ເຈົ້າແຂວງສະຫວັນນະເຂດ ພໍໃຈຕໍ່ຜົນຜະລິດເຂົ້ານາແຊງຂອງຊາວນາເມືອງໄຊບູລີ


...

03.04.2019 9:19     

   ທ່ານ ສັນຕິພາບ ພົມວິ ຫານ ເຈົ້າແຂວງສະຫວັນນະເຂດ ພໍໃຈຕໍ່ຜົນຜະລິດເຂົ້າ ນາແຊງຂອງຊາວນາຊາວກະ ສິກອນພາຍໃນເມືອງໄຊບູລີ ຊຶ່ງປະກົດວ່າໄດ້ຮັບໝາກຜົນຕາມທີ່ຄາດຄະເນ ອັນໄດ້ເຮັດໃຫ້ລາຄາເຂົ້ານາແຊງປີນີ້ສູງຂຶ້ນໃນກິໂລລະ 3.200 ກີບ ໃນຂະ ນະທີ່ປະຊາຊົນພວມຂຸ້ນຂ້ຽວເກັບກ່ຽວ ແລະມ້ຽນມັດເຂົ້ານາ ແຊງ ພ້ອມຂາຍໃຫ້ກັບໂຮງສີ ແລະພໍ່ຄ້ານີ້ແມ່ນການເປີດເຜີຍຂອງກຸ່ມຊາວນາເຂດບ້ານເວີນ ໃນໂອກາດທີ່ທ່ານ ສັນຕິພາບ ພົມວິຫານ ເຈົ້າແຂວໆສະຫວັນນະເຂດ ພ້ອມຄະນະລົງພົບປະໂອ້ລົມກຸ່ມຊາວນາກຸ່ມຜະລິດພາຍໃນເມືອງໄຊບູລີ ທີ່ວັດບ້ານເວີນ ໃນຕອນບ່າຍຂອງວັນທີ 27 ມີນາ ຜ່ານມາ.    ຕົວແທນກຸ່ມຊາວນາເຂດບ້ານເວີນໃຫ້ສໍາພາດວ່າ: ການຜະລິດເຂົ້ານາແຊງຂອງປະ ຊາຊົນໃນປີນີ້ປະກົດວ່າໄດ້ຮັບໝາກຜົນດີພໍສົມຄວນ ທັງໆທີ່ວ່າໃນທ້ອງຖິ່ນດັ່ງກ່າວເກີດປະສົບກັບໄພນໍ້າຖ້ວມໃນໄລຍະລະດູຝົນທີ່ຜ່ານມາ ແຕ່ເຖິງຢ່າງໃດກໍ່ດີອໍານາດການປົກ ຄອງເມືອງ ບວກກັບອໍານາດການປົກຄອງທ້ອງຖິ່ນ ແລະກຸ່ມການຜະລິດກໍ່ຄືຊາວນາກໍໄດ້ຕັດສິນໃຈສຸມທຸກກໍາລັງແຮງທັງທຶນຮອນພ້ອມກັນຟື້ນຟູການຜະລິດໃນເນື້ອທີ່ ໄດ້ຮັບຜົນກະ ທົບ ໂດຍມີການປັບປຸງຄອງ ເໝືອງ, ປັບປຸງສ້ອມແປງຈັກສູບນໍ້າ ເພື່ອການຜະລິດນາແຊງ ຊຶ່ງການຜະລິດເຂົ້າ ນາແຊງໃນປີນີິ້ຈາກປີ ກ່ອນ 340 ເຮັກຕາ, ເພີ່ມຂຶ້ນມາເປັນ 418 ເຮັກຕາ ຊຶ່ງມາຮອດປັດຈຸບັນການເກັບກ່ຽວ ແມ່ນສໍາເລັດໄປແລ້ວເປັນສ່ວນຫຼາຍ ໂດຍຜົນຜະລິດຄາດວ່າ ຈະໄດ້ 4,5 ໂຕນ ຕໍ່ເຮັກຕາ. ຈາກນີ້ປະຊາຊົນຍັງໄດ້ຫັນມາປູກພືດຜັກຕ່າງໆເປັນສິນຄ້າເປັນຕົ້ນແມ່ນສາລີ, ໝາກເຜັດ, ໝາກເຂືອ, ເຜືອກມັນ, ຢາສູບ, ອ້ອຍ, ກ້ວຍ... ປີນີ້ ເມືອງໄຊບູລີ ມີເນື້ອທີ່ການຜະລິດເຂົ້ານາແຊງທັງໝົດ 8.960 ເຮັກຕາ ໃນນີ້ ນາຫວ່ານ 5.100 ເຮັກຕາ, ນາດໍາ 3.830 ເຮັກຕາ, ນາຢອດ 50 ເຮັກຕາ ຊຶ່ງການເກັບກ່ຽວຈະໃຫ້ສໍາເລັດໃນກາງເດືອນເມສານີ້. (ຂ່າວ : ຕຸກໆ)