ຄິວລົດສາຍເໜືອ ກຽມເພີ່ມລົດຮອງຮັບ ຜູ້ໂດຍສານ


...

11.04.2019 9:23     

   ສະຖານີຂົນສົ່ງໂດຍສານທາງໄກສາຍເໜືອ ແລະ ສາຍຕ່າງປະເທດຢືນຢັນບໍ່ຂຶ້ນຄ່າໂດຍສານ ໃນໄລຍະປີໃໝ່ລາວນີ້, ພ້ອມທັງເພີ່ມລົດໂດຍສານຂຶ້ນຕື່ມອີກ ເພື່ອຂົນສົ່ງຜູ້ໂດຍ ສານບໍ່ໃຫ້ຕົກຄ້າງ. ທ່ານ ນາງ ຈິດປະສົງ ຫຼວງເດດມີໄຊ ປະທານສະຖານີຂົນ ສົ່ງໂດຍສານທາງໄກສາຍເໜືອ ແລະ ສາຍຕ່າງປະເທດໄດ້ໃຫ້ສຳພາດຕໍ່ສື່ມວນຊົນໃນວັນ ທີ 9 ເມສາ ຜ່ານມາ ໃຫ້ຮູ້ວ່າ: ສະຖານີຂົນສົ່ງໂດຍສານທາງ ໄກສາຍເໜືອ ແລະ ສາຍຕ່າງ ປະເທດຂອງພວກເຮົາຈະບໍ່ຂຶ້ນຄ່າໂດຍສານໃນໄລຍະປີໃໝ່ລາວ 2019 ນີ້, ພ້ອມທັງເພີ່ມລົດ ໂດຍສານຂຶ້ນຕື່ມອີກ ເພື່ອຕອບ ສະໜອງຄວາມຮຽກຮ້ອງຕ້ອງ ການຂອງຈຳນວນຜູ້ໂດຍສາຍທີ່ເພີ່ມສູງຂຶ້ນໃຫ້ພຽງພໍ ແລະ ອຳນວຍຄວາມສະດວກໃນ ການ ເດີນທາງບໍ່ໃຫ້ຕົກຄ້າງ. ທ່ານ ກ່າວອີກວ່າ: ເພື່ອ ຮອງຮັບຜູ້ໂດຍສານທີ່ມີຈຸດປະ ສົງເດີນທາງກັບພູມລຳເນົາ ເພື່ອ ໄປຫົດສົງ, ສົມມາພໍ່ແມ່, ຢ້ຽມ ຢາມພີ່ນ້ອງ ແລະ ເດີນທາງເພື່ອທ່ອງທ່ຽວທີ່ມີຈຳນວນເພີ່ມຂຶ້ນໃນທຸກໆປີ, ທາງສະ ຖານີຂົນສົ່ງໂດຍສານທາງໄກສາຍເໜືອ ແລະ ສາຍຕ່າງປະ ເທດໄດ້ກຽມເພີ່ມຖ້ຽວລົດ ພ້ອມຮັບປະກັນຄວາມປອດໄພ, ສະພາບເຕັກນິກລົດຕ້ອງຢູ່ໃນສະພາບປົກກະຕິທຸກຢ່າງ (ພ້ອມໃນການເດີນທາງ) ທັງນີ້ກໍເພື່ອອຳນວຍຄວາມສະ ດວກແກ່ຜູ້ໂດຍສານໃຫ້ເຖິງຈຸດໝາຍຢ່າງປອດໄພ. ທ່ານ ກ່າວອີກວ່າ: ສະຖາ ນີຂອງພວກເຮົາໄດ້ເພີ້ມລົດໂດຍສານ 45 ບ່ອນນັ່ງ ແລະ ເພີ່ມຖ້ຽວເດີນທາງໄປ-ກັບເປັນໜຶ່ງເທົ່າຕົວ ໂດຍສະເພາະແຂວງຫຼວງພະບາງ ແລະ ຊຽງຂວາງ, ພ້ອມດຽວກັນກໍ່ໄດ້ເພີ່ມລົດຕູ້ອີກຈຳນວນໜຶ່ງໄວ້ສຳຮອງ ແລະ ບໍ່ກຳນົດເວລາອອກເດີນທາງ, ຫາກລົດຄັນໃດມີຜູ້ໂດຍສານເຕັມແມ່ນສາມາດອອກເດີນທາງໄດ້ເລີຍ. ສຳລັບຄ່າໂດຍສານແມ່ນລາຄາປົກກະຕິຄື: ນະຄອນ ຫຼວງ ວຽງຈັນ-ຫຼວງພະບາງ 110.000-150.000 ກີບ, ນະ ຄອນຫຼວງວຽງຈັນ-ຊຽງຂວາງ 110.000-150.000 ກີບ, ນະຄອນຫຼວງວຽງຈັນ-ຫົວພັນ 190.000-210.000 ກີບ, ນະຄອນຫຼວງວຽງຈັນ-ອຸດົມໄຊ 170.000-190.000 ກີບ, ນະຄອນຫຼວງວຽງຈັນ-ຫຼວງນໍ້າທາ 200.000 ກີບ, ນະຄອນຫຼວງວຽງຈັນ-ບໍ່ແກ້ວ 230.000-250.000 ກີບ ແລະ ນະຄອນຫຼວງວຽງຈັນ-ຜົ້ງສາລີ 230.000-270.000 ກີບ, ສຳລັບການເດີນທາງກັບບ້ານ ແລະ ເດີນທາງທ່ອງທ່ຽວແມ່ນເລີ້ມມີຜູ້ໂດຍສານອອກເດີນທາງຢ່າງຄຶກຄັກແຕ່ວັນທີ 1 ເມສາ ເປັນຕົ້ນມາ, ຄາດວ່າຈະສືບຕໍ່ເພີ່ມຂຶ້ນອີກຈົນເຖິງວັນທີ 13/04/2019. (ຂ່າວ : ສຸກສາຄອນ+ ພາບ : ສຸກສະຫວັນ)