ການເກັບກ່ຽວເຂົ້ານາແຊງເມືອງໜອງບົກ ຈະໃຫ້ສຳເລັດ ໃນທ້າຍເດືອນນີ້


...

10.04.2019 9:19     

   ທ່ານ ຄໍາມອນ ພົມພິພັກ ຫົວໜ້າຫ້ອງການກະສິກໍາ ແລະ ປ່າໄມ້ເມືອງໜອງບົກ ແຂວງຄຳມ່ວນ ໄດ້ໃຫ້ສຳພາດກ່ຽວກັບ ການຜະລິດເຂົ້າລະດູແລ້ງຂອງ ຊາວກະສິກອນໃນທົ່ວເມືອງ ເປັຕົ້ນແມ່ນການຜະລິດເຂົ້າ ນາແຊງ ປີ2019 ຊຶ່ງມີແຜນ ການສູ້ຊົນໃນຈຳນວນ 2.500 ເຮັກຕາ ໃນ 24 ໂຄງການຊົນລະ ປະທານ ໃນນັ້ນທາງເມືອງໄດ້ເອົາໃຈໃສ່ຈັດຕັ້ງປະຕິບັດຢ່າງ ເປັນຂະບວນ ຊຶ່ງສາມາດປະຕິ ບັດຕົວຈິງໄດ້ 2.961 ເຮັກຕາ ເທົ່າກັບ 118% ຂອງເນື້ອທີ່ ແຜນການ, ມີຈຳນວນ 25 ໂຄງການ, ໃນນັ້ນເຂດໂຄງການຊົນລະປະທານ ປະຕິບັດໄດ້ 2.600 ເຮັກຕາ, ນອກໂຄງການຊົນລະປະທານ ໂດຍສະເພາະແມ່ນ ປະຊາ ຊົນໄດ້ໃຊ້ນຳ້ຫ້ວຍ, ນຳ້ໜອງ ແລະ ບຶງຕ່າງໆ ເພື່ອທຳການຜະລິດລະດູແລ້ງ ໃນການປູກເຂົ້ານາແຊງ ມີຈຳນວນ 15 ບ້ານ, ລວມເນື້ອທີ່ 361 ເຮັກຕາ. ສ່ວນການເກັບກ່ຽວ ມາຮອດປັດຈຸບັນແມ່ນປະຕິບັດໄດ້ແລ້ວ 80% ແລະ ຄາດວ່າຈະໃຫ້ສຳເລັດ 100% ໃນທ້າຍເດືອນເມສານີ້, ສະເລ່ຍສະມັດຖະພາບແມ່ນ 5,7 ໂຕນຕໍ່ເຮັກຕາ. ສຳລັບການປູກພືດລະດູແລ້ງ ແມ່ນໄດ້ວາງເປົ້າໝາຍ 1.705 ເຮັກຕາ, ປະຕິບັດໄດ້ 100% ຢູ່ໃນນັ້ນ ເດັ່ນກວ່າໝູ່ແມ່ນການປູກຢາສູບ, ຜັກບົ່ວຫົວແດງ, ໝາກເຜັດ, ໝາກເຂືອ, ໝາກຖົ່ວ, ໝາກແຕງ ແລະ ພືດ ຜັກຊະນິດຕ່າງໆ ທີ່ສາມາດສ້າງລາຍຮັບໃຫ້ແກ່ຊາວກະສິກອນພາຍໃນເມືອງ ເດັ່ນກ່ວາໝູ່ແມ່ນກຸ່ມດອນຂຽວ ຊຶ່ງໄດ້ມີຄອບຄົວຕົວແບບ ທີ່ສ້າງລາຍຮັບໄດ້ດີ ກ່ວາປີຜ່ານມາ. ນອກຈາກນີ້ແລ້ວ ທາງຫ້ອງການກະສິກຳ ແລະ ປ່າໄມ້ເມືອງ ຍັງໄດ້ເອົາ ໃຈໃສ່ລົງຊຸກຍູ້ຕິດຕາມກຸ່ມຜະ ລິດແນວພັນເຂົ້າ 2 ກຸ່ມຄື: ກຸ່ມຜັກອີ່ຕູ່ ແລະ ກຸ່ມ ນາວາງໃຫຍ່ ມາຮອດປັດຈຸບັນໄດ້ເລີ່ມເກັບກ່ຽວ ຄາດວ່າຈະໃຫ້ສຳເລັດໃນລະຫວ່າງກາງຫາທ້າຍເດືອນເມສາ 2019 ນີ້. ພາຍຫຼັງສໍາເລັດການ ເກັບກ່ຽວເຂົ້ານາແຊງແລ້ວ ແມ່ນຈະໄດ້ສືບຕໍ່ຊຸກຍູ້ການຜະລິດລະດູຝົນ ຊຶ່ງປີນີ້ມີແຜນ ສູ້ຊົນທຳການຜະລິດໃນເນື້ອທີ່ 15.670 ເຮັກຕາ, ເນື້ອທີ່ປູກພືດ 690 ເຮັກຕາ. (ຂ່າວ: ກອງຄຳ)