ຮອງປະທານສະພາແຫ່ງຊາດ ລົງເຄື່ອນໄຫວເຮັດວຽກຢູ່ແຂວງຄຳມ່ວນ


...

09.04.2019 9:22     

   ໃນລະຫວ່າງວັນທີ 4 - 5 ເມສາຜ່ານມາ ທ່ານ ສົມພັນ ແພງຄໍາມີ ກໍາມະການສູນກາງພັກ ຮອງປະທານສະພາແຫ່ງຊາດພ້ອມດ້ວຍຄະນະໄດ້ລົງເຄື່ອນໄຫວເຮັດວຽກຢູ່ແຂວງຄໍາມ່ວນຢ່າງເປັນທາງການໂດຍໄດ້ຮັບການຕ້ອນຮັບຈາກທ່ານ ສົມໃຈ ເພັດສີນວນ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍຄະນະ .
ໃນການເຄື່ອນໄຫວຄັ້ງນີ້ທ່ານຮອງປະທານສະພາແຫ່ງຊາດພ້ອມດ້ວຍຄະນະແມ່ນໄດ້ເຮັດວຽກຮ່ວມກັບທ່ານຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ແລະ ຫົວໜ້າພະແນກພາຍໃນພ້ອມທັງກ່າວຈຸດປະສົງຂອງການເຮັດວຽກຮ່ວມກັນໂດຍສະເພາະແມ່ນການສະເໜີຄົ້ນຄວ້າກົງຈັກການຈັດຕັ້ງ ແລະ ບຸກຄະລາກອນ ສພຂ ຊຸດທີ 2 ແລະ ຄະນະ ສສຊ ປະຈໍາເຂດເລືອກຕັ້ງຊຸດທີ 9 ທີ່ຈະມາເຖິງໃນປີ 2021 ພ້ອມທັງຮັບຟັງຄໍາຄິດເຫັນຈາກຮອງເລຂາພັກແຂວງ, ຄະນະຈັດຕັ້ງແຂວງ ແລະ ພະແນກພາຍໃນແຂວງ .
ຈາກນັ້ນທ່ານຮອງປະ ທານສະພາແຫ່ງຊາດພ້ອມດ້ວຍຄະນະກໍໄດ້ເຮັດວຽກຮ່ວມກັບຄະນະສະມາຊິກສະພາປະຊາຊົນແຂວງໂດຍທ່ານ ສົມພັນ ແພງຄໍາມີ ກໍໄດ້ກ່າວຈຸດປະສົງ ແລະ ມີຄໍາເຫັນກ່ຽວກັບການເຮັດວຽກຮ່ວມກັນວ່າ : ເພື່ອເປັນການປັບປຸງວຽກງານສະພາແຫ່ງຊາດຊຸດທີ 9 ແລະ ສະພາປະຊາຊົນຂັ້ນແຂວງຊຸດທີ 2 ໃຫ້ມີຄຸນນະພາບດີ ແລະ ໄວຂຶ້ນກວ່າເກົ່າຄະນະປະຈໍາສະພາແຫ່ງຊາດ ຈຶ່ງໄດ້ມີການຄົ້ນຄວ້າຕົກລົງໃຫ້ມີການກະກຽມເພື່ອຄົ້ນຄວ້າລົງເລິກທຸກດ້ານທັງນີ້ກໍເພື່ອເປັນການຮອງຮັບໃຫ້ແກ່ການກະກຽມເປີດກອງປະຊຸມສະພາຊຸດໃໝ່ໃຫ້ໄດ້ຮັບຜົນດີ ດັ່ງນັ້ນເພື່ອເປັນພື້ນຖານບ່ອນອີງໃນການປັບປຸງບູລະນະທາງກົງຈັກ ແລະ ບຸກຄະລາກອນໃຫ້ແກ່ການຈັດຕັ້ງນັ້ນມັນມີຄວາມຈໍາເປັນທີ່ຈະຕ້ອງໄດ້ມີການທົບທວນຄືນວ່າໃນໄລຍະ 3 ປີກວ່າ ຂອງການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນຂັ້ນແຂວງ ກໍຄືຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງໃນໄລຍະຜ່ານມານີ້ວ່າອັນໃດມີດ້ານດີ, ມີຜົນໄດ້ຮັບ ແລະ ອັນໃດທີ່ພວກເຮົາຄວນມີການຄົ້ນຄວ້າພິຈາລະນາແກ້ໄຂ ຊຶ່ງໃນການຕີລາຄາບັນຫາຂໍ້ຄົງຄ້າງໃນໄລຍະຜ່ານມາເຖິງວ່າຈະແກ້ໄຂໄດ້ໝົດ ແຕ່ວ່າເນື້ອໃນຈິດໃຈຕົ້ນຕໍຂອງການລົງມາເຄື່ອນໄຫວໃນຄັ້ງນີ້ແມ່ນເພື່ອເກັບກໍາສະພາບຄວາມເປັນຈິງຂອງການປະ ຕິບັດວຽກງານຂອງສະພາປະຊາຊົນຂັ້ນແຂວງ ກໍຄືຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງເພື່ອນໍາໄປປັບປຸງໃຫ້ມັນຄ່ອງຕົວກວ່າເກົ່າ .
ທ່ານ ສົມໃຈ ເພັດສີນວນໄດ້ລາຍງານໂດຍຫຍໍ້ກ່ຽວກັບສະພາບການເຄື່ອນໄຫວວຽກງານປະຈໍາປີ 2018 ແລະ ທິດທາງແຜນການປະຈໍາປີ 2019 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ ຊຶ່ງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ປະກອບມີສະມາຊິກປະຈໍາເຂດທັງໝົດ 8 ທ່ານ, ຍິງ 3 ທ່ານ, ປະຈໍາຢູ່ສູນກາງ 3 ທ່ານ, ຍິງ 1 ທ່ານ, ຄວບຕໍາແໜ່ງສະມາຊິກສະພາປະຊາຊົນແຂວງມີ 5 ທ່ານ, ຍິງ 2 ທ່ານ. ສໍາລັບການປະຕິບັດສິດ ແລະ ໜ້າທີ່ດ້ານນິຕິບັນຍັດແມ່ນໄດ້ເອົາໃຈໃສ່ເຂົ້າຮ່ວມກອງປະຊຸມສະໄໝສາມັນເທື່ອທີ 5, ເທື່ອທີ 6 ຂອງສະພາແຫ່ງຊາດຊຸດທີ VIII ແລະ ບັນດາກອງປະຊຸມຕ່າງໆທີ່ສະພາແຫ່ງຊາດຈັດຂຶ້ນທີ່ພົວພັນເຖິງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ . ພາຍຫຼັງສໍາເລັດກອງປະຊຸມສະໄໝສາມັນຂອງສະພາແຫ່ງຊາດແຕ່ລະຄັ້ງຄະນະສະ ມາຊິກສະພາແຫ່ງຊາດ ປະຈໍາເຂດເລືອກຕັ້ງໄດ້ເອົາໃຈໃສ່ຊຸກຍູ້ຕິດຕາມ, ກວດກາການ ຈັດຕັ້ງປະຕິບັດມະຕິກອງປະ ຊຸມສະພາແຫ່ງຊາດ, ແຜນພັດທະນາເສດຖະກິດ - ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2018 ແລະ ທິດທາງວຽກງານຈຸດສຸມໃນຕໍ່ໜ້າຂອງລັດຖະບານ ກໍຄືອົງການປົກຄອງແຂວງ, ຕິດຕາມ, ກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍຂອງເຈົ້າໜ້າທີ່ຕໍາຫຼວດ, ອົງການໄອຍະການ, ສານປະຊາຊົນ ແລະ ພະແນກຍຸຕິທໍາແຂວງເປັນປົກກະຕິ. ນອກນັ້ນຍັງໄດ້ເຄື່ອນໄຫວວຽກງານຮ່ວມກັບຄະນະສະເພາະກິດຂອງສະເພາະແຫ່ງຊາດທີ່ລົງມາເຄື່ອນໄຫວຕິດຕາມ, ກວດກາຢູ່ແຂວງຄໍາມ່ວນ ໂດຍສະເພາະການຕິດຕາມ,ກວດກາຜົນກະທົບທາງດ້ານສິ່ງແວດລ້ອມ ແລະ ການແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນໄດ້ 4 ຄັ້ງ, ໄດ້ປະສານສົມທົບກັບພາກສ່ວນອົງການທີ່ກ່ຽວຂ້ອງໃນການແກ້ໄຂຄໍາຮ້ອງທຸກຂອງປະຊາຊົນທີ່ມາສະເໜີຕໍ່ສະພາປະຊາຊົນແຂວງມີທັງໝົດ 27 ເລື່ອງ, ແກ້ໄຂແລ້ວ 27 ເລື່ອງ, ຄໍາສະເໜີມີ 13 ເລື່ອງ, ສົ່ງໃຫ້ພາກສ່ວນກ່ຽວຂ້ອງແກ້ໄຂແລ້ວ. ດ້ານການພົບປະ ປະຊາຊົນແມ່ນໄດ້ຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 5, ເທື່ອທີ 6 ຂອງສະພາແຫ່ງຊາດຊຸດທີ VIII ຢູ່ບັນດາຂະແໜງການອ້ອມຂ້າງແຂວງ, ເມືອງ ແລະ ບ້ານໄດ້ທັງໝົດ 120 ຈຸດ, ມີຜູ້ເຂົ້າຮ່ວມຮັບຟັງ 18.625 ເທື່ອຄົນ, ຍິງ 12.781 ເທື່ອຄົນ. ນອກນັ້ນຍັງໄດ້ປຸກລະດົມເຄື່ອງອຸປະໂພກ -ບໍລິໂພກ ເພື່ອຊ່ວຍເຫຼືອພໍ່ແມ່ປະຊາຊົນທີ່ຖືກໄພພິບັດທາງທໍາມະຊາດ ( ນໍ້າຖ້ວມ ) ລວມມູນຄ່າທັງໝົດ 212.760.000 ກີບ .
ສໍາລັບສະພາປະຊາຊົນແຂວງຄໍາມ່ວນປະກອບມີ 3 ຄະນະກໍາມະການ ແລະ ຄະນະເລຂາທິການ, ປະກອບມີ 9 ຂະແໜງການຊ່ວຍວຽກ, ດ້ານບຸກຄະລາກອນສະພາປະຊາຊົນແຂວງປະກອບມີຄະນະປະທານ 3 ທ່ານ, ຍິງ 1 ທ່ານ, ຄະນະປະຈໍາ 7 ທ່ານ, ຍິງ 2 ທ່ານ, ສສຂ ( ຜູ້ປະຈໍາການ) 3 ທ່ານ, ຍິງ 1 ທ່ານ, ຮອງເລຂາທິການ 2 ທ່ານ, ຫົວໜ້າຂະແໜງ 2 ທ່ານ, ຍິງ 2 ທ່ານ, ຮອງຫົວໜ້າຂະແໜງ 3 ທ່ານ, ຍິງ 1 ທ່ານ, ພະນັກງານວິຊາການຊ່ວຍວຽກ 32 ທ່ານ, ຍິງ 17 ທ່ານ . ລະດັບວິຊາສະເພາະຊັ້ນກາງ 1 ທ່ານ, ຊັ້ນສູງມີ 9 ທ່ານ, ຍິງ 7 ທ່ານ, ປະລິນຍາຕີ 33 ທ່ານ, ຍິງ 14 ທ່ານ, ປະລິນຍາໂທ 5 ທ່ານ, ຍິງ 2 ທ່ານ. ດ້ານການທາບທາມເປົ້າໝາຍຜູ້ລົງສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງຄໍາມ່ວນຊຸດທີ II ໃນໄລຍະຜ່ານມາ ຊຶ່ງໄດ້ນໍາເອົາລາຍຊື່ຂອງສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນຊຸດທີ VIII (ສສຊ ຄວບຕໍາແໜ່ງ ສສຂ) ຈໍານວນ 5 ທ່ານ ແລະ ສະມາຊິກສະພາປະຊາຊົນແຂວງຄໍາມ່ວນຊຸດທີ I ຈໍານວນ 24 ທ່ານ ລົງທາບທາມພາຍໃນບັນດາສະມາຊິກສະພາແຫ່ງຊາດທີ່ຄວບຕໍາແໜ່ງ ແລະ ສະມາຊິກສະພາປະຊາຊົນແຂວງຈໍານວນທັງໝົດ 27 ທ່ານຕາມແບບຟອມທີ່ຄະນະເລຂາທິການສະພາປະຊາຊົນແຂວງສ້າງຂຶ້ນໄດ້ສໍາເລັດແລ້ວ 3 ຮອບ. ນອກຈາກນັ້ນໃນກອງ ປະຊຸມຍັງໄດ້ລາຍງານຂະ ແໜງການຊ່ວຍວຽກ ແລະ ໜ່ວຍ ສສຂ ປະຈໍາເຂດເລືອກຕັ້ງຂັ້ນເມືອງ, ການສ້າງນິຕິກໍາທີ່ສໍາຄັນຂອງທ້ອງຖິ່ນ ແລະ ນິຕິກໍາ 5 ສະບັບຂອງ ສພຂ ຈາກບັນດາຄະນະກໍາມະການ, ເລຂາທິການສະພາປະຊາຊົນແຂວງ ແລະ ການຄົ້ນຄວ້າ,ປຶກສາຫາລືປະກອບຄໍາຄິດເຫັນຈາກຜູ້ແທນທີ່ເຂົ້າຮ່ວມໃນກອງປະຊຸມຕື່ມອີກ .
(ຂ່າວ-ພາບ : ແດງສະຫວັດ ແສນພານິດ)