ລາວ-ອາເມຣິກາ ປຶກສາຫາລືການຮ່ວມມືສອງຝ່າຍ


...

09.04.2019 9:24     

   ກອງປະຊຸມປຶກສາຫາລືແບບກວມລວມ ກ່ຽວກັບ ການຮ່ວມມືສອງຝ່າຍ ລະຫວ່າງ ສປປ ລາວ ແລະ ສະຫະລັດ ອາເມຣິກາ ຄັ້ງທີ 9 ໄດ້ຈັດຂຶ້ນເມື່ອບໍ່ດົນມານີ້ ທີ່ສະຫະລັດອາເມຣິກາ ພາຍໃຕ້ການເປັນປະທານຮ່ວມ ຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ປາຕຣິກ ເມີຟີ (Patrick Murphy), ຮອງຜູ້ຊ່ວຍລັດຖະມົນຕີກະຊວງຕ່າງປະເທດ ສະຫະລັດ ອາເມຣິກາ.
ໃນໂອກາດກອງປະຊຸມດັ່ງກ່າວ, ຄະນະຜູ້ແທນທັງສອງຝ່າຍ ລາວ-ອາເມຣິກາ ໄດ້ມີການທົບທວນ ແລະ ສະຫຼຸບຕີລາຄາຄືນການພົວພັນຮ່ວມມື ລະຫວ່າງ ສອງປະເທດ ແຕ່ກອງປະຊຸມປຶກສາຫາລືແບບກວມລວມ ລະຫວ່າງ ສປປ ລາວ ແລະ ສະຫະລັດ ອາເມຣິກາ ຄັ້ງທີ 8, ຊຶ່ງໄດ້ຈັດຂຶ້ນ ທີ່ ນະຄອນຫຼວງ ວໍຊິງຕັນ ດີຊີ, ສະຫະລັດ ອາເມຣິກາ ໃນເດືອນ ກໍລະກົດ 2017, ໂດຍສະເພາະ ທັງສອງຝ່າຍໄດ້ດຳເນີນການປຶກສາຫາລື ແລະ ແລກປ່ຽນຄຳຄິດຄຳເຫັນນຳກັນຢ່າງກວ້າງຂວາງ ກ່ຽວກັບບັນຫາຕ່າງໆທີ່ນອນຢູ່ໃນຂອບການຮ່ວມມືສອງຝ່າຍ ເຊັ່ນ: ວຽກງານມະນຸດສະທຳ ເພື່ອຊອກຄົ້ນຫາສິ່ງເສດເຫຼືອ ຂອງທະຫານອາເມຣິກາ ທີ່ຫາຍສາບສູນໃນປາງສົງຄາມ (MIA), ການເກັບກູ້ລະເບີດທີ່ບໍ່ທັນແຕກ (UXO), ການຮ່ວມມືດ້ານສາທາລະນະສຸກ, ການສຶກສາ ແລະ ວັດທະນະທຳ, ການຊຸກຍູ້ສົ່ງເສີມການພົວພັນຮ່ວມມືດ້ານການຄ້າ-ການລົງທຶນ ແລະ ບັນຫາອື່ນໆ, ການຈັດຕັ້ງປະຕິບັດ ແລະ ຜັນຂະຫຍາຍຖະແຫຼງການຮ່ວມວ່າດ້ວຍການເປັນຄູ່ຮ່ວມມືແບບກວມລວມ ລະຫວ່າງ ສອງປະເທດ ໃນໂອກາດການຢ້ຽມຢາມລັດຖະກິດຄັ້ງປະຫວັດສາດ ຢູ່ ສປປ ລາວ ຂອງ ປະທານາທິບໍດີ ບາຣັກ ໂອບາມາ ໃນເດືອນ ກັນຍາ 2016. ນອກຈາກນັ້ນ, ທັງສອງຝ່າຍຍັງໄດ້ປຶກສາຫາລືກ່ຽວກັບການຮ່ວມມືອາເມຣິກາກັບບັນດາປະເທດແມ່ນ້ຳຂອງ (LMI) ແລະ ບັນຫາສະພາບການພາກພື້ນ ແລະ ສາກົນ ທີ່ຕ່າງຝ່າຍໃຫ້ຄວາມສົນໃຈ, ເປັນຕົ້ນແມ່ນ ການແລກປ່ຽນທັດສະນະກ່ຽວກັບວຽກງານອາຊຽນ, ບົດບາດຂອງອາເມຣິກາໃນພາກພື້ນອາຊີ-ປາຊີຟິກ ແລະ ບັນຫາອື່ນໆ ອີກຈຳນວນໜຶ່ງ.
ຜ່ານການປຶກສາຫາລື ສອງຝ່າຍເຫັນວ່າ ການພົວ ພັນຮ່ວມມືລະຫວ່າງສອງປະເທດໃນປັດຈຸບັນ ມີທ່ວງທ່າຂະຫຍາຍຕົວໃໝ່. ຝ່າຍອາເມຣິກາ ສະແດງຄວາມຂອບໃຈ ຕໍ່ການຮ່ວມມືຂອງຝ່າຍລາວໃນໄລຍະຜ່ານມາ ລວມທັງການເຮັດບົດບາດເປັນປະເທດປະສານງານຕາງໜ້າອາຊຽນ ໃນການພົວພັນຮ່ວມມື ອາຊຽນ-ອາເມຣິກາ ແລະ ຢືນຢັນທີ່ຈະສືບຕໍ່ສະໜັບສະໜູນ ແລະ ໃຫ້ການຮ່ວມມືອັນດີ ກັບ ສປປ ລາວ ໃນອະນາຄົດ. ພ້ອມກັນນັ້ນ, ກໍຈະປະກອບສ່ວນຢ່າງເໝາະສົມເຂົ້າໃນການຈັດຕັ້ງປະຕິບັດບັນດາໂຄງການຕ່າງໆ ທີ່ ອາເມຣິກາ ມີສ່ວນຮ່ວມກັບບັນດາປະເທດອາຊຽນ ກໍຄືບັນດາປະເທດໃນພາກພື້ນອາຊີ-ປາຊີຟິກ.
(ຂ່າວ-ພາບ: ກະຊວງການຕ່າງປະເທດ)