ກະຊວງການຕ່າງປະເທດ ສະຫຼອງປີໃໝ່ ພ້ອມກັບເຜີຍແຜ່ວັດທະນະທຳອັນດີງາມ


...

08.04.2019 8:43     

   ໂອກາດສະເຫຼີມສະຫຼອງປີໃໝ່ລາວ ພສ 2562 ນີ້, ທ່ານລັດຖະມົນຕີກະຊວງການຕ່າງປະເທດໄດ້ຖືເອົາໂອກາດ ອັນສໍາຄັນນີ້ ເຜີຍແຜ່ວັດທະ ນະທຳ ແລະ ຮີດຄອງປະເພນີອັນ ດີງາມຂອງລາວໃຫ້ແກ່ບັນ ດາທູຕານຸທູດ ແລະ ອົງການຈັດຕັ້ງສາກົນປະຈໍາ ສປປ ລາວ ກໍຄືຊາວຕ່າງຊາດ ໄດ້ຮັບຮູ້, ໄດ້ສຳຜັດ ແລະ ເຂົ້າໃຈກ່ຽວກັບບຸນປະເພນີປີໃໝ່ລາວ.
ເພື່ອສົ່ງທ້າຍປີເກົ່າ ພສ 2561 ແລະ ຕ້ອນຮັບປີໃໝ່ພສ 2562, ໃນວັນທີ 6 ເມສາ ຜ່ານມາ ທີ່ສວນພຶກສາ ນະຄອນ ຫຼວງວຽງຈັນ, ກະຊວງການຕ່າງ ປະເທດ ຮ່ວມກັບບັນດາທູຕາ ນຸທູດ ແລະ ອົງການຈັດຕັ້ງສາກົນ ປະຈຳ ສປປ ລາວ ໄດ້ຈັດ ພິທີບາສີສູ່ຂວັນສະເຫຼີມສະ ຫຼອງບຸນປີໃໝ່ລາວຂຶ້ນ ໂດຍມີ ທ່ານ ສະເຫຼີມໄຊ ກົມມະສິດ ກຳມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ; ມີບັນດາທ່ານຄະນະພັກ-ຄະນະນຳກະຊວງ ພ້ອມດ້ວຍຄອບຄົວ ແລະ ພະ ນັກງານອາວຸໂສບຳນານ ພ້ອມດ້ວຍບັນດາພາກສ່ວນກ່ຽວຂ້ອງເຂົ້າຮ່ວມ.
ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ຄະນະພັກ-ຄະນະນຳກະຊວງ ກ່າວສະແດງຄວາມຍິນດີຕ້ອນຮັບ ແລະ ອວຍພອນປີໃໝ່ລາວຕໍ່ບັນດາທ່ານທູຕານຸທູດ, ແຂກທີ່ເຂົ້າຮ່ວມແລະ ພະນັກງານພາຍໃນກະຊວງດ້ວຍຄວາມອົບອຸ່ນ ແລະ ສະໜິດສະໜົມ. ທ່ານ ໄດ້ກ່າວໃຫ້ຮູ້ເຖິງຄວາມໝາຍຄວາມສຳຄັນຂອງບຸນປີໃໝ່ລາວວ່າ: ບຸນປີໃໝ່ລາວແມ່ນບຸນປະເພນີທີ່ສຳຄັນຂອງລາວ ແລະ ເປັນຮີດຄອງປະເພນີອັນດີງາມຂອງຊາດ ທີ່ໄດ້ສືບສານກັນມາຕັ້ງແຕ່ບູຮານນະການ, ບັນດາສຳນັກງານອົງການຈັດຕັ້ງຕ່າງໆທັງພາກລັດ ແລະ ເອກະຊົນ ກໍຄືພໍ່ແມ່ປະຊາຊົນ ກໍໄດ້ຈັດພິທີບາສີສູ່ຂວັນ ແລະ ຫົດສົງນໍ້າໃຫ້ການນຳພັກ-ລັດ, ຜູ້ອາວຸໂສ, ຜູ້ເຖົ້າຜູ້ແກ່ ແລະ ຜູ້ເປັນພໍ່ເປັນແມ່ ກໍຄືຜູ້ທີ່ມີບຸນຄຸນ ເພື່ອເປັນການປັດເປົ່າສິ່ງທີ່ບໍ່ດີບໍ່ງາມໃຫ້ໄປຕາມປີເກົ່າ ແລະ ອວຍພອນປີໃໝ່ໃຫ້ມີແຕ່ໂຊກແຕ່ໄຊ.
ທ່ານ ລັດຖະມົນຕີຍັງໄດ້ກ່າວອີກວ່າ: ໃນໂອກາດສະເຫຼີມສະຫຼອງປີໃໝ່ລາວຄັ້ງນີ້ ຍັງເປັນໂອກາດທີ່ສຳຄັນໃນການເຜີຍແຜ່ວັດທະນະທຳ ແລະ ຮີດຄອງປະເພນີອັນດີງາມຂອງລາວ ໃຫ້ແກ່ບັນດາທູຕານຸທູດ ແລະ ອົງການຈັດຕັ້ງ ສາກົນປະຈຳ ສປປ ລາວ ກໍຄືຊາວຕ່າງຊາດໃຫ້ໄດ້ຮັບຮູ້, ໄດ້ສຳຜັດ ແລະ ເຂົ້າໃຈຢ່າງເລິກ ເຊິ່ງກ່ຽວກັບບຸນປະເພນີປີໃໝ່ຂອງລາວເຮົາ, ພ້ອມກັນນີ້ຍັງເປັນການສົ່ງເສີມຄວາມເຂົ້າອົກເຂົ້າໃຈ ແລະ ຮັດແໜ້ນການພົວພັນຮ່ວມມືອັນດີງາມ ລະຫວ່າງ ພະນັກງານກະຊວງການຕ່າງປະເທດ ກໍຄືນັກການທູດລາວ ກັບບັນດາທູຕານຸທູດ ແລະ ອົງການຈັດຕັ້ງສາກົນປະຈຳ ສປປ ລາວ ກໍຄືບັນດາປະເທດເພື່ອນມິດໃນພາກພື້ນ ແລະ ສາກົນ.
(ຂ່າວ-ພາບ: ສຸກສະຫວັນ)