ຮອງນາຍົກລັດຖະມົນຕີ ຕ້ອນຮັບຄະນະຜູ້ແທນ ອິນໂດເນເຊຍ


...

05.04.2019 9:06     

   ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ເມີມາຮາດີ ໂຊຈາແດນກາຣາ (Moermahadi Soerja Djanegada) ປະທານອົງການກວດສອບ ແຫ່ງ ສາທາລະນະລັດ ອິນໂດເນເຊຍ ພ້ອມຄະນະ ໃນວັນທີ 4 ເມສາ ທີ່ສຳນັກ ງານນາຍົກລັດຖະມົນຕີ, ໃນໂອກາດ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 3 - 6 ເມສານີ້. ໂອກາດດັ່ງກ່າວ ທ່ານ ຮອງນາຍົກ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ເມີມາຮາດີ ໂຊຈາແດນກາຣາ ພ້ອມຄະນະທີ່ໄດ້ເດີນທາງມາຢ້ຽມຢາມ ແລະເຮັດວຽກຢູ່ ສປປ ລາວ ໃນຄັ້ງນີ້ ຊຶ່ງເປັນການປະກອບສ່ວນເສີມສ້າງສາຍພົວພັນອັນດີງາມ ຂອງສອງປະເທດລາວ - ອິນໂດເນເຊຍ ກໍຄືການເສີມສ້າງການຮ່ວມມືຂອງສອງອົງການກວດສອບແຫ່ງລັດຂອງສອງປະເທດ, ອິນໂດເນເຊຍມີບົດຮຽນຫຼາຍໃນວຽກງານວິຊາສະເພາະດ້ານການກວດສອບ ຊຶ່ງການຮ່ວມມືໃນການຍົກຂີດຄວາມສາມາດຂອງພະນັກງານກວດສອບ ແມ່ນມີຄວາມສຳຄັນຫຼາຍ ແລະ ເຊື່ອວ່າອິນໂດເນເຊຍ ກໍຄືອົງການກວດສອບ ຈະຊ່ວຍຍົກສູງຄວາມສາມາດດ້ານວິຊາສະເພາະຂອງນັກກວດສອບຂອງລາວ ຕາມທີ່ໄດ້ຕົກລົງກັນ ໃນກອງປະຊຸມພົບປະສອງຝ່າຍລະຫວ່າງສອງອົງການກວດສອບ ລາວ - ອິນໂດເນເຊຍ. ທ່ານ ຮອງນາຍົກໄດ້ກ່າວອີກວ່າ: ສປປ ລາວ ໃນນາມເປັນປະທານສະຖາບັນກວດສອບສູງສຸດອາຊຽນ (ອາຊຽນຊາຍ) ສປປ ລາວ ຈະປະຕິບັດວຽກງານໄປຕາມທິດທາງດຽວຂອງອາຊຽນຊາຍ ເພື່ອສ້າງຄວາມສາມາດ ແລະ ສົ່ງເສີມການຮ່ວມມືລະຫວ່າງປະເທດສະມາຊິກອາຊຽນຊາຍ ດ້ວຍຫຼາຍຮູບການ. ໃນໂອກາດດຽວກັນນີ້, ທ່ານ ເມີມາຮາດີ ໂຊຈາແດນກາຣາ ກໍໄດ້ກ່າວຂອບໃຈຕໍ່ທ່ານ ຮອງນາຍົກທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້ ພ້ອມທັງແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ແລະ ແຈ້ງຜົນການພົບປະສອງຝ່າຍລະຫວ່າງສອງອົງການກວດສອບແຫ່ງລັດ ແຫ່ງ ສປປ ລາວ - ອິນໂດ ເນເຊຍໃຫ້ທ່ານຮອງນາຍົກໄດ້ຮັບຊາບ. (ພາບ-ຂ່າວ: ສຸກສະ ຫວັນ)