ປທສ ປາຖະກະຖາວັນສ້າງຕັ້ງພັກ ຄົບຮອບ 64 ປີ


...

05.04.2019 9:12     

   ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ)ໄດ້ຈັດພິທີປາຖະກະຖາ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 64ປີ ( 22 /3/ 1955-22/3/ 2019) ຂຶ້ນເມື່ອບໍ່ດົນມານີ້ ທີ່ກະຊວງ ປທສ.ໃຫ້ກຽດຂຶ້ນປາຖະກະຖາໂດຍສະຫາຍ ກິແກ້ວ ໄຂຄຳ ພິທູນ ຄະນະເລຂາທິການ ສູນກາງພັກ ຫົວໜ້າຄະນະໂຄ ສະນາອົບຮົມສູນກາງພັກ, ມີສະຫາຍ ທອງໃສ ຊານໄຊຍະ ຮອງເລຂາຄະນະພັກ ຮອງລັດ ຖະມົນຕີກະຊວງ ປທສ ພ້ອມດ້ວຍສະຫາຍຄະນະປະຈຳພັກກະຊວງ, ຄະນະໜ່ວຍພັກ, ຕະຫຼອດຮອດພະນັກງານ ສະມາຊິກພັກເຂົ້າຮ່ວມຮັບຟັງ. ການຈັດປາຖະກະຖາໃນ ຄັ້ງນີ້ ແມ່ນເພື່ອເຮັດໃຫ້ພະນັກ ງານ-ສະມາຊິກພັກ ໃນຂະແໜງ ການໄປສະນີ, ໂທລະຄົມມະ ນາຄົມ ແລະ ການສື່ສານ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບປະຫວັດສາດການ ກຳເນີດ ແລະ ການເຕີບໃຫຍ່ ຂະຫຍາຍຕົວ ຂອງພັກປະຊາ ຊົນ ປະຕິວັດລາວ, ອີກທັງເພື່ອເປັນການຍົກສູງຄວາມສາມາດການນຳພາ ແລະ ລັກສະນະນຳໜ້າຂອງພັກ, ສືບຕໍ່ຮັກສາມູນເຊື້ອອັນດີງາມຂອງພັກ ໃຫ້ຍືນຍົງຕະຫຼອດໄປ. ໃນພິທີ ສະຫາຍ ກິແກ້ວ ໄຂຄຳພິທູນ ໄດ້ຍົກໃຫ້ເຫັນເຖິງປະຫວັດສາດແຫ່ງການກໍາເນີດ ແລະ ການເຕີບໃຫຍ່ ຂະຫຍາຍຕົວ ຂອງພັກປະຊາ ຊົນ ປະຕິວັດລາວ ຕະຫຼອດໄລ ຍະ 64 ປີຜ່ານມາ, ທີ່ພັກເຮົາໄດ້ນຳພາການປະຕິວັດຊາດປະຊາທິປະໄຕ, ນຳພາປົກປັກຮັກສາ ແລະ ສ້າງສາລະບອບໃໝ່, ເວລາໃດກໍຢຶດໝັ້ນລັດທິມາກ-ເລນິນເປັນພື້ນຖານແນວຄິດທິດສະດີ ແລະ ຢຶດຖືຫຼັກໝັ້ນຂອງຊົນຊັ້ນກຳມະກອນຢ່າງສະເໝີຕົ້ນສະເໝີປາຍ, ສົມທົບແໝ້ນລະຫວ່າງລັດທິຮັກຊາດອັນແທ້ຈິງກັບລັດທິສາກົນອັນຜ່ອງໃສ, ມີຄວາມຈົງຮັກພັກດີຕໍ່ອຸດົມການປະຕິວັດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ຖືເອົາຄວາມ ສາມັກຄີພາຍໃນເປັນຫຼັກ, ເຕົ້າໂຮມຄວາມສາມັກຄີເປັນ ປຶກແຜ່ນພາຍໃນຊາດ, ເຊີດຊູຄວາມເປັນແບບຢ່າງນຳ ໜ້າ, ຮັກສາໄດ້ຄຸນທາດການ ເມືອງ ແລະ ຄຸນສົມບັດສິນທຳປະຕິວັດ, ຄວາມເຊື່ອໝັ້ນຈາກປະຊາຊົນລາວບັນດາເຜົ່າຕະຫຼອດມາ. ດັ່ງນັ້ນ, ພັກເຮົາສົມແລ້ວທີ່ເປັນກອງເສນາທິການທາງການເມືອງທີ່ສ່ອງໃສ, ເປັນກອງນຳໜ້າທີ່ແໜ້ນແກ່ນ, ເປັນຕົວແທນທີ່ຈົງຮັກພັກດີຕໍ່ສິດຜົນປະໂຫຍດຂອງຊົນຊັ້ນກຳມະກອນ, ຊາວຜູ້ອອກແຮງງານທີ່ຮັກຊາດ ແລະ ເປັນແກນນຳໃນລະບົບການເມືອງ ແຫ່ງລະບອບປະຊາທິປະໄຕປະຊາຊົນອັນເຂັ້ມແຂງ ແລະ ມີຄວາມສາມາດປະຕິບັດບົດບາດນຳພາຕໍ່ທົ່ວສັງຄົມ, ນຳພາປະເທດຊາດກ້າວໄປສູ່ສັງຄົມນິຍົມ. (ຂ່າວ: ກົມຈັດຕັ້ງ-ພະນັກ ງານ, ກະຊວງ ປທສ)