ທູດລາວ ຍື່ນສານຕາຕັ້ງຕໍ່ປະທານາທິບໍດີ ອາເມຣິກາ


...

12.04.2019 10:58     

   ທ່ານ ຄຳພັນ ອັ່ນລາວັນ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສະຫະລັດ ອາເມຣິກາ ໄດ້ຍື່ນສານຕາຕັ້ງຕໍ່ທ່ານ ໂດນັນ ທຣໍາ ປະທານາທິບໍດີ ແຫ່ງ ສະຫະລັດ ອາເມຣິກາ ເພື່ອດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສະຫະລັດ ອາເມຣິກາ ໃນວັນທີ 8 ເມສາຜ່ານມານີ້ ທີ່ນະຄອນຫຼວງວໍຊິງຕັນ. ໃນໂອກາດດັ່ງກ່າວ ທ່ານ ທູດໄດ້ສະແດງຄວາມຂອບໃຈ ເປັນຢ່າງຍິ່ງ ທີ່ທ່ານປະທານາ ທິບໍດີ ໄດ້ໃຫ້ກຽດຕ້ອນຮັບການ ເຂົ້າຍື່ນສານຕາຕັ້ງໃນຄັ້ງນີ້ ຊຶ່ງຖືເປັນກຽດຢ່າງສູງ ທີ່ຕົນໄດ້ຖືກແຕ່ງຕັ້ງຈາກລັດຖະບານກໍຄືປະທານປະເທດ ແຫ່ງ ສປປ ລາວໃຫ້ດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ອາເມຣິິກາ. ໃນໂອກາດນີ້ ທ່ານທູດໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຈາກ ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ເຖິງ ທ່ານ ປະທານາທິບໍດີ ໂດນັນ ທຣໍາ ຈົ່ງມີພະລານາໄມສົມບູນ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ແລະ ໄດ້ຮັບຜົນສໍາເລັດໃນພາລະໜ້າທີ່ອັນມີກຽດຂອງທ່ານ. ພ້ອມດຽວກັນ, ທ່ານທູດ ຄຳພັນ ອັ່ນລາວັນ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນ ສ.ອາເມຣິກາ ທີ່ໄດ້ໃຫ້ການຊ່ວຍເຫຼືອ ສປປ ລາວ ໃນໄລຍະຜ່ານມາ ອັນໄດ້ປະກອບສ່ວນສຳຄັນເຂົ້າໃນການພັດທະນາ ແລະ ສ້າງສາປະເທດ ແລະ ຫວັງວ່າຈະໄດ້ຮັບການຊ່ວຍ ເຫຼືອໃນຊຸມປີຕໍ່ໜ້າ ໃນຖານະເປັນຄູ່ຮ່ວມຍຸດທະສາດແບບກວມລວມ ນັບແຕ່ປີ 2016 ເປັນຕົ້ນມາ. ນອກຈາກນີ້, ຍັງໄດ້ລາຍງານຫຍໍ້ການພົວພັນຮ່ວມມືສອງຝ່າຍ ກໍຄືໃນຂອບຫຼາຍຝ່າຍລວມທັງຂອບການຮ່ວມມືອື່ນໆ, ພ້ອມທັງຈະຕັ້ງໜ້າປະຕິບັດໜ້າທີ່ເພື່ອຊຸກຍູ້ສົ່ງເສີມການຮ່ວມມືສອງຝ່າຍລະຫວ່າງ ສປປ ລາວ-ສະຫະລັດອາເມຣິກາ ໃຫ້ຂະຫຍາຍຕົວຍິ່ງຂຶ້ນ. ຊຶ່ງທ່ານປະທານາທິບໍດີ ກໍໄດ້ສະແດງຄວາມຂອບໃຈ ແລະ ຝາກຄວາມນັບຖືຮັກແພງ ມາຍັງທ່ານປະທານປະເທດ ແລະ ການນຳຂອງ ສປປ ລາວ ເຊັ່ນດຽວກັນ. ໃນໂອກາດນີ້ ທ່ານປະ ທານາທິບໍດີ ໄດ້ສະແດງຄວາມຍິນດີ ແລະ ຊົມເຊີຍ ຕໍ່ທ່ານທູດລາວຄົນໃໝ່ ທີ່ໄດ້ຖືກແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສະຫະລັດ ອາເມຣິກາ ເພື່ອປະຕິບັດໜ້າທີ່ອັນມີກຽດ, ພ້ອມທັງອວຍພອນໃຫ້ທ່ານເອກອັກຄະລັດຖະທູດ ຈົ່ງປະສົບຜົນສຳເລັດໃນການເຄື່ອນໄຫວວຽກງານການທູດຂອງຕົນ ແລະ ຊຸກຍູ້ເສີມຂະຫຍາຍສາຍພົວພັນຮ່ວມມືລະຫວ່າງສອງປະເທດໃຫ້ແໜ້ນແຟ້ນຍິ່ງຂຶ້ນ. ທ່ານເອກອັກຄະລັດຖະ ທູດ ກໍໄດ້ສະແດງຄວາມຂອບ ໃຈ ແລະ ອວຍພອນໃຫ້ ທ່ານປະທານາທິບໍດີ ມີພະລານາໄມເຂັ້ມແຂງ, ປະສົບຜົນສຳເລັດໃນໜ້າທີ່ວຽກງານ. ສປປ ລາວ ແລະ ສ. ອາເມ ຣິກາ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 10 ສິງຫາ 1955 ຊຶ່ງສາຍພົວພັນດັ່ງກ່າວໄດ້ຂະຫຍາຍຕົວຂຶ້ນເລື້ອຍໆ ລະຫວ່າງ ລັດຖະບານ ແລະ ປະຊາຊົນສອງຊາດ ສປປ ລາວ-ສ. ອາເມຣິກາ ໂດຍມີການແລກປ່ຽນການຢ້ຽມຢາມຄະນະຜູ້ແທນຂັ້ນຕ່າງໆ ຂອງສອງປະເທດ, ການຮ່ວມມືກວມເອົາດ້ານເສດຖະກິດ, ການຄ້າ, ການສຶກສາ, ວັດທະນະທຳ-ສັງຄົມ ແລະ ອື່ນໆ. (ຂ່າວ-ພາບ: ກະຊວງການຕ່າງປະເທດ)