ຄິວລົດສາຍໃຕ້ກຽມເພີ່ມລົດ 30 ຄັນ ຂົນສົ່ງຜູ້ໂດຍສານໄລຍະບຸນປີໃໝ່ລາວ


...

09.04.2019 9:21     

   ສະຖານີຂົນສົ່ງໂດຍສານສາຍໃຕ້-ສາຍຕ່າງປະເທດກຽມເພີ່ມລົດໂດຍສານອີກ 30 ຄັນເພື່ອອຳນວຍຄວາມສະດວກໃຫ້ແກ່ຜູ້ໂດຍສານໃນໄລຍະບຸນປີໃໝ່ລາວ ພສ 2562, ພ້ອມທັງຮັບປະກັນບໍ່ໃຫ້ມີຜູ້ໂດຍສານຕົກຄ້າງ ແລະ ບໍ່ອະນຸຍາດໃຫ້ຜູ້ໂດຍສານນັ່ງຕັ່ງເສີມຢ່າງເດັດຂາດ. ທ່ານ ວັນເພັນ ສີສຸກ ຜູ້ອຳນວຍການສະຖານີຂົນສົ່ງໂດຍສານສາຍໃຕ້-ສາຍຕ່າງ ປະເທດໄດ້ໃຫ້ສຳພາດແກ່ນັກຂ່າວໜັງສືພິມປະຊາຊົນໃນວັນທີ 8 ເມສາຜ່ານມາໃຫ້ຮູ້ວ່າ: ເພື່ອເປັນການຫ້າງຫາກະກຽມ ແລະ ອຳນວຍຄວາມສະດວກໃຫ້ແກ່ຜູ້ໂດຍສານສາຍໃຕ້ ແລະ ຕ່າງປະເທດ, ສະຖານີຂົນສົ່ງໂດຍສານສາຍໃຕ້-ສາຍຕ່າງປະເທດພວກເຮົາໄດ້ເພີ່ມລົດໂດຍສາຍອີກ 30 ຄັນເພື່ອອຳນວຍຄວາມສະດວກໃຫ້ແກ່ຜູ້ໂດຍສານໃນໄລຍະບຸນປີໃໝ່ລາວປີນີ້, ພ້ອມທັງຮັບປະກັນບໍ່ໃຫ້ມີຜູ້ໂດຍສານຕົກຄ້າງໃນວັນບຸນກຸດສົງການນີ້ ຊຶ່ງຄາດວ່າຈະມີຜູ້ໂດຍສານເພີ່ມຂຶ້ນໃນໄລຍະວັນທີ 10 ເຖິງ 13 ເມສານີ້.
ໃນນັ້ນເພື່ອຮັບປະກັນໃຫ້ແກ່ການເດີນທາງໃຫ້ມີຄວາມປອດໄພໃນການບໍລິການຂົນສົ່ງຜູ້ໂດຍສານທາງພະແນກໂຍທາທິການ ແລະ ຂົນສົ່ງຮ່ວມກັບຕຳຫຼວດຈະລາຈອນນະຄອນຫຼວງໄດ້ລົງມາຕິດຕາມກວດກາສະພາບເຕັກນິກລົດ, ເອກະສານ ແລະ ສຸຂະພາບຂອງພະນັກງານຂັບລົດໃຫ້ມີຄວາມພ້ອມໃນການບໍລິການຂົນສົ່ງຜູ້ໂດຍສານສາຍໃຕ້ ແລະ ສາຍຕ່າງປະເທດໃຫ້ມີຄວາມປອດໄພໃນການໃຊ້ລົດໃຊ້ຖະໜົນຕະຫຼອດການເດີນທາງ, ຂົນສົ່ງຜູ້ໂດຍສານຕະຫຼອດໄລຍະປີໃໝ່ລາວ.
ສ່ວນລາຄາຂອງການບໍລິການໃນສະຖານີພວກເຮົາແມ່ນຮັກສາລາຄາປົກກະຕິ (ລາຄາເກົ່າ) ເລີ່ມແຕ່ 40.000 ກີບຈົນເຖິງສູງສຸດ 220.000 ກີບ, ໃນນັ້ນສາຍທີ່ເດັ່ນກວ່າໝູ່ແມ່ນລົດສາຍສະຫວັນ ແລະ ປາກເຊ, ສ່ວນເວລາເລີ່ມໃຫ້ບໍລິການແມ່ນເລີ່ມແຕ່ 4 ໂມງເຊົ້າໄປຈົນເຖິງ 21:00 ໂມງ, ດັ່ງນັ້ນ ເພື່ອອຳນວຍຄວາມສະດວກໃຫ້ແກ່ຜູ້ໂດຍສານຂ້າພະເຈົ້າຂໍແຈ້ງມາຍັງຜູ້ໂດຍສານທີ່ມີຈຸດປະສົງທີ່ຈະເດີນທາງໄປບັນດາແຂວງທາງພາກໃຕ້ແມ່ນໃຫ້ມາກ່ອນກຳນົດເວລາເພາະວ່າຖ້າຫາກລົດໂດຍສານຄັນໃດມີຜູ້ໂດຍ ສານຄົບຕາມຈຳນວນແມ່ນຈະໄດ້ອອກເດີນທາງໄດ້ເລີຍ ຊຶ່ງອາດຈະບໍ່ເປັນໄປຕາມເວລາທີ່ກຳນົດ (ອອກທຸກໆ 30 ນາທີ), ສ່ວນວ່າກໍລະນີມີຕັ່ງເສີມນັ້ນທາງສະຖານີພວກເຮົາຂໍຢືນຍັນວ່າ ບໍ່ມີຕັ່ງເສີມໃຫ້ຜູ້ໂດຍສານນັ່ງເດັດຂາດ.
(ຂ່າວ-ພາບ : ສຸກສາຄອນ)