ໂຄງການລົດໄຟ ລາວ-ຈີນ ແຂວງຫຼວງນ້ຳທາ ສຳເລັດການຊົດເຊີຍໃຫ້ປະຊາຊົນ 144 ຄອບຄົວ


...

02.04.2019 9:03     

   ຄະນະທີມງານສື່ມວນຊົນສອງປະເທດ ລາວ-ຈີນ ພາຍໃຕ້ຫົວຂໍ້ "ມີເຈົ້າ ແລະ ຂ້ອຍ" ໃນໜຶ່ງແລວ ໜຶ່ງເສັ້ນທາງໄດ້ລົງເຄື່ອນໄຫວສຳພາດທ່ານ ທອງແດງ ສິດທິສົນ ຮອງເຈົ້າເມືອງຫຼວງນໍ້າທາ ຫົວໜ້າຄະນະໄກ່ເກ່ຍຜົນກະທົບເບີກຈ່າຍ ຄ່າຊົດເຊີຍໂຄງການກໍ່ສ້າງທາງລົດໄຟ ລາວ-ຈີນ. ໃນໄລຍະຜ່ານມາຢູ່ແຂວງຫຼວງນໍ້າທາເມື່ອວັນທີ 29 ມີນາຜ່ານມາ, ທີ່ສຳນັກງານປົກຄອງເມືອງຫຼວງນໍ້າທາ, ຊຶ່ງຄະນະ ທີມງານຝ່າຍລາວ ນຳໂດຍ ທ່ານ ສັງຂານ ຈູມຄຳພັນ ຮອງຫົວໜ້າຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດລາວ ແລະ ຝ່າຍຈີນນຳໂດຍ ທ່ານນາງ ແສງແກ້ວ ຕາງໜ້າວິທະຍຸສາກົນແຫ່ງປະເທດຈີນ (CRI ). ທ່ານ ທອງແດງ ສິດທິສົນ ໄດ້ເປີດເຜີຍຕໍ່ສື່ມວນຊົນລາວ-ຈີນກ່ຽວກັບການຈັດຕັ້ງປະຕິບັດວຽກງານໄກ່ເກ່ຍ, ຊົດເຊີຍ ແລະ ຍົກຍ້າຍຈັດສັນປະຊາຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນໃນຂອບເຂດຫຼວງນໍ້າທາ ຊຶ່ງມີປະຊາຊົນ 4 ບ້ານໄດ້ຮັບຜົນກະທົບຄື: ບ້ານບໍ່ເຕ່ນ, ບ້ານບໍ່ປຽກ, ບ້ານຕີນຕົກ ແລະ ບ້ານນາເຕີຍ ລວມທັງໝົດ 317 ຄອບຄົວລວມມູນຄ່າ 168 ຕື້ກວ່າກີບ, ມາຮອດປັດຈຸບັນແຂວງຫຼວງນໍ້າທາໄດ້ຮັບງົບປະມານຈາກໂຄງການທາງລົດໄຟ ລາວ-ຈີນ ຈຳກັດ 3 ງວດຈຳນວນ 83 ຕື້ກວ່າກີບໂດຍໄດ້ເບີກຈ່າຍໃຫ້ປະຊາຊົນຜູ້ທີ່ໄດ້ຮັບຜົນກະທົບຈຳນວນ 144 ຄອບຄົວມູນຄ່າ 76 ຕື້ກວ່າກີບ ເທົ່າກັບ 47% ສຳລັບຄອບຄົວທ່ີຍັງເຫຼືອ ມີແຜນຈະຊົດເຊີຍຕື່ມອີກ. ທ່ານ ໄດ້ກ່າວໃຫ້ຮູ້ຕື່ມອີກວ່າ: ໂຄງການກໍ່ສ້າງເສັ້ນທາງລົດໄຟ ລາວ-ຈີນໄດ້ເລີ່ມແຕ່ບໍ່ເຕ່ນ(ຊາຍແດນລາວ-ຈີນ) ຫານະຄອນຫຼວງວຽງຈັນ ມີຄວາມຍາວທັງໝົດ 409 ກິໂລແມັດ,ຊຶ່ງແລວທາງລົດໄຟໄດ້ຜ່ານແຂວງຫຼວງນໍ້າທາ 16,9 ກິໂລແມັດ, ໃນນີ້ປະກອບມີ 2 ສະຖານີຄື: ສະຖານີບໍ່ເຕ່ນເປັນສະຖານີນ້ອຍສຳລັບໂດຍສານ ແລະ ສະຖານີນາເຕີຍ ເປັນສະຖານີໃຫຍ່ສຳລັບຄ່ຽນຖ່າຍສິນຄ້າ, ໃນນີ້ກໍ່ສ້າງຂົວໃຫຍ່ຈໍານວນ 7 ແຫ່ງ ແລະ ເຈາະອຸໂມງ 3 ແຫ່ງຄື: ອຸໂມງມິດຕະພາບລາວ-ຈີນ, ອຸໂມງບໍໍ່ເຕ່ນ, ອຸໂມງຕີນຕົກ. ປັດຈຸບັນອຸໂມງບໍ່ເຕ່ນ ແລະ ອຸໂມງຕີນຕົກໄດ້ສຳເລັດການຂຸດເຈາະເປັນທີ່ຮຽບຮ້ອຍແລ້ວ ສ່ວນວ່າອຸໂມງມິດຕະພາບລາວ-ຈີນ ແມ່ນຢູ່ໃນຂັ້ນຕອນການອອກແບບກໍ່ສ້າງໃໝ່ ເນື່ອງຈາກວ່າການຂຸດເຈາະໄດ້ໄປຖືກສາຍນ້ຳເກືອຈຶ່ງໄດ້ອອກແບບໃໝ່ ເພື່ອໃຫ້ແທດເໝາະກັບສະພາບຄວາມເປັນຈິງ. ນອກຈາກນັ້ນທາງຜູ້ຮັບເໝົາຍັງໄດ້ສຳເລັດການກໍ່ສ້າງ ເສົາຂົວ ແລະ ບຸກເບີກເນື້ອທີ່ດິນຢູ່ເຂດ ເສດຖະກິດສະເພາະບໍເຕ່ນແດນງາມ.ສຳລັບຢູ່ສະຖານນີນາເຕີຍກຳລັງກະກຽມເນື້ອທີ່ບຸກເບີກເພື່ອກໍ່ສ້າງເສົາຂົວ. ໃນວັນດຽວກັນສື່ມວນຊົນ ລາວ-ຈີນໄດ້ລົງເຄື່ອນໄຫວຢ້ຽມຢາມໂຮງງານປຸງແຕ່ງໂຄງປະກອບເຫຼັກກ້າ ຂອງກຸ່ມບໍລິສັດກໍ່ສ້າງທາງລົດໄຟເລກ 5 ສປ ຈີນ ເພື່ອຮັບໃຊ້ການກໍ່ສ້າງທາງລົດໄຟລາວ-ຈີນ ໄລຍະທີ 1 ບໍ່ເຕ່ນ-ອຸດົມໄຊ. ໂຮງງານແຫ່ງນີ້ໄດ້ປຸງແຕ່ງໂຄງເຫຼັກເຈາະອຸໂມງ, ແມ່ແບບຫຼໍ່ເສົາ, ຂົວ ແລະ ອື່ນໆ. (ຂ່າວ-ພາບ: ພູວັນ)