ໂຄງການບ້ານຕົວແບບເລືອກເອົາ 30 ບ້ານ ຈັດຕັ້ງປະຕິບັດ ໄລຍະທີ 1


...

11.04.2019 9:22     

   ໂຄງການບ້ານຕົວແບບ ຕິດພັນກັບການແກ້ໄຂຄວາມ ທຸກຍາກຂອງປະຊາຊົນ ຊຶ່ງເປັນການຊ່ວຍເຫຼືອຈາກລັດຖະບານ ສປ ຈີນ ໄດ້ຕົກລົງຄັດເລືອກເອົາ 30 ບ້ານຂອງແຂວງຫຼວງພະບາງ ແລະ ແຂວງວຽງຈັນ ໃນການຈັດຕັ້ງປະຕິບັດ ໄລຍະທີ 1 ປະກອບມີ ໂຄງການສະໜອງໄຟຟ້າຊົນນະບົດ 16 ບ້ານ, ສຸກ ສາລາ 7 ແຫ່ງ, ສະໜອງນ້ຳສະອາດ17 ບ້ານ ແລະ ໂຄງການໂທລະ ພາບດີຈີຕອນ 30 ບ້ານ. ພິທີລົງນາມບົດບັນທຶກໂຄງການດັ່ງກ່າວ ໄດ້ມີຂຶ້ນໃນວັນທີ 9 ເມສາ ຜ່ານມາ ທີ່ກະ ຊວງອຸດສາຫະກຳ ແລະ ການຄ້າ ລະຫວ່າງ ທ່ານ ໄຊຊະນະ ສິດທິພອນ ຫົວໜ້າຫ້ອງການຄະນະກຳມະການຮ່ວມມືລາວ-ຈີນ ແລະ ທ່ານ ຫວາງ ສີຮຸ່ຍ ທີ່ປຶກສາດ້ານເສດຖະກິດ-ການຄ້າ ສະຖານເອກອັກຄະລັດຖະທູດ ສປ ຈີນ ປະຈຳ ສປປ ລາວ ໂດຍມີທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານນຳ. ເພື່ອຜັນຂະຫຍາຍການຢ້ຽມຢາມລັດຖະກິດ ສປປ ລາວ ຂອງ ທ່ານ ສີຈິ້ນຜິງ ເລຂາ ທິການໃຫຍ່, ປະທານປະເທດ ແຫ່ງ ສປ ຈີນ ໃນວັນທີ 13 ພະຈິກ 2017, ທີ່ໄດ້ປະກາດໃຫ້ການຊ່ວຍເຫຼືອແກ່ ສປປ ລາວ ໄລຍະເວລາ 3 ປີ (2018-2020) ໃນມູນຄ່າ 4 ຕື້ຢວນ (ສະກຸນເງິນຈີນ) ເພື່ອຈັດຕັ້ງປະຕິບັດ 8 ໂຄງການໃຫຍ່ ຕິດພັນກັບການປັບປຸງຊີວິດການເປັນຢູ່ ແລະ ແກ້ໄຂຄວາມທຸກຍາກຂອງປະຊາຊົນຢູ່ເຂດຊົນນະບົດຂອງລາວ, ພາຍຫຼັງທີ່ລັດຖະບານຈີນໄດ້ແຕ່ງຕັ້ງຄະນະຊ່ຽວຊານເດີນທາງມາສຳຫຼວດຄວາມເປັນໄປໄດ້ຂອງໂຄງການ 4x100 ຄື: ໂຄງການກໍ່ສ້າງສຸກສາລາ 100 ແຫ່ງ, ໂຄງການສະໜອງນ້ຳສະອາດ 100 ແຫ່ງ, ໂຄງການສະໜອງໄຟຟ້າຊົນນະບົດ 100 ແຫ່ງ ແລະ ໂຄງການໂທລະພາບດີຈີຕອນ 100 ບ້ານ ຮ່ວມກັບຂະແໜງການກ່ຽວຂ້ອງຂອງຝ່າຍລາວ ແຕ່ວັນທີ 26 ພະຈິກ ຫາ 28 ທັນວາ 2018 ສອງຝ່າຍ ເຫັນດີເລືອກເອົາສອງແຂວງຄື: ແຂວງຫຼວງພະບາງ ແລະ ແຂວງວຽງຈັນ ເປັນໂຄງການທົດລອງໄລຍະທີ 1. (ຂ່າວ-ພາບ: ພູວຽງຄຳ)