ຫົວເຫວີຍ ສະຫຼອງຄົບຮອບ 20 ປີ ການດຳເນີນທຸລະກິດໃນລາວ


...

05.04.2019 9:12     

   ພິທີສະເຫຼີມສະຫຼອງ ບໍລິສັດ ຫົວເຫວີຍ ເຕັກໂນໂລຊີ ລາວ ຈຳກັດຜູ້ດຽວ ຄົບຮອບ 20 ປີ ໄດ້ຈັດຂຶ້ນໃນວັນທີ 3 ເມສາ ຜ່ານມາທີ່ໂຮງແຮມດອນຈັນພາເລດ ໂດຍການເປັນກຽດເຂົ້າຮ່ວມຂອງ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ; ມີບັນດາລັດຖະມົນຕີ, ທ່ານເອກອັກຄະລັດຖະທູດ ສປ ຈີນ ປະຈໍາ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ. ທ່ານ ມາກ ຫວອງ (Mark Wong) ຜູ້ອຳນວຍການໃຫຍ່ບໍລິສັດຫົວເຫວີຍ ເຕັກໂນໂລຊີ (ລາວ) ຈໍາກັດຜູ້ດຽວ ໄດ້ກ່າວວ່າ: ໃນໄລຍະ 20 ປີຜ່ານມາ, ໂດຍການຮ່ວມມືກັບບັນດາບໍລິສັດໂທລະຄົມຢູ່ລາວ, ຫົວເຫວີຍ ໄດ້ສ້າງໂຄງລ່າງພື້ນຖານເຄືອຂ່າຍ 3G, 4G ຢູ່ ສປປ ລາວ ໃນປັດຈຸບັນ ແລະ ກໍາລັງກ້າວໄປສູ່ຍຸກ 5G, ຫົວເຫວີຍ ໄດ້ສູ້ຊົນເພື່ອສະໜອງການເຊື່ອມຕໍ່ເຄືອຂ່າຍທີ່ມີຄວາມໄວສູງ ແລະ ປະສົບການແລກປ່ຽນຂໍ້ມູນຂ່າວສານໃຫ້ແກ່ປະຊາຊົນລາວ. ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ກ່າວວ່າ: ເຕັກໂນໂລຊີ ICT ແມ່ນເຄື່ອງມືສໍາຄັນໃນການເຊື່ອມໂຍງສັງຄົມ, ເຮັດໃຫ້ປະຊາຊົນຕິດຕໍ່ສື່ສານກັນໄດ້ຢ່າງສະດວກ ແລະ ຍັງຊ່ວຍການພັດທະນາເສດຖະກິດ-ສັງຄົມ, ຍົກສູງປະສິດທິພາບ ແລະ ປະສິດທິຜົນຂອງການຜະລິດ, ການເຮັດວຽກ ແລະ ສ້າງຄວາມສະດວກໃຫ້ແກ່ການດຳລົງຊີວິດຂອງປະຊາຊົນ, ໃນຕໍ່ໜ້າ ສປປ ລາວ ຈະໄດ້ນໍາເອົາເຕັກໂນໂລຊີຍຸກສະໄໝອຸດສາຫະກໍາ 4.0 ເພື່ອມາຂັບເຄື່ອນການຜະລິດ ແລະ ການພັດທະນາເສດຖະກິດ-ສັງຄົມ, ລົງສູ່ທຸກຂະແໜງການໃຫ້ເກີດມີຜົນປະໂຫຍດໃນຫຼາຍດ້ານ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ມີຄວາມຍິນດີທີ່ໄດ້ເຫັນບັນດາບໍລິສັດຕ່າງປະເທດ ທີ່ໄດ້ປະກອບສ່ວນຊຸກຍູ້ການພັດທະນາຢູ່ລາວ, ກໍຄືບໍລິສັດ ຫົວເຫວີຍ ໄດ້ຊ່ວຍການສ້າງ 3G, 4G ຂອງລາວ ແລະ ຫວັງວ່າໃນຕໍ່ໜ້າຈະນໍາເອົາເຕັກໂນໂລຊີ 5G ມາຂະຫຍາຍຢູ່ລາວໃນອະນາຄົດ. ຫົວເຫວີຍ ໄດ້ເລີ່ມສະ ໜອງອຸປະກອນ ແລະ ບໍລິ ການດ້ານໂທລະຄົມ ແຕ່ປີ 1998, ມີການຮ່ວມມືຢ່າງກວ້າງ ຂວາງ ກັບ ບໍລິສັດໂທລະຄົມ, ລັດຖະບານ ແລະ ລູກຄ້າໃນອຸດ ສາຫະກໍາຂະແໜງການ ICT. ມາຮອດປັດຈຸບັນນີ້, ການບໍລິ ການເຄືອຂ່າຍການສື່ສານຂອງ ຫົວເຫວີຍ ໃນລາວໄດ້ກວມເອົາ ປະມານ 70% ແລະ ໂທລະສັບມືຖືຂອງ ຫົວເຫວີຍ ໄດ້ຈັດຢູ່ໃນອັນດັບຕົ້ນໆ ຂອງຕະຫຼາດ ໃນ ສປປ ລາວ. ຫົວເຫວີຍ ໄດ້ສະແດງຄວາມຮັບຜິດຊອບຕໍ່ສັງຄົມ ດ້ວຍການພັດທະນາບຸກຄະລາກອນ, ການໂຄສະນາເຕັກໂນໂລຊີ ICT ແລະ ການເຂົ້າຮ່ວມການກູ້ໄພພິບັດທຳມະຊາດ, ຕະຫຼອດສອງທົດສະວັດ ຜ່ານມາ ຫົວເຫວີຍ ໄດ້ຝຶກອົບ ຮົມໃຫ້ພະນັກງານຄົນລາວ ໃນດ້ານ ICT ຫຼາຍກວ່າ 2.000 ຄົນ, ໃນຂະນະດຽວກັນ, ຫົວເຫວີຍ ໄດ້ສະໜອງລະບົບ ແລະ ອຸປະກອນການສື່ສານ ເພື່ອສະ ໜັບສະໜູນວຽກງານຂອງພາກລັດ, ການຮັກສາຄວາມປອດໄພສາທາລະນະ ແລະ ການສຶກສາ. (ພາບ-ຂ່າວ: ຫົວເຫວີຍ)