ປາຖະກະຖາວັນສ້າງຕັ້ງ ຄຊປລ ຄົບຮອບ 64 ປີ


...

05.04.2019 9:12     

   ພິທີປາຖະກະຖາວັນສ້າງ ຕັ້ງ ຄະນະຊາວໜຸ່ມ ປະຊາຊົນ ປະຕິວັດລາວ (ຄຊປລ) ຄົບ ຮອບ 64 ປີ ໄດ້ຈັດຂຶ້ນໃນວັນທີ 3 ເມສາ ຜ່ານມາ ຢູ່ສະໂມສອນໃຫຍ່ຂອງກະຊວງປ້ອງກັນປະເທດ ໂດຍການໃຫ້ກຽດເຂົ້າຮ່ວມ ແລະ ປາຖະກະຖາຂອງສະຫາຍ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງ ຊາວໜຸ່ມ ປະຊາຊົນປະຕິ ວັດລາວ, ມີສະຫາຍ ພັອ ສົມພົງ ແພງປັນຍາ ເລຂາຄະນະບໍລິ ຫານງານຊາວໜຸ່ມກະຊວງປ້ອງກັນປະເທດ, ມີບັນດາຄະນະກົມອ້ອມຂ້າງສູນກາງ ຊປປລ, ກົມກອງຕ່າງໆພາຍໃນກະຊວງປ້ອງກັນປະເທດ ພ້ອມດ້ວຍສະມາຊິກຊາວໜຸ່ມເຂົ້າຮ່ວມ. ໃນພິທີ ສະຫາຍ ອາລຸນ ໄຊ ສູນນະລາດ ໄດ້ເລົ່າເຖິງມູນເຊື້ອແຫ່ງການຕໍ່ສູ້ຢ່າງພິລະອາດຫານຂອງຊາວໜຸ່ມ ໂດຍສະເພາະແມ່ນການເຕົ້າ ໂຮມ, ການປົກປັກຮັກສາ ແລະ ສ້າງສາພັດທະນາປະເທດຊາດຊຶ່ງໄດ້ເຮັດໃຫ້ຊາວໜຸ່ມຈຳນວນບໍ່ໜ້ອຍໄດ້ເສຍສະຫຼະຊີວິດ ເລືອດເນື້ອ ເພື່ອປົກປັກຮັກສາເອກະລາດ ແລະ ຜືນແຜ່ນດີນອັນແສນຮັກຂອງຕົນໄວ້. ຜ່ານຂະບວນການດັ່ງກ່າວນັ້ນ ໄດ້ເກີດມີບັນດາບັນພະບູລຸດທີ່ມີຊື່ສຽງເຊັ່ນ: ເຈົ້າຂຸນບູລົມ, ເຈົ້າຟ້າງຸ່ມ, ເຈົ້າສຸລິຍະວົງສາ, ເຈົ້າໄຊເສດຖາທິລາດ, ເຈົ້າອານຸວົງ, ປະທານໄກສອນ ພົມວິຫານ ແລະ ທ່ານອື່ນໆ ຊຶ່ງໄດ້ນຳພາປະຊາຊົນຕໍ່ສູ້ກັບການຮຸກຮານພາຍນອກ, ໄດ້ນຳພາປະເທດຊາດຜ່ານພົ້ນພາຍຸລົມແດງແຕ່ລະຍຸກແຕ່ລະສະໄໝ ແລະ ສາມາດຮັກສາດິນແດນ ໄວ້ຢ່າງໝັ້ນຄົງ. ນອກນັ້ນ, ສະຫາຍຍັງໄດ້ເນັ້ນໃຫ້ຊາວໜຸ່ມຮຸ່ນປັດຈຸບັນຈົ່ງອອກແຮງປົກປັກຮັກສາ ແລະ ເສີມຂະ ຫຍາຍມູນເຊື້ອອັນດີງາມຂອງຊາວໜຸ່ມຮຸ່ນກ່ອນ ໂດຍຄວນເອົາໃຈໃສ່ສຶກສາອົບຮົມການເມືອງ-ແນວຄິດ ແລະ ປູກຈິດສຳນຶກໃຫ້ຊາວໜຸ່ມ, ເຍົາວະຊົນ-ອະນຸຊົນທັນວາໃຫ້ມີນ້ຳໃຈຮັກຊາດ ຮັກບ້ານເກີດເມືອງນອນ, ມີມານະຈິດອົດທົນ, ມີຄຸນສົມບັດສິນທຳປະຕິວັດ ແລະ ຮັກການຄົ້ນຄ້ວາ-ສຶກສາຮຽນຮູ້; ເອົາໃຈໃສ່ປຸກລະດົມເຕົ້າໂຮມຄວາມສາມັກຄີຊາວໜຸ່ມລາວບັນດາເຜົ່າ ໃຫ້ເປັນປຶກແຜ່ນແໜ້ນໜາຢູ່ອ້ອມຂ້າງພັກ, ຮູ້ເສີມຂະຫຍາຍມູນເຊື້ອ ຄວາມສາມັກຄີໃຫ້ກ້ວາງຂວາງ-ໜັກແໜ້ນ; ເອົາໃຈໃສ່ຊີ້ນຳໆພາການຈັດຕັ້ງ ແລະ ການເຄື່ອນໄຫວຂອງຊາວໜຸ່ມ, ເຍົາວະຊົນ-ອະນຸຊົນໃຫ້ມີຄວາມໜັກແໜ້ນເຂັ້ມແຂງທາງດ້ານປະລິມານ ແລະ ຄຸນນະພາບ; ເອົາໃຈໃສ່ປົກປ້ອງສິດ ແລະ ຜົນປະໂຫຍດອັນຊອບທຳຂອງຊາວໜຸ່ມ, ເຍົາວະຊົນ-ອະນຸຊົນທັນວາ ໂດຍການສ້າງໂອກາດໃຫ້ໄດ້ເຂົ້າຮ່ວມເປັນກຳມະການ, ຄະນະຮັບຜິດຊອບສ້າງກົດ ໝາຍ, ນິຕິກຳຕ່າງໆ ແລະ ເປີດໂອກາດໃຫ້ຊາວໜຸ່ມ-ເຍົາວະຊົນໄດ້ເຂົ້າຮ່ວມການປະກອບຄຳຄິດຄຳເຫັນໃນກອງປະຊຸມຕ່າງໆ; ເອົາໃຈໃສ່ເພີ່ມທະວີການສຶກສາອົບຮົມ ໃຫ້ຊາວໜຸ່ມ, ເຍົາວະຊົນ-ອະນຸຊົນທັນວາ ຮູ້ປົກປັກຮັກສາ ແລະ ເສີມຂະຫຍາຍມູນເຊື້ອນຳ້ໃຈອັນພິລະອາດຫານ, ມີຄວາມເສຍສະຫຼະ, ດຸໝັ່ນຂະຫຍັນພຽນ, ຮັກການອອກແຮງງານ, ມີແບບແຜນການດຳລົງຊີວິດທີ່ຖືກຕ້ອງ, ປະຢັດມັດທະຍັດ, ສັດຊື່ບໍລິສຸດ ແລະ ຮັກສາຮີດຄອງປະເພນີອັນດີງາມໄວ້ໃຫ້ຄຽງຄູ່ກັບຊາດລາວຕະຫຼອດໄປ. ( ຂ່າວ-ພາບ: ສຊປລ)