ຄະນະຜູ້ແທນຄະນະພົວພັນຕ່າງປະເທດ ສູນກາງພັກ ຢ້ຽມຢາມ ສປ ຈີນ


...

05.04.2019 9:12     

   ໂດຍປະຕິບັດຕາມແຜນ ການຮ່ວມມື ລະຫວ່າງ ສອງພັກ ລາວ-ຈີນ ປະຈໍາປີ 2019, ສະຫາຍ ນາງ ສູນທອນ ໄຊຍະຈັກ ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ຢ້ຽມຢາມ ແລະ ເຮັດວຽກ ຢູ່ ສປ ຈີນ ແຕ່ວັນທີ 31 ມີນາ - 4 ເມສາ 2019 ນີ້. ໃນຕອນເຊົ້າຂອງວັນທີ 1 ເມສາ 2019, ທີ່ນະຄອນຫຼວງປັກກິ່ງ, ສະຫາຍ ນາງ ສູນທອນ ໄຊຍະຈັກ ໄດ້ເຂົ້າຢ້ຽມຂໍ່ານັບ ສະຫາຍ ຮວງ ຄຸນມິງ ກໍາມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະໂຄສະນາສູນກາງພັກກອມມູນິດຈີນ. ໃນການພົບປະດັ່ງກ່າວ, ສະຫາຍ ນາງ ສູນທອນ ໄຊຍະຈັກ ໄດ້ສະແດງຄວາມຂອບໃຈຕໍ່ ສະຫາຍ ຮວງຄຸນມິງ ທີ່ໄດ້ໃຫ້ກຽດຕ້ອນຮັບຄະນະໃນໂອກາດມາຢ້ຽມຢາມຄັ້ງນີ້, ພ້ອມທັງໄດ້ນຳເອົາຄວາມຢ້ຽມຢາມຖາມຂ່າວຈາກການນໍາຂັ້ນສູງຂອງພັກ-ລັດ ລາວ ມາຍັງການນໍາຂັ້ນສູງຂອງ ພັກ-ລັດ ຈີນ; ໄດ້ຕີລາຄາການພົວພັນຮ່ວມມືສອງຝ່າຍ ຕາມທິດ 4 ດີ, ໂດຍສະເພາະການແລກປ່ຽນບົດຮຽນທາງດ້ານທິດສະດີ ແລະ ພຶດຕິກໍາ, ດ້ານການກໍ່ສ້າງພັກ-ພະນັກງານ ແລະ ດ້ານເສດຖະກິດ-ການຄ້າ, ການລົງທຶນ ລະຫວ່າງ ສອງປະເທດ. ໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດອັນໃຫຍ່ຫຼວງ, ຮອບດ້ານ ທີ່ປະຊາຊົນຈີນ ຍາດມາໄດ້ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນ, ໂດຍສະເພາະແມ່ນການສ້າງສັງຄົມນິຍົມທີ່ມີສີສັນພິເສດຂອງຈີນ ພາຍໃຕ້ການນໍາພາອັນໜັກແໜ້ນຂອງສູນກາງພັກກອມມູນິດຈີນ ທີ່ຖື ສະຫາຍເລຂາທິການໃຫຍ່, ປະທານປະເທດ ສີຈິ້ນຜິງ ເປັນແກນກາງ, ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປັບປຸງດີຂຶ້ນເລື້ອຍໆ, ບົດບາດຂອງ ສປ ຈີນ ໃນເວທີພາກພື້ນ ແລະ ສາກົນ ນັບມື້ນັບສູງຂຶ້ນ. ສະຫາຍ ຮວງ ຄຸນມິງ ໄດ້ຕີລາຄາສູງໃນການມາຢ້ຽມຢາມ ສປ ຈີນ ຂອງຄະນະຜູ້ແທນ ຄະນະພົວພັນຕ່າງປະເທດສູນກາງພັກ ປປ ລາວ ໃນຄັ້ງນີ້, ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຈີນ-ລາວ ຕະຫຼອດໄລຍະທີ່ຜ່ານມາ; ສະແດງຄວາມຊົມເຊີຍຕໍ່ບັນດາຜົນສໍາເລັດອັນໃຫຍ່ຫຼວງ ໃນການພັດທະນາເສດຖະກິດ-ສັງຄົມ ຂອງ ສປປ ລາວ ພາຍໃຕ້ການນຳພາທີ່ຖືກຕ້ອງຂອງພັກ-ລັດ ລາວ, ອັນມີ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ເປັນຜູ້ນໍາໜ້າ ແລະ ອວຍພອນໃຫ້ປະຊາຊົນລາວ ຈົ່ງສືບຕໍ່ຍາດໄດ້ຜົນສໍາເລັດໃໝ່, ໃຫຍ່ຫຼວງກວ່າເກົ່າ ໃນການປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ປປ ລາວ. ໃນມື້ດຽວກັນ, ຄະນະໄດ້ພົບປະເຮັດວຽກ ກັບ ສະຫາຍ ຊົ້ງທາວ ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ. ທັງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ກໍຄື ການພົວພັນຮ່ວມມື ລະຫວ່າງ ສອງຄະນະພົວພັນຕ່າງປະເທດສູນກາງພັກ ໃນຕະຫຼອດໄລຍະທີ່ຜ່ານມາ, ໄດ້ປຶກສາຫາລືກ່ຽວກັບແຜນການຮ່ວມມື ລະຫວ່າງ ສອງພັກ, ສອງລັດ ກໍຄື 2 ຄະນະພົວພັນຕ່າງປະເທດສູນກາງພັກ ລາວ-ຈີນ ປະຈຳປີ 2019 ແລະ ຍິນດີສືບຕໍ່ປະສານສົມທົບກັນຜັນຂະຫຍາຍ ແລະ ຈັດຕັ້ງປະຕິບັດແຜນການຮ່ວມມືລະຫວ່າງສອງພັກ ລາວ-ຈີນ ກໍຄື ການຕົກລົງຂອງການນຳຂັ້ນສູງຂອງທັງສອງພັກ, ສອງລັດ ລາວ-ຈີນ ໃຫ້ປະກົດຜົນເປັນຈິງ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 04 ດີ ລະຫວ່າງ ສອງພັກ ສອງລັດ ແລະ ປະຊາຊົນສອງຊາດລາວ-ຈີນ ໃຫ້ນັບມື້ຈະເລີນງອກງາມຍິ່ງໆຂຶ້ນ. ນອກຈາກເຄື່ອນໄຫວ ຢູ່ ນະຄອນປັກກິ່ງແລ້ວ, ຄະນະຍັງໄປຢ້ຽມຢາມແຂວງຟູຈ້ຽນ ເພື່ອຊອກຮູ້ກ່ຽວກັບສະພາບການພັດທະນາທາງດ້ານເສດຖະກິດ-ສັງຄົມ ແລະ ຢ້ຽມຢາມສະຖານທີ່ວັດທະນະທໍາຈໍານວນໜຶ່ງຂອງແຂວງ. (ຂ່າວ-ພາບ: ຄະນະພົວພັນຕ່າງປະເທດສູນກາງພັກ)