວົງ ກິດຕະວົງ ຮອງຫົວໜ້າກົມງົບປະມານແຫ່ງລັດ ເປັນຮັກສາການຊົ່ວຄາວຫົວໜ້າກົມງົບປະມານແຫ່ງລັດ, ແຕ່ງຕັ້ງ ທ່ານ ນາງ ຄໍາຂວັນ ສີຊານົນ ຫົວໜ້າພະແນກ ແຜນ ການ ແລະ ການເງິນ ຫ້ອງ ການກະຊວງ ເປັນຮອງຫົວໜ້າຫ້ອງການກະຊວງການເງິນ ແລະ ອີງຕາມຂໍ້ຕົກລົງຂອງກະຊວງການເງິນ ສະບັບເລກທີ 0691/0828/ກງ, ວ່າດ້ວຍການຍົກຍ້າຍແຕ່ງຕັ້ງພະນັກງານໄປຮັບໜ້າທີ່ໃໝ່ຢູ່ກົມສະສົມແຫ່ງລັດ, ເຫັນດີຍົກຍ້າຍ ແລະ ແຕ່ງຕັ້ງທ່ານ ສໍາເພົາ ເລົາສີ ຮອງຫົວໜ້າຫ້ອງການກະຊວງການເງິນ ເປັນຮອງຫົວໜ້າກົມ ສະສົມແຫ່ງລັດ, ຍົກຍ້າຍ ແຕ່ງ ຕັ້ງທ່ານ ນາງ ພິລານີ ພິດສະ ໄໝ ຮັກສາການຫົວໜ້າກົມ ບັນຊີ ເປັນຮອງຫົວໜ້າກົມນະ ໂຍບາຍການເງິນ ແລະ ນິຕິກໍາ ກະຊວງການເງິນ, ອີງຕາມມະຕິຕົກລົງຂອງຄະນະບໍລິຫານງານພັກກະຊວງການເງິນ ສະບັບເລກທີ 029/ຄລພ.ກງ, ລົງວັນທີ 18 ມີນາ 2019 ວ່າດ້ວຍການບົ່ງຕົວແຕ່ງຕັ້ງເລຂາໜ່ວຍພັກກົມບັນຊີເຫັນດີບົ່ງຕົວແຕ່ງຕັ້ງສະຫາຍ ນາງ ດາວອນ ທອງຈັນ ເປັນເລຂາໜ່ວຍພັກກົມບັນຊີ ນຳອີກດ້ວຍ. ໂອກາດນີ້, ທ່ານ ສົມດີ ດວງດີ ໄດ້ໃຫ້ກຽດໂອ້ລົມຕໍ່ ພະນັກງານທີ່ໄດ້ອອກພັກ ການ-ຮັບອຸດໜູນບໍານານ ແລະ ການແຕ່ງຕັ້ງໜ້າທີ່ໃໝ່ຈໍານວນໜຶ່ງ, ກ່ອນອື່ນທ່ານ ໄດ້ສະແດງຄວາມຂອບໃຈ, ຮູ້ບຸນຄຸນ ແລະ ຊົມເຊີຍທັງ 4 ທ່ານ, ຊຶ່ງແຕ່ລະທ່ານເປັນພະນັກງານນໍາພາຄຸ້ມຄອງທີ່ສໍາຄັນ ທີ່ໄດ້ຮັບນະໂຍບາຍອຸດໜູນບໍານານກໍ່ຄືນະໂຍບາຍຂອງພັກ-ຂອງລັດ ແລະ ກໍມີຜົນສໍາເລັດໃນການປະຕິບັດໜ້າທີ່ການເມືອງໃນການປະຈໍາການ ແລະ ແຕ່ລະທ່ານກໍແມ່ນມີບົດຮຽນຫຼາຍໃນການປະຕິບັດວຽກງານໃນຫຼາຍປີພໍສົມຄວນ ແລະ ຂັ້ນເທິງກໍໄດ້ຕົກລົງເຫັນດີໃຫ້ພັກຜ່ອນຮັບບໍານານຕາມລະບຽບການຕາມອາຍຸການຂອງແຕ່ລະທ່ານ. (ຂ່າວ-ພາບ: ກະຊວງການເງິນ)