ວາງສະແດງຜົນງານສິລະປະຮູບແຕ້ມຍຸກສະໄໝຂອງນັກຈິດຕະກອນຈີນ


...

09.04.2019 9:21     

   ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ຫໍພິພິທະພັນແຫ່ງຊາດຮ່ວມກັບນັກຈິດຕະກອນ ສປ ຈີນໄດ້ເປີດງານວາງສະແດງຜົນງານສິລະປະຮູບແຕ້ມຍຸກສະໄໝຂອງນັກຈິດຕະກອນຜູ້ມີຊື່ສຽງຂອງຈີນຂຶ້ນໃນວັນທີ 8ເມສານີ້ ທີ່ຫໍພິພິທະພັນແຫ່ງຊາດ ໂດຍໃຫ້ກຽດເຂົ້າຮ່ວມຂອງ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ, ທ່ານ ຈຽງຈາຍຕົງ ເອກອັກຄະລັດຖະທູດ ສປ ຈີນ ປະຈຳ ສປປລາວ, ແຂກຖືກເຊີນ ແລະ ນັກຈິດຕະກອນເຂົ້າຮ່ວມ.
ທ່ານ ອຸ່ນທວງ ຂາວພັນ ກ່າວວ່າ: ງານວາງສະແດງຜົນງານໃນຄັ້ງນີ້ ແມ່ນກິດຈະກຳອັນໜຶ່ງທີ່ໄດ້ປະກອບສ່ວນເຂົ້າໃນວຽກງານໂຄສະນາສົ່ງ ເສີມປີທ່ອງທ່ຽວ ລາວ-ຈີນ 2019 ໃຫ້ປະຊາຊົນສອງຊາດລາວ-ຈິນ ໄດ້ຮັບຮູ້ ຊຶ່ງກັນ ແລະ ກັນຍິ່ງຂຶ້ນ ຊຶ່ງໃນຕໍ່ໜ້ານີ້ສອງປະເທດລາວ-ຈີນ ຍັງຈະມີອີກຫຼາຍກິດຈະກຳທີ່ຈະຈັດຕັ້ງຂຶ້ນອີກແຕ່ນີ້ເຖິງທ້າຍປີເຊັ່ນ: ການຈັດຕັ້ງສຳມະນາສົ່ງເສີມການທ່ອງທ່ຽວ, ການແລກປ່ຽນສິລະປະວັດທະນະທຳ, ວາງສະ ແດງຮູບພາບ, ວາງສະແດງການທ່ອງທ່ຽວ ແລະ ອື່ນໆອີກຈຳນວນໜຶ່ງ. ທ່ານກ່າວຕື່ມວ່າ: ໃນໂອກາດທີ່ພວກທ່ານໄດ້ມາຢ້ຽມຢາມ ສປປ ລາວ ຄັ້ງນີ້ ຈະເປັນໂອກາດດີເພື່ອໃຫ້ບັນດາທ່ານໄດ້ໄປຊົມສະຖານທີ່ທ່ອງທ່ຽວທາງດ້ານປະຫວັດສາດ, ທຳມະຊາດ ແລະ ວັດທະນະທຳຂອງ ສປປ ລາວ ຊຶ່ງພວກເຮົາກໍໄດ້ກະກຽມກິດຈະກຳຫຼາຍໆຢ່າງ ພ້ອມດ້ວຍບັນດາຜະລິດຕະພັນການທ່ອງທ່ຽວທີ່ໜ້າສົນໃຈໄວ້ຄອຍຕ້ອນຮັບບັນດາທ່ານດ້ວຍນໍ້າໃຈຮັກຫອມແຂກຄົນຂອງປະຊາຊົນລາວບັນດາເຜົ່າ.
ບັນດາຜົນງານທີ່ນຳມາວາງສະແດງຄັ້ງນີ້ມີ 70 ຜົນ ງານຂອງນັກຈິດຕະກອນທີ່ມີຊື່ສຽງ 6 ທ່ານຂອງ ສປ ຈີນ, ບັນດາຜົນງານດັ່ງກ່າວລວມມີຮູບແຕ້ມສິລະປະແບບຈີນ, ຮູບການຂຽນ, ການແກະສະຫຼັກ ແລະ ສິລະປະສີນໍ້າມັນ ແລະ ອື່ນໆ ຊຶ່ງເນື້ອໃນສະແດງເຖິງຊີວິດວັດທະນະທຳຂອງຈີນ, ງານວາງສະແດງດັ່ງກ່າວ ຈະໄດ້ດຳເນີນຮອດວັນທີ 12 ເມສາ ຈຶ່ງຈະສຳເລັດ.
(ຂ່າວ: ສຳນານ)