ການສ້າງນັກກວດສອບມືອາຊີບຍັງບໍ່ພຽງພໍກັບຄວາມຕ້ອງການ


...

03.04.2019 9:19     

   ໃນປີຜ່ານມາ ວຽກງານຈັດ ຕັ້ງ, ກໍ່ສ້າງພັກ-ພະນັກງານ ແລະ ກົງຈັກການຈັດຕັ້ງ ທົ່ວອົງ ການກວດສອບແຫ່ງລັດ, ມີຜົນ ສຳເລັດຫຼາຍດ້ານ ແຕ່ຍັງຕ້ອງໄດ້ເອົາໃຈໃສ່ວຽກງານບຳລຸງ- ກໍ່ສ້າງພະນັກງານກວດສອບ ໃຫ້ກາຍເປັນນັກກວດສອບມືອາຊີບ ເພື່ອຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນປັດຈຸບັນ. ກອງປະຊຸມວຽກງານຈັດຕັ້ງ, ກໍ່ສ້າງພັກ - ພະນັກງານ ແລະ ວຽກກົງຈັກການຈັດຕັ້ງ ທົ່ວອົງການກວດສອບແຫ່ງລັດ ໄດ້ຈັດຂຶ້ນໃນວັນທີ 2 ເມສາ ຜ່ານມາ ທີ່ຫ້ອງປະຊຸມໃຫຍ່ຂອງອົງການກວດສອບແຫ່ງລັດ ໂດຍການເປັນປະທານ ຂອງສະຫາຍ ນາງ ວຽງທອງ ສີພັນດອນ ກຳມະການສູນກາງພັກ ເລຂາຄະນະພັກ ປະທານອົງການກວດສອບແຫ່ງລັດ, ມີພາກສ່ວນກ່ຽວຂ້ອງເຂົ້າຮ່ວມ. ສະຫາຍ ວຽງຄຳ ສິມມະໄລວົງ ຮອງຫົວໜ້າກົມຈັດຕັ້ງ - ພະນັກງານໄດ້ຂຶ້ນຜ່ານບົດ ສະຫຼຸບຕີລາຄາສະພາບການ ຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ - ພະນັກງານ ແລະ ວຽກກົງຈັກການຈັດຕັ້ງ ປີ 2018 ແລະ ທິດທາງແຜນການປະຈຳປີ 2019 ຂອງອົງການກວດສອບແຫ່ງລັດ ຊຶ່ງມີບາງຕອນສຳຄັນວ່າ: ວຽກງານບຳລຸງ - ກໍ່ສ້າງພະນັກງານດ້ານ ວິຊາສະເພາະກວດສອບ ເພື່ອຫັນເປັນມືອາຊີບ ແມ່ນຖືວ່າບໍ່ສາມາດຕອບສະໜອງກັບຄວາມຮຽກຮ້ອງຕ້ອງການ ຂອງໜ້າທີ່ວຽກງານໄດ້, ການສ້າງນັກກວດສອບຂັ້ນ 1 ແລະ ຂັ້ນ 2 ບໍ່ໄດ້ຕາມແຜນ, ພະນັກງານຈຳນວນໜຶ່ງ ບໍ່ທັນບຸກບືນຮຽນຮູ້ ເພີ່ມຕື່ມເຊັ່ນ ດ້ານຄອມພິວເຕີ, ພາສາອັງກິດ ຫຼື ພາສາຕ່າງປະເທດໃດໜຶ່ງ. ສະຫາຍ ນາງ ວຽງທອງ ສີພັນດອນ ໄດ້ໂອ້ລົມຕໍ່ກອງປະຊຸມ ໂດຍເນັ້ນໃຫ້ເອົາໃຈໃສ່ການຊີ້ນຳໆພາວຽກງານການກໍ່ສ້າງພັກ - ພະນັກງານ, ສຶກສາອົບຮົມທາງດ້ານການເມືອງ - ແນວຄິດ, ດ້ານແບບແຜນການນຳພາ; ວຽກງານບໍາລຸງ - ຍົກລະດັບພະນັກງານທາງດ້ານທິດສະດີການເມືອງ - ການປົກຄອງ, ດ້ານວິຊາສະເພາະ ແລະ ການສັບຊ້ອນ - ຈັດວາງພະນັກງານ ທີ່ຕ້ອງໄດ້ສືບຕໍ່ເສີມຂະຫຍາຍ ແລະ ບັນຫາຂໍ້ຄົງຄ້າງທີ່ຕ້ອງໄດ້ເອົາໃຈໃສ່ປັບປຸງແກ້ໄຂຕໍ່ ໜ້າ ເພື່ອເຮັດໃຫ້ວຽກງານການຄຸ້ມຄອງພະນັກງານ, ການກໍ່ ສ້າງພັກ-ພະນັກງານ, ການປັບ ປຸງການຈັດຕັ້ງດຳເນີນໄປຢ່າງຄ່ອງຕົວ ແລະ ມີຜົນສຳເລັດດີ ຂຶ້ນກວ່າເກົ່າ ແນໃສ່ເຮັດໃຫ້ ການປັບປຸງກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ເພື່ອຍົກສູງຄວາມສາມາດໃນການນຳພາ ແລະ ລັກສະນະນຳ ໜ້າຂອງພັກ, ພັດທະນາວຽກງານກວດສອບໃຫ້ເຂັ້ມແຂງ ແລະ ໜັກແໜ້ນ. (ພາບ + ຂ່າວ: ສຸກສະຫວັນ)