ຮອງນາຍົກເນັ້ນ ປທສ ຂະຫຍາຍການບໍລິການ ໄອຊີທີ ເພື່ອຂັບເຄື່ອນການພັດທະນາ


...

03.04.2019 9:18     

   ທ່ານ ຮອງນາຍົກ ເນັ້ນໃຫ້ກະຊວງໄປສະນີ, ໂທລະຄົມ ມະນາຄົມ ແລະ ການສື່ສານ (ປທສ) ເອົາໃຈໃສ່ຫຼາຍບັນຫາ ໂດຍສະເພາະແມ່ນການຂະ ຫຍາຍການບໍລິການດ້ານໄອຊີທີໃຫ້ກວ້າງຂວາງ ເພື່ອຮັບໃຊ້ໃຫ້ແກ່ການພັດທະນາເສດຖະກິດ-ສັງຄົມ, ຫັນເປັນທັນສະໄໝດ້ວຍມາດຕະຖານສູງ. ກອງປະຊຸມວຽກງານຂະ ແໜງການໄປສະນີ, ໂທລະຄົມ ມະນາຄົມ ແລະການສື່ສານ ປີ 2018 ໄດ້ປິດລົງໃນວັນທີ 2 ເມສາ ທີ່ສູນການຮ່ວມມືສາ ກົນ ແລະ ຝຶກອົບຮົມລາວ-ຢີ່ປຸ່ນ, ໂດຍມີ ທ່ານ ສົມດີ ດວງດີ ຮອງນາຍົກ ລັດຖະມົນຕີ, ລັດ ຖະມົນຕີກະຊວງການເງິນ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ທັນສະໄໝ ກົມມະສິດ ລັດຖະມົນຕີກະຊວງ ປທສ ໄດ້ລາຍງານຜົນຂອງກອງປະຊຸມວຽກງານຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ ໃນປີ 2018 ແລະ ທິດທາງແຜນການ ປະຈຳປີ 2019 ຊຶ່ງຈະໄດ້ສືບຕໍ່ຈັດຕັ້ງຜັນຂະຫຍາຍແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມ ໃຫ້ເປັນອັນລະອຽດ ໃນຂົງເຂດໄປສະນີ, ໂທລະຄົມມະນາຄົມ ແລະ ການສື່ສານ ເພື່ອເຮັດໃຫ້ວຽກງານດັ່ງກ່າວ ກາຍເປັນກຳລັງຂັບເຄື່ອນທີ່ແຂງແຮງ ເຂົ້າໃນການພັດທະນາເສດຖະກິດ, ສັງຄົມ, ວັດທະນະທຳ, ສິ່ງແວດລ້ອມ, ວຽກງານປ້ອງກັນຊາດ ແລະ ປ້ອງກັນຄວາມສະຫງົບ, ການເຊື່ອມໂຍງກັບພາກພື້ນ ແລະ ສາກົນ. ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ກອງປະຊຸມ ຊຶ່ງທ່ານໄດ້ສະແດງຄວາມຍ້ອງຍໍ, ຊົມເຊີຍ ຕໍ່ຄໍາຂວັນຂອງກອງປະຊຸມ ໃນຫົວຂໍ້: "ສົ່ງເສີມ ແລະ ຫັນການຄຸ້ມຄອງລັດດ້ວຍລະບົບດີຈິຕອນ" ທີ່ສ່ອງແສງເຖິງຄວາມຮັບຜິດຊອບ ຂອງທຸກ ຂະແໜງການ ຕໍ່ວຽກງານໄອຊີທີ ແລະ ສຸມໃສ່ ຈັດຕັ້ງປະຕິບັດແຜນພັດທະນາຂະແໜງ ປທສ 5 ປີ ຄັ້ງທີ II (2016-2020) ດ້ວຍບັນຍາກາດຄຶກຄື້ນ ແລະ ມີຜົນສຳເລັດຢ່າງໜ້າເພິ່ງພໍໃຈຫຼາຍປະການ. ທ່ານກ່າວອີກວ່າ: ການນໍາໃຊ້ ລະບົບເຕັກໂນໂລຊີການສື່ສານ-ຂໍ້ມູນຂ່າວສານ (ICT) ໄດ້ກາຍເປັນ ຄວາມຈຳເປັນສຳລັບທຸກກະຊວງ ແລະ ຂະແໜງການ ຢ່າງຫຼີກລຽງບໍ່ໄດ້. ດັ່ງນັ້ນ, ການສ້າງລັດເອເລັກໂຕຣນິກຂະແໜງການຕົນ ຈຶ່ງສະທ້ອນໃຫ້ເຫັນຄວາມເອົາໃຈໃສ່ ຢ່າງຈິງຈັງ ຂອງ ຄະນະພັກ, ຄະນະນຳ ຂະແໜງການນັ້ນໆ ເພື່ອຍົກສູງຄຸນນະພາບ ແລະ ຄວາມໂປ່ງໃສ, ໂດຍສະເພາະ ຂະແໜງເສດຖະກິດ ເຊັ່ນ : e-commerce, e-tax, e-payment ລວມທັງ education. ສະນັ້ນ, ບັນດາກະຊວງ ແລະ ຂະແໜງການ ຕ້ອງຮ່ວມມືກັບ ກະຊວງ ປທສ ນຳໃຊ້ພື້ນຖານໂຄງລ່າງ ຮ່ວມກັນ ເພື່ອຫຼີກລຽງການລົງທຶນຊ້ຳຊ້ອນ ແລະ ປົກປ້ອງຂໍ້ມູນຂ່າວສານຂອງບັນດາກະຊວງ ແລະ ຂະແໜງການ ເປັນຕົ້ນແມ່ນ ສະກັດກັ້ນການທຳລາຍ, ການໂຈລະກຳຂໍ້ມູນຂ່າວສານ, ສະກັດກັ້ນຂໍ້ມູນທີ່ເປັນໄພຕໍ່ຄວາມໝັ້ນຄົງຂອງຊາດ, ກະຊວງ ປທສ ກໍໄດ້ສ້າງໃຫ້ ສປປ ລາວ ມີສູນຂໍ້ມູນຂ່າວສານ ແລະ ສູນຄຸ້ມຄອງລະຫັດຄວາມປອດໄພແຫ່ງຊາດ ເພື່ອເປັນບ່ອນຮັບຝາກຂໍ້ມູນເອເລັກໂຕຼນິກ. ສະນັ້ນ, ກະຊວງ ປທສ ໃນຖານະເປັນຜູ້ຄຸ້ມຄອງມະຫາພາກ ແລະ ເປັນໃຈກາງໃນການປະສານງານ ແລະ ຮ່ວມມື ຂອງພາກສ່ວນຕ່າງໆ ຈະຕ້ອງມີແຜນການ, ໂຄງການລະອຽດ ເພື່ອຈັດຕັ້ງປະຕິບັດ ແລະ ເອົາໃຈໃສ່ເປັນພິເສດ ໃນການຫັນເປັນທັນສະໄໝ ຍົກສູງປະສິດທິຜົນໃນການໃຫ້ການບໍລິຫານ, ການໃຊ້ບໍລິການ. ທ່ານຍັງໄດ້ເນັ້ນໜັກໃຫ້ ຂະແໜງການ ປທສ ສືບຕໍ່ ຍົກສູງພາລະບົດບາດການຄຸ້ມຄອງມະຫາພາກ ແລະ ຄຸ້ມຄອງໂຄງລ່າງເຕັກນິກ, ໂດຍສະເພາະ ວິໄສທັດຮອດປີ 2030, ແຜນຍຸດທະສາດຮອດປີ 2025 ແລະ ແຜນພັດທະນາ 5 ປີ 2016-2020 ຊຶ່ງປະຕິບັດມາແລ້ວ 3 ປີ ໃຫ້ບັນລຸຕາມຄາດໝາຍທີ່ວາງໄວ້. ເອົາໃຈໃສ່ໂຄສະນາເຜີຍແຜ່ກົດໝາຍ, ນິຕິກຳລຸ່ມກົດໝາຍ ດ້ານໄປສະນີ, ໂທລະຄົມມະນາຄົມ ແລະ ອິນເຕີເນັດໃຫ້ຄົບຊຸດ ຄຽງຄູ່ກັບການປັບປຸງ ແລະ ສ້າງກົດໝາຍໃໝ່ໃຫ້ທັນກັບສະພາບ, ສືບຕໍ່ ສ້າງ ແລະ ປັບປຸງພື້ນຖານໂຄງລ່າງ ເຕັກນິກໃຫ້ສະຖຽນ, ຄວາມໄວສູງ ແລະ ປອດໄພ ຮອງຮັບເຕັກໂນໂລຊີໃໝ່ ເປັນຕົ້ນ: ຂໍ້ມູນໃຫຍ່ (Bigdata), ບລ໊ອກເຊນ (Block Chain), 5G ເພື່ອກະຕຸ້ນການນໍາໃຊ້ທີ່ເປັນປະໂຫຍດໃຫ້ກວ້າງຂວາງ ແລະ ທົ່ວເຖິງ ແຕ່ສູນກາງຮອດທ້ອງຖິ່ນ, ເຂດຫ່າງໄກສອກຫຼີກ, ໂດຍສະເພາະ ເຂດຈຸດສຸມພັດທະນາຂອງລັດຖະບານ, ເປັນຈຸດເຊື່ອມໂຍງກັບພາກພື້ນ ແລະ ສາກົນ ຕາມນະໂຍບາຍຫັນເປັນປະເທດບໍລິການທາງຜ່ານ, ຄຸ້ມຄອງຄື້ນຄວາມຖີ່ວິທະຍຸສື່ສານໃຫ້ເຂັ້ມງວດ ບໍ່ໃຫ້ມີຄື້ນແຊກແຊງຈາກຕ່າງປະເທດ ທີ່ເຮັດໃຫ້ລັດສູນເສຍລາຍຮັບ, ເອົາໃຈໃສ່ຊຸກຍູ້ບັນດາບໍລິສັດ ລັດວິສາຫະກິດ ຍົກລະດັບ, ຂະຫຍາຍເຄືອຂ່າຍເຕັກນິກ, ລະບົບການບໍລິການ ທີ່ມີຄວາມອາດສາມາດແຂ່ງຂັນກັນສູງຂຶ້ນ ໃຫ້ສາມາດຂະຫຍາຍທຸລະກິດໄປຕ່າງປະເທດໃນອານາຄົດ ໂດຍສະເພາະ ແມ່ນການປະຕິບັດພັນທະໃນການປະກອບສ່ວນຢ່າງຕັ້ງໜ້າຕໍ່ພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ. ທ່ານ ຮອງນາຍົກ ເນັ້ນຕື່ມວ່າ: ໃຫ້ເອົາໃຈໃສ່ເປັນພິເສດໃນການສ້າງບຸກຄະລາກອນ ໃຫ້ມີຄວາມຮູ້ໃນການນໍາໃຊ້ອຸປະກອນເອເລັກໂຕຣນິກ ໃຫ້ທັນກັບການຂະຫຍາຍຕົວຂອງ ICT ແລະ ເປັນເຈົ້າການໃນການໂຄສະນາເຜີຍແຜ່ວິທີນຳໃຊ້ທີ່ເປັນປະໂຫຍດ ໂດຍສະເພາະການນຳໃຊ້ສື່ສັງຄົມອອນລາຍ ຄຽງຄູ່ກັບມາດຕະການແກ້ໄຂ ປະກົດການຫຍໍ້ທໍ້. ບັນດາຜູ້ປະກອບການຕ້ອງໄດ້ເອົາໃຈໃສ່ປະຕິບັດກົດໝາຍ ແລະ ລະບຽບການຕ່າງໆຢ່າງເຂັ້ມງວດ ເປັນຕົ້ນການປະຕິບັດພັນທະຕໍ່ລັດຖະບານ, ການຂະຫຍາຍເຄືອຂ່າຍຄວບຄຸມໄປສູ່ເຂດຊົນນະບົດ ຕາມທິດຊີ້ນຳຂອງລັດຖະບານ, ສ້າງເງື່ອນໄຂຫັນເປັນທັນສະໄໝດ້ວຍມາດຕະຖານສູງ ເພື່ອໃຫ້ການບໍລິການແກ່ສັງຄົມສະດວກ, ວ່ອງໄວ, ປອດໄພ, ທົ່ວເຖິງ, ມີຄຸນນະພາບສູງ ແລະ ລາຄາສົມເຫດສົມຜົນ, ເຊື່ອມໂຍງເຂົ້າກັບພາກພື້ນ ແລະ ສາກົນ ໄດ້ຢ່າງມີປະສິດທິພາບ ພ້ອມທັງຍົກສູງບົດບາດ ສະມາຄົມ ໄອຊີທີ ໃນການເຕົ້າໂຮມກຸ່ມທຸລະກິດໄອຊີທີເຂົ້າຮ່ວມຂະບວນການສົ່ງເສີມການມີສ່ວນຮ່ວມລະຫວ່າງພາກລັດ ແລະ ເອກະຊົນ ຮ່ວມກັນສ້າງສິ່ງອໍານວຍຄວາມສະດວກໃຫ້ເກີດທຸລະກິດໃໝ່ (Startup) ແລະ SME, ຊຶ່ງແມ່ນນະໂຍບາຍໜຶ່ງທີ່ສໍາຄັນຂອງລັດຖະບານ ເພື່ອສະໜອງອຸປະກອນ ແລະ ການບໍລິການໃນລາຄາຖືກໃຫ້ແກ່ສັງຄົມ ໂດຍສະເພາະຢູ່ເຂດຊົນນະບົດຫ່າງໄກສອກຫຼີກ ແລະ ຊຸມຊົນທີ່ມີລາຍຮັບຕໍ່າ.(ພາບ-ຂ່າວ: ປທສ)