ສະເຫຼີມສະຫຼອງວັນຟຣັງໂກໂຟນີສາກົນ


...

...

04.04.2019 9:15     

   ກະຊວງການຕ່າງປະເທດ ຮ່ວມກັບຫຼາຍພາກສ່ວນ ໄດ້ຈັດພິທີສະເຫຼີມສະຫຼອງວັນຟຣັງໂກໂຟນີສາກົນ 20 ມີນາ ປະຈຳປີ 2019 ຂຶ້ນຢ່າງເປັນທາງການ ຢູ່ທີ່ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ມີທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ເອກອັກຄະລັດຖະທູດຝຣັ່ງ ປະຈຳ ສປປ ລາວ, ຫົວໜ້າຫ້ອງການມະຫາວິທະຍາໄລຟຣັງໂກໂຟນີ (AUF) ປະຈໍາ ສປປ ລາວ; ຄູອາຈານ ແລະ ນັກຮຽນ-ນັກສຶກສາເຂົ້າຮ່ວມ. ທ່ານ ນາງ ແສງເດືອນ ຫຼ້າຈັນທະບູນ ໄດ້ກ່າວເຖິງຈຸດປະສົງຄວາມໝາຍສຳຄັນຂອງວັນຟຣັງໂກໂຟນີສາກົນ, ການສົ່ງເສີມການນຳໃຊ້ພາສາຝຣັ່ງ ຢູ່ ສປປ ລາວ ແລະ ການສົ່ງເສີມການພົວພັນຮ່ວມມືລະຫວ່າງ ສປປ ລາວ ແລະ ອົງການຟຣັງໂກໂຟນີສາກົນ (AUF). ພ້ອມດຽວກັນນີ້ ທ່ານຍັງໄດ້ເນັ້ນເຖິງຄວາມສຳຄັນຂອງວັນຟຣັງໂກໂຟນີສາກົນ, ພ້ອມທັງໄດ້ຍົກໃຫ້ເຫັນການນຳໃຊ້ພາສາຝຣັ່ງໃນເວທີສາກົນ ແລະ ການຮ່ວມມືດ້ານພາສາຝຣັ່ງ ຢູ່ ສປປ ລາວ. ໃນຕອນທ້າຍຂອງພິທີດັ່ງກ່າວ, ບັນດາຜູ້ເຂົ້າຮ່ວມ ໄດ້ຮ່ວມຊົມການສະແດງສິລະປະວັນນະຄະດີຂອງນັກຮຽນ-ນັກສຶກສາ ທີ່ຮຽນພາສາຝຣັ່ງ, ຊົມການວາງສະແດງຮູບພາບ ແລະ ຂໍ້ມູນຂ່າວສານກ່ຽວກັບການເຄື່ອນໄຫວກິດຈະກຳຕ່າງໆຂອງຄູອາຈານ ແລະ ນັກຮຽນ-ນັກສຶກສາທີ່ຮຽນພາສາຝຣັ່ງ ຢູ່ມະຫາວິທະຍາໄລແຫ່ງຊາດທີສ່ອງແສງກ່ຽວກັບວຽກງານຟຣັງໂກໂຟນີ. (ຂ່າວ: ນາງ ສະຫວັນຄໍາ, ຮູບ: ນາງ ຍຸພິນທອງ)