25 ປີ ແຫ່ງການເຕີບໃຫຍ່ຂະຫຍາຍຕົວຂອງໜັງສືພິມວຽງຈັນທາຍ


...

08.04.2019 8:43     

   ພິທີສະເຫຼີມສະຫຼອງວັນສ້າງຕັ້ງໜັງສືພິມວຽງຈັນທາຍ ຄົບຮອບ 25 (7/4/1994-7/ 4/2019) ໄດ້ຈັດຂຶ້ນໃນວັນທີ 5 ເມສາ ຜ່ານມາ ທີ່ສຳນັກງານໜັງສືພິມດັ່ງກ່າວ, ໂດຍການໃຫ້ກຽດເຂົ້າຮ່ວມຂອງທ່ານ ບໍ່ແສງຄຳ ວົງດາລາ ລັດຖະມົນ ຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ); ມີທ່ານຮອງລັດຖະມົນຕີ, ຫົວ ໜ້າກົມ-ຮອງກົມ; ພະນັກງານວິຊາການ ແລະ ແຂກຖືກເຊີນເຂົ້າຮ່ວມ.
ໃນພິທີ ທ່ານ ທອງຫຼໍ່ ດວງສະຫວັນ ຫົວໜ້າບັນນາທິການ ໜັງສືພິມພາສາຕ່າງປະເທດ ໄດ້ລາຍງານປະຫວັດຄວາມເປັນມາ ແລະ ການເຕີບໃຫ່ຍຂະ ຫຍາຍຕົວຂອງໜັງສືພິມໄລ ຍະ 25 ປີຜ່ານມາ, ທ່ານໄດ້ກ່າວວ່າ: ໜັງສືພິມວຽງຈັນທາຍ ສ້າງຕັ້ງຂຶ້ນໃນວັນທີ 7 ເມສາ 1994 ແລະ ເປັນສື່ສິ່ງພິມໜຶ່ງທີ່ໄດ້ປະກອບສ່ວນສຳຄັນເຂົ້າໃນການໂຄສະນາເຜີຍແຜ່ແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດ ແລະ ສ່ອງແສງລາຍງານສະພາບການຕ່າງໆ ທີ່ເກີດຂຶ້ນຢູ່ພາຍໃນປະເທດ ແລະ ນຳເອົາຂໍ້ມູນຂ່າວສານຈາກຕ່າງປະເທດມາສູ່ມວນຊົນລາວ. ໜັງສືພິມກຳເນີດເກີດຂຶ້ນແມ່່ນເຈຕະນາລົມຂອງຄະນະນຳກະຊວງ ຖວທ ກໍຄື ລັດຖະບານ ແຫ່ງ ສປປ ລາວ ເພື່ອເປັນຂົວຕໍ່ສົ່ງເສີມການເປີດກວ້າງການພົວພັນຮ່ວມ ມືລະຫວ່າງ ສປປ ລາວ ກັບ ໂລກພາຍນອກ ພາຍຫຼັງທີ່ພັກປະຊາຊົນປະຕິວັດລາວໄດ້ດໍາເນີນນະໂຍບາຍປ່ຽນແປງໃໝ່ ໃນປີ 1986.
ໃນໄລຍະຕົ້ນໜັງສືພິມໄດ້ພິມອອກເປັນລາຍສັບປະດາ. ມາຮອດປີ 1996 ໄດ້ພິມ 2 ສະບັບຕໍ່ອາທິດ ແລະ ພິມລາຍວັນໃນປີ 2004. ໃນປີ 2007 ໜັງສືພິມວຽງຈັນທາຍ ໄດ້ພິມສະບັບວັນເສົາ; ຊຶ່ງເປັນ ຫົກສະບັບຕໍ່ອາທິດ ແລະ ໄດ້ສ້າງເວັບໄຊຂຶ້ນໃນເດືອນມິ ຖຸນາ 1999 ໂດຍແນໃສ່ເຮັດໃຫ້ ຂ່າວຈາກໜັງສືພິມໄປຮອດ ທົ່ວທຸກມູມໂລກໄວ, ທັນເຫດ ການ ແລະ ສະພາບການ; ໃນ ປັດຈຸບັນ, ໜັງສືພິມວຽງຈັນ ທາຍໄດ້ໃຫ້ການບໍລິການຫຼາຍ ຜະລິດຕະພັນແກ່ສັງຄົມເຊັ່ນ: ຜະລິດຕະພັນໜັງສືພິມ, ອອກຂ່າວ ແລະ ວິດີໂອທາງເວັບໄຊ (Website), ເຟັສບຸກ (Facebook), ຂໍ້ຄວາມສັ້ນຜ່ານມືຖື (SMS), CD- Rom ແລະ ອື່ນໆ. ຊຶ່ງຍອດການຈອງໜັງສືພິມວຽງຈັນທາຍມີເຖິງ 3.000 ກວ່າສະບັບຕໍ່ວັນ. ຂ່າວອອນລາຍຜ່ານລະບົບອິນເຕີເນັດ ເພີ່ມຂຶ້ນເປັນ 500 ກວ່າຄົນ, ມີຄົນເຂົ້າອ່ານຂ່າວທີ່ສົ່ງອອກຢູ່ໃນໜ້າເວັບໄຊຈຳນວນໜຶ່ງພັນເທື່ອຄົນຕໍ່ວັນ ແລະ ການຈອງອ່ານຂ່າວຜ່ານໂທລະສັບມືຖືເປັນພາສາລາວ ແລະ ພາສາອັງກິດຜ່ານ 4 ບໍລິສັດໂທລະຄົມກໍເພີ່ມຂຶ້ນຫຼາຍກວ່າ 50 ພັນຄົນ.
ປັດຈຸບັນ ໜັງສືພິມວຽງຈັນທາຍປະກອບມີພະນັກງານທັງໝົດ 70 ກວ່າຄົນ, ເປັນລັດ ຖະກອນ 51 ຄົນ, ຍິງ 20 ຄົນ, ພະນັກງານຊ່ວຍວຽກ 16 ຄົນ, ຈົບຊັ້ນປະລິນຍາຕີ 39 ຄົນ, ປະລິນຍາໂທ 4 ຄົນ ແລະ ໄດ້ແບ່ງເປັນ 7 ພະແນກຄື: ພະແນກຄຸ້ມຄອງບໍລິຫານ, ຂ່າວການເມືອງ-ວັດທະນະທຳ-ສັງ ຄົມ, ບົດໜັງສືພິມວຽງຈັນທາຍ, ໂຄສະນາ-ຈຳໜ່າຍ, ຈັດໜ້າ-ໄອທີ-ສຳເນົາ ແລະ ອອນລາຍ. ຕໍ່ກັບຜົນສຳເລັດດັ່ງກ່າວ ຈຶ່ງໄດ້ຮັບການຍ້ອງຍໍຈາກພັກ-ລັດຖະບານ ໃນນີ້ລວມມີ ຫຼຽນໄຊແຮງງານຊັ້ນ I ຈຳນວນ 2 ຫຼຽນ, ຫຼຽນໄຊແຮງງານຊັ້ນ II ຈຳນວນ 4 ຫຼຽນ, ຫຼຽນໄຊແຮງງານຊັ້ນ III ຈຳນວນ 3 ຫຼຽນ, ຫຼຽນກາແຮງງານ 4 ຫຼຽນ, ໃບຍ້ອງຍໍໃບກຽດຕິຄຸນອີກຈຳນວນໜຶ່ງ.
ເພື່ອຮັບປະກັນໃຫ້ແກ່ການຈັດຕັ້ງປະຕິບັດວຽກງານພັດທະນາດ້ານສື່ມວນຊົນເຮົາເວົ້າລວມ, ເວົ້າສະເພາະແມ່ນໜັງສືພິມພາສາຕ່າງປະເທດ ຂອງພວກເຮົາໃຫ້ກ້າວຂຶ້ນຢ່າງໜັກແໜ້ນໃຫ້ສົມເປັນເຄື່ອງມືອັນແຫຼມຄົມຂອງພັກ-ລັດເຮົາຢ່າງແທ້ຈິງ, ທ່ານລັດຖະມົນຕີໄດ້ຮຽກຮ້ອງໃຫ້ຄະນະບັນນາທິການ ແລະ ພະ ນັກງານທຸກຄົນ ເອົາໃຈໃສ່ຕື່ມບາງບັນຫາລຸ່ມນີ້: 1. ສືບຕໍ່ເອົາໃຈໃສ່ເຮັດວຽກງານການ ເມືອງແນວຄິດໃຫ້ພະນັກງານ ກໍຄືສະມາຊິກພັກໃນຖັນແຖວວຽກງານສື່ໃຫ້ມີຄວາມໜັກແໜ້ນ, ກຳໄດ້ແນວທາງນະໂຍ ບາຍຂອງພັກ-ລັດຢ່າງເລິກ ເຊິ່ງ, ປຸກລະດົມຂະບວນການ ແຂ່ງຂັນຮັກຊາດຢ່າງແຂງ ແຮງ, ເຊີດຊູສະຕິ ແລະ ຄວາມ ຮັບຜິດຊອບດ້ານການເມືອງ ຕໍ່ໜ້າທີ່ວຽກງານຢ່າງແທ້ຈິງ ເພື່ອພ້ອມກັນຕັດສິນໃຈສູ້ຊົນ ຜ່ານຜ່າຄວາມຫຍຸ້ງຍາກຕ່າງໆ, ເຮັດຫຼ້ອນໜ້າທີ່ການເມືອງທີ່ພັກ-ລັດມອບໝາຍໃຫ້; 2. ເອົາ ໃຈໃສ່ປັບປຸງແບບແຜນວິທີເຮັດ ວຽກ, ການຈັດວາງບຸກຄະລາກອນໃຫ້ຖືກຕ້ອງກະທັດຮັດ ແລະ ສອດຄ່ອງກັບສະພາບຕົວຈິງ; 3. ເອົາໃຈໃສ່ປັບປຸງ ວຽກງານວິຊາສະເພາະໃຫ້ມີຄຸນນະພາບສູງ ຕາມທິດຫັນໄປສູ່ລະບົບທັນສະໄໜ; 4. ເອົາໃຈໃສ່ກໍ່ສ້າງບໍາລຸງຍົກລະດັບບັນດານັກຂ່າວກໍຄືພະນັກງານສື່ໜັງສືພິມໃຫ້ມີຄວາມຮູ້ຄວາມສາມາດ, ມີຈັນຍາບັນສູງ ແລະ 5. ໜັງສື ພິມ ວຽງຈັນທາຍໃນນາມທີ່ເປັນ ໜັງສືພິມຕ່າງປະເທດກໍຂໍໃຫ້ ເອົາໃຈໃສ່ຕື່ມໃນການໂຄສະ ນາເຜີຍແຜ່ວັດທະນະທຳກໍຄືການທ່ອງທ່ຽວຂອງປະເທດເຮົາອອກສູ່ສາກົນໃຫ້ກວ້າງຂວາງຍິ່ງຂຶ້ນ.
(ຂ່າວ: ຍຸພິນທອງ)