ເລັ່ງກໍ່ສ້າງຄານຂົວທາງລົດໄຟ ລາວ-ຈີນ


...

10.04.2019 9:18     

   ສື່ມວນຊົນ ລາວ ຈີນ ສືບ ຕໍ່ສຳພາດ ທີ່ໂຮງງານຜະລິດ ຄານຂົວໂຄງການກໍ່ເສັ້ນ ທາງ ລົດໄຟລາວຈີນ ໃນເມື່ອບໍ່ດົນຜ່ານມາ, ທີ່ບ້ານສົງເປືອຍ ເມືອງນາຊາຍທອງ ນະຄອນ ຫຼວງວຽງຈັນ. ທ່ານ ຫູປິ່ນ ຜູ້ຮັບຜິດຊອບວຽກງານກໍ່ສ້າງພາກສະໜາມໂຮງງານຜະລິດຄານຂົວເມືອງນາຊາຍທອງ ນະຄອນຫຼວງວຽງຈັນໄດ້ໃຫ້ສຳພາດຕໍ່ສື່ມວນຊົນວ່າ: ໂຮງງານຜະລິດຄານຂົວແຫ່ງນີ້ເປັນໂຮງງານແຫ່ງທຳອິດໃນນະຄອນຫຼວງວຽງຈັນ ໄດ້ຮັບການສ້າງຕັ້ງຂຶ້ນໃນເດືອນກຸມພາ ປີ 2018 ເລີ່ມຜະລິດ ແລະ ຕິດຕັ້ງຄານຂົວອັນທຳອິດໃນວັນທີ 2 ທັນວາປີ 2018 ໃນເນື້ອທີ່ 10 ກວ່າເຮັກຕາ, ແຕ່ລະມື້ສາມາດຜະລິດຄານຂົວໄດ້ສະເລ່ຍ4 ອັນຕໍ່ມື້, ຄານຂົວອັນໜຶ່ງມີຄວາມຍາວ 32 ແມັດ , ປັດຈຸບັນ ສາມາດຕິດຕັ້ງຄານຂົວໄດ້ ແລ້ວ 4 ກິໂລແມັດ, ຊຶ່ງມີຄວາມຍາວຂອງທາງລົດໄຟທັງໝົດ 63 ກິໂລແມັດ , ຄານ ຂົວສ່ວນໜຶ່ງໄດ້ເຮັດສຳເລັດ ແລະ ກຽມໄວ້ແລ້ວແຕ່ຍັງບໍ່ທັນໄດ້ຕິດຕັ້ງ.ທ່ານ ຫູປິ່ນ ໄດ້ກ່າວໃຫ້ຮູ້ຕື່ມອີກວ່າ: ໂຮງງານຜະລິດຄານຂົວມີກຳມະກອນທັງໝົດ 400 ກວ່າຄົນ ໃນນັ້ນເປັນກຳມະກອນຄົນລາວ 100 ກວ່າຄົນ, ຈຳນວນໜຶ່ງແມ່ນກຳມະກອນທີ່ມາຈາກເມືອງສະໜາມໄຊ ແຂວງອັດຕະປື ຄຽງຄູ່ກັນນັ້ນທາງໂຮງງານຍັງໄດ້ເອົາໃຈໃສ່ໃນການຮັກສາສິ່ງແວດລ້ອມເປັນຕົ້ນໄດ້ມີອ່າງບໍາບັດນຳ້ເປື້ອນທີ່ໄດ້ມາດ ຕະຖານ, ມີຂຸມສຳລັບຝັງຂີ້ເຫຍື້ອ, ຄາດວ່າການຜະລິດຄານຂົວຈະໃຫ້ສຳເລັດຕາມແຜນ ແລະ ເປີດນໍາໃຊ້ທັນເວລາຕາມແຜນການທີ່ວາງໄວ້, ຕາມຄຳຂວັນຂອງບໍລິສັດທີ່ວ່າ: ສ້າງທາງລົດໄຟລາວຈີນໃຫ້ໄດ້ຄຸນນະພາບດີເດັ່ນ, ຍືນຍົງ ແລະ ສ້າງທາງລົດໄຟລາວ ຈີນ ໃຫ້ເປັນສັນຍາລັກໃໝ່ແຫ່ງມິດຕະພາບກາຍເປັນມູນເຊື້ອໃນຍຸກສະໄໝໃໝ່. (ຂ່າວພາບ: ພູວັນ)