ມອບ-ຮັບ ອາຄານຫຼັງໃໝ່ ພາຍໃຕ້ໂຄງການພັດທະນາ ລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ


...

05.04.2019 9:12     

   ກົມສ່ວຍສາອາກອນ ກະຊວງການເງິນ ໄດ້ຈັດພິທີມອບ-ຮັບ ແລະ ເປີດນຳໃຊ້ ອາຄານຫຼັງໃໝ່ພາຍໃຕ້ໂຄງ ການພັດທະນາລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ ຂຶ້ນໃນວັນທີ 3 ເມສາ ຜ່ານມາ ທີ່ສຳນັກງານດັ່ງກ່າວ ຊຶ່ງຕັ້ງຢູ່ບ້ານໂພນໄຊ ເມືອງໄຊເສດຖາ ໂດຍໃຫ້ກຽດເຂົ້າຮ່ວມແມ່ນ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ທ່ານ ຊິນຊັງ ຊູນ ເອກອັກ ຄະລັດຖະທູດແຫ່ງ ສ ເກົາຫຼີ ປະ ຈຳ ສປປ ລາວ, ທ່ານ ຈອງ ວູນ ຢູ ຮອງປະທານບໍລິສັດ LG CNS ຜູ້ຮັບເໝົາໂຄງການກໍ່ສ້າງ, ພ້ອມດ້ວຍບັນດາຫົວໜ້າກົມ, ຮອງກົມ, ພະນັກງານຫຼັກແຫຼ່ງ ແລະ ແຂກທີ່ຖືກເຊີນເຂົ້າຮ່ວມ. ໃນໂອກາດນີ້ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກະຊວງການເງິນໄດ້ລາຍງານຄວາມເປັນມາຂອງໂຄງການສ້າງອາຄານຫຼັງໃໝ່ແຫ່ງນີ້ວ່າ: ໂຄງການພັດທະນາລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ ເປັນໂຄງການໜຶ່ງທີ່ນອນໃນແຜນຍຸດທະສາດ ຂອງຂະແໜງການເງິນໄປສູ່ທັນສະໄໝ ເວົ້າລວມ, ເວົ້າສະເພາະແມ່ນວຽກການຫັນການຄຸ້ມຄອງການເກັບລາຍຮັບສ່ວຍສາອາກອນໄປສູ່ລະ ບົບທັນສະໄໝມີລັກສະນະວິທະຍາສາດ ແນໃສ່ປັບປຸງກົນໄກ ການເກັບລາຍຮັບໃຫ້ມີປະສິດທິພາບ, ມີຄວາມໂປ່ງໃສ, ທັນເວລາສອດ ຄ່ອງກັບລະບົບກົດໝາຍ ແລະ ສິ່ງສຳຄັນແມ່ນສ້າງຄວາມງ່າຍ ດາຍ ແລະ ເອື້ອ ອຳນວຍກຄວາມສະດວກໃຫ້ແກ່ຜູ້ປະຕິບັດພັນທະອາກອນ. ວຽກງານພັດທະນາລະ ບົບຂໍ້ມູນຂ່າວສານດ້ານສ່ວຍສາອາກອນ ແມ່ນການສ້າງລະບົບຂໍ້ມູນຂ່າວສານຄຸ້ມຄອງການເກັບລາຍຮັບສ່ວຍສາອາກອນແບບຄົບຊຸດ ລວມທັງການພັດທະນາຊຸດຄຳສັ່ງ ການແຈ້ງມອບລາຍຮັບ, ການກວດສອບຫຼັງການແຈ້ງ, ການປະເມີນຄາດຄະເນແຫຼ່ງລາຍຮັບ, ການກຳນົດເລກປະຈຳຕົວຜູ້ເສຍອາກອນ, ການເຊື່ອມຕໍ່ລະບົບຕ່າງໆຂອງກະຊວງການເງິນ ແລະ ຂະແໜງການອື່ນໆທີ່ກ່ຽວຂ້ອງກັບການເກັບລາຍຮັບສ່ວຍສາອາກອນ ແລະ ເຊື່ອມຕໍ່ການບໍລິການຂອງທະນາຄານເພື່ອອຳນວຍຄວາມສະດວກໃນການເສຍອາກອນ ຜ່ານລະບົບເອເລັກໂຕຣນິກ, ອາຄານດັ່ງ ກ່າວ ຊຶ່ງເປັນອາຄານ 6 ຊັ້ນ ໂດຍຈະນຳໃຊ້ສຳລັບເກັບຖານ ຂໍ້ມູນ, ການຝຶກອົບຮົມ, ການບໍລິການຜູ້ເສຍອາກອນ, ຫ້ອງ ການ ແລະ ຫ້ອງປະຊຸມ, ລວມທັງສ້າງສູນຂໍ້ມູນ (Back-Up Center) ຢູ່ແຂວງວຽງຈັນ. ແມ່ນນຳໃຊ້ເງິນກູ້ຜ່ອນຜັນຈາກ Economic Development and Cooperation Funds (EDCF) ຂອງລັດຖະບານ ສ.ເກົາຫຼີ ມີມູນຄ່າເງິນກູ້ 28,5 ລ້ານໂດ ແລະ ທຶນສົມທົົບຂອງລັດຖະບານລາວ 4 ລ້ານໂດລາ ຊຶ່ງລວມມູນຄ່າທັງໝົດຂອງໂຄງການ ແມ່ນປະມານ 32,5 ລ້ານໂດລາ ໂຄງການດັ່ງກ່າວແມ່ນໄດ້ເລີ່ມຕົ້ນແຕ່ປີ 2016 ຈົນມາເຖິງເດືອນມັງກອນ 2019 ຈຶ່ງສຳເລັດ 100% ແລະ ຈະໃຊ້ເວລາອີກ 3 ເດືອນ ໃນການເຮັດວຽກທີ່ກະຊວງການເງິນ ສະເໜີເພີ່ມເຊັ່ນ: ການກໍ່ສ້າງທາງເຂົ້າ-ອອກ ແລະ ທາງເຊື່ອມຕໍ່ພາຍໃນກະຊວງການເງິນ. ໃຫ້ກຽດຕັດແຖບຜ້າເປີດ ການນຳໃຊ້ຢ່າງເປັນທາງການ ໂດຍທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະ ມົນຕີກະຊວງການເງິນ. (ຂ່າວ: ນາງ ສະຫວັນຄຳ)