ເປີດໂຄງການທົດລອງນຳໃຊ້ສະຖານີສາກ ແລະ ລົດຂັບເຄື່ອນດ້ວຍໄຟຟ້າ


...

04.04.2019 9:08     

   ກະຊວງພະລັງງານ ແລະ ບໍ່ແຮ່ໄດ້ຈັດພິທີລົງນາມໃນບົດບັນທຶກຄວາມເຂົ້າໃຈໂຄງການສາທິດທົດລອງນຳໃຊ້ສະຖານີສາກ ແລະ ລົດທີ່ຂັບເຄື່ອນດ້ວຍພະລັງງານໄຟຟ້າໃນ ສປປ ລາວ ຂຶ້ນໃນວັນທີ 2 ເມສາຜ່ານມາ, ທີ່ນະຄອນຫຼວງວຽງຈັນ ໂດຍມີທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ບຸນອູ້ມ ສີວັນເພັງ ຜູ້ອຳນວຍການລັດວິສາຫະກິດໄຟຟ້າລາວ, ທ່ານ ບຸນເລີດ ຫຼວງປະເສີດ ປະທານບໍລິສັດລົດທີ່ຂັບເຄື່ອນດ້ວຍພະລັງງານໄຟຟ້າ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ. ທ່ານ ຄຳມະນີ ອິນທິລາດ ໄດ້ກ່າວວ່າ: ການເປີດໂຄງການສາທິດທົດລອງນຳໃຊ້ສະຖານີສາກ ແລະ ລົດທີ່ຂັບເຄື່ອນດ້ວຍພະລັງງານໄຟຟ້າໃນ ສປປ ລາວ ໃນຄັ້ງນີ້ ເປົ້າໝາຍຫຼັກແມ່ນການສົ່ງເສີມການນຳໃຊ້ພະລັງງານສະອາດເຂົ້າໃນຂະແໜງຄົມມະນາຄົມ-ຂົນສົ່ງ ຊຶ່ງແມ່ນຍຸດທະສາດການພັດທະນາໜຶ່ງໃນ 7 ຍຸດທະສາດບຸລິມະສິດຂອງກະຊວງພະລັງງານ ແລະ ບໍ່ແຮ່, ທັງເປັນສ່ວນໜຶ່ງຂອງໜ້າວຽກການປະຢັດ ແລະ ອະນຸລັກພະລັງງານຂອງລັດຖະບານ. ດັ່ງນັ້ນ ການພັດທະນາພະລັງງານເປັນບຸລິມະສິດໜຶ່ງທີ່ສຳຄັນ ຊຶ່ງໄດ້ມີການພັດທະນາ ແລະ ມີການປັບປຸງໂຄງສ້າງອຸດສາຫະກຳພະລັງງານ, ການຍົກລະດັບຄວາມສາມາດທາງດ້ານວິຊາການໄປຄຽງຄູ່ກັບການນຳໃຊ້ເຕັກນິກ, ເຕັກໂນໂລຊີທັນສະໄໝ, ນຳໃຊ້ຊັບ ພະຍາກອນທຳມະຊາດຢ່າງມີປະສິດທິພາບ, ປະຢັດ ແລະ ມີປະສິດທິຜົນສູງສຸດ, ຫັນເອົາການພັດທະນາພະລັງງານເປັນອຸດສາຫະກຳ ແລະ ຫັນເປັນທັນສະໄໝ, ສະໜອງພະລັງງານໃຫ້ແກ່ພາກຄົມມະນາຄົມ-ຂົນສົ່ງຢ່າງພຽງພໍ, ການພັດທະນາພະລັງງານຕາມທິດສີຂຽວ, ສະອາດ ແລະ ຍືນຍົງເພື່ອຫຼຸດຜ່ອນການນຳເຂົ້ານໍ້າມັນເຊື້ອໄຟຈາກຕ່າງປະເທດ. ທ່ານໄດ້ກ່າວໃຫ້ຮູ້ຕື່ມອີກວ່າ: ຕາມຂໍ້ມູນຂອງອົງການພະລັງງານສາກົນສະບັບປີ 2017 ໃຫ້ຮູ້ວ່າ: ຫຼາຍປະເທດໃນໂລກໄດ້ມີນະໂຍບາຍ, ຍຸດທະສາດ, ແຜນງານການພັດທະນານຳໃຊ້ພະລັງງານສະອາດ ແລະ ພ້ອມກັນນັ້ນຫຼາຍປະເທດໃນໂລກ ກໍໄດ້ມີການລິເລີ່ມຈັດຕັ້ງປະຕິບັດແຜນງານດັ່ງກ່າວໂດຍການສົ່ງເສີມການຄົ້ນຄວ້າ, ການຜະລິດເຕັກໂນໂລຊີ, ພາຫະນະຂັບເຄື່ອນດ້ວຍພະລັງງານ ເປັນຕົ້ນບັນດາປະເທດໃນທະວີບເອີຣົບ, ອາເມຣິກາ, ອາເມຣິກາລາຕິນ, ສປ ຈີນ ແລະ ບາງປະເທດໃນອາຊຽນ, ປີ 2017 ມີລົດແລ່ນດ້ວຍໄຟຟ້າຫຼາຍກວ່າ 3 ລ້ານຄັນ, ໃນນັ້ນ ສປ ຈີນ ກວມເຖິງ 35%, ອາເມຣິກາ 13%, ບັນດາປະເທດໃນທະວີບເອີຣົບກວມ 18%, ສ່ວນທີ່ເຫຼືອໃນບັນດາປະເທດອາຊຽນ ແລະ ອາເມຣິກາລາຕິນ. ພວກເຮົາເລັ່ງໃສ່ການນຳໃຊ້ທ່າແຮງທາງດ້ານພະລັງງານໄຟຟ້າຈາກແຫຼ່ງພະລັງງານທົດແທນຂອງປະເທດເຮົາເປັນຫຼັກໂດຍການເລືອກເອົາພາຫະນະທີ່ນຳໃຊ້ໄຟຟ້າ ຫຼື ລົດໄຟຟ້າ (Electric Vehicle or EV) ແບບປະສົມປະສານລະຫວ່າງໄຟຟ້າ, ພະລັງງານໄຮໂດຣເຊນ, ພະລັງງານຈາກແກ໊ສມີເທນ ແລະ ແບບໄຟຟ້າກັບນໍ້າມັນເຊື້ອໄຟຊີວະພາບ, ເປັນພື້ນຖານໃນການພັດທະນາລະບົບການຂົນສົ່ງທີ່ມີມົນລະພິດຕໍ່າ, ມີຄ່າສິ້ນເປືອງຕໍ່າທຽບໃສ່ນໍ້າມັນເຊື້ອໄຟ. (ຂ່າວ-ພາບ: ສຸກສາຄອນ)