ສະຖານີລົດໄຟ ລາວ-ຈີນ ເມືອງບໍ່ເຕ່ນ ຈັດເປັນ ອັນດັບ 2 ຮອງຈາກ ສະຖານີ ນະຄອນຫຼວງວຽງຈັນ


...

05.04.2019 9:12     

   ລົດໄຟລາວ-ຈີນ ຢູ່ເມືອງບໍ່ເຕ່ນ ແຂວງຫຼວງນໍ້າທາ ແມ່ນສະຖານີທຳອິດຈາກຊາຍແດນປະເທດຈີນເຂົ້າສູ່ປະເທດລາວ ຊຶ່ງມີເນື້ອທີ່ກໍ່ສ້າງອັນກວ້າງໃຫຍ່ເປັນອັນດັບ 2 ຮອງຈາກສະຖານີລົດໄຟລາວ-ຈີນ ຢູ່ນະຄອນຫຼວງວຽງຈັນ ໂດຍແມ່ນບໍລິສັດລົດໄຟລາວ - ຈີນ ເປັນຜູ້ລົງທຶນກໍ່ສ້າງທັງໝົດໃນເນື້ອທີ່ 20 ເຮັກຕາ. ທ່ານ ໂຈ່ຈີ້ລ້ຽງ ຜູ້ອຳນວຍການໂຄງການກໍ່ສ້າງສະຖານີລົດໄຟ ລາວ-ຈີນ ເມືອງບໍ່ເຕ່ນ ແຂວງ ຫຼວງນໍ້າທາ ໄດ້ໃຫ້ສໍາພາດວ່າ : ໃນພື້ນທີ່ກໍ່ສ້າງດັ່ງກ່າວ ແມ່ນໄດ້ແບ່ງອອກເປັນ 13 ສ່ວນ ແລະ 2 ຊ່ອງທາງເພື່ອແລ່ນລົດໂດຍສານເຂົ້າອອກເມືອງ ມີເຂດບໍລິການ ຂົນສົ່ງສິນຄ້າ, ເຂດສາທາລະ ນະສຸກ, ອູ່ສ້ອມແປງລົດ, ດ່ານຄົນເຂົ້າເມືອງ ແລະ ສິ່ງອໍານວຍຄວາມສະດວກອື່ນໆ. ປັດຈຸບັນນີ້ ໂຄງການແມ່ນພວມຢູ່ໃນຂັ້ນຕອນການປັບໜ້າດິນບົນເນື້ອທີ່ທັງໝົດ 20 ເຮັກຕາ ເພື່ອໃຫ້ແລ້ວກ່ອນລະດູຝົນທີ່ຈະມາເຖິງນີ້. ຫຼັງຈາກນັ້ນ, ຈຶ່ງຈະ ເລີ່ມລົງມືກໍ່ສ້າງອາຄານຕ່າງໆ ໃຫ້ ສຳເລັດກ່ອນທ້າຍເດືອນຕຸລາ 2020. ທ່ານຍັງໃຫ້ຮູ້ຕື່ມອີກວ່າ: ສະຖານີລົດໄຟລາວຈີນ ເມືອງບໍ່ເຕ່ນ ເມື່ອສ້າງສໍາເລັດແລ້ວ ຈະສາມາດຮອງຮັບຜູ້ໂດຍສານເບື້ອງຕົ້ນໄດ້ປະມານຫ້າພັນຄົນຕໍ່ມື້ ແລະ ຈະເພີ່ມປະລິມານຂຶ້ນໄປເລື້ອຍໆ. ການກໍ່ສ້າງສະຖານີລົດໄຟລາວຈີນ ກໍ່ຄື ການສ້າງທາງລົດໄຟຈາກເມືອງບໍ່ເຕ່ນແຂວງຫຼວງນຳ້ທາ ຫາ ນະຄອນຫຼວງວຽງຈັນ, ນອກຈາກຈະຊ່ວຍເຮັດໃຫ້ນັກທ່ອງທ່ຽວຈາກປະເທດຈີນ ເດີນທາງເຂົ້າມາທ່ອງທ່ຽວ ແລະປະກອບທຸລະກິດຕ່າງໆຢູ່ປະເທດລາວເຮົາໄດ້ຢ່າງສະດວກສະບາຍຫຼາຍຂຶ້ນແລ້ວ ຍັງເຮັດໃຫ້ທຸລະກິດການຂົນສົ່ງລະຫວ່າງປະເທດ ມີຄວາມຄ່ອງຕົວຫຼາຍຂຶ້ນ ລວມທັງເປັນການສ້າງວຽກເຮັດງານທຳໃຫ້ຄົນພາຍໃນທ້ອງຖິ່ນ ກໍ່ຄື ທົ່ວປະເທດແລ້ວ, ພ້ອມທັງຊ່ວຍເຮັດໃຫ້ເສດຖະກິດລະຫວ່າງສອງຊາດລາວຈີນນັບມື້ຂະຫຍາຍຕົວຂຶ້ນເທື່ອ ລະກ້າວ. ( ຂ່າວພາບ: ພູວັນ)