ໜຶ່ງແລວໜຶ່ງເສັ້ນທາງ ຈະປະກອບສ່ວນແກ້ໄຂຄວາມທຸກຍາກ ໃຫ້ແກ່ ສປປ ລາວ


...

26.04.2019 9:45     

   ໂດຍ: ອະນຸພອນ ນັກຂ່າວສະຖານີວິທະຍຸໂທລະພາບສູນກາງຈີນ

ໃນຊຸມປີມໍ່ໆມານີ້, ພັກ- ລັດຖະບານລາວ ໄດ້ກຳນົດ ແລະ ສົ່ງເສີມແຜນຍຸດທະສາດຫັນຈາກປະເທດທີ່ບໍ່ມີທາງອອກສູ່ທະເລໄປສູ່ປະເທດເຊື່ອມຕໍ່ໃນອະນຸພາກພື້ນ. ແຜນຍຸດທະສາດນີ້, ໄດ້ເຊື່ອມຕໍ່ກັບຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ທີ່ສະເໜີໂດຍທ່ານ ສີຈິ້ນຜິງ ປະທານປະເທດຈີນ. ຄຽງຄູ່ກັບໂຄງການຕ່າງໆທີ່ນອນຢູ່ໃນຂອບ "ໜຶ່ງແລວ ໜຶ່ງເສັ້ນທາງ" ເຊັ່ນ: ໂຄງການທາງລົດໄຟ ລາວ-ຈີນ, ເຂື່ອນໄຟຟ້ານຳ້ອູ ແລະ ອື່ນໆ ໄດ້ຮັບການຈັດຕັ້ງປະຕິບັດ ແລະ ກ້າວໄປໜ້າຢ່າງແທ້ຈິງ. ບໍ່ພຽງແຕ່ໄດ້ກະຕຸກຊຸກຍູ້ການເປີດກວ້າງຕະຫຼາດວັດສະດຸກໍ່ສ້າງ, ອາຫານ ແລະ ສິນຄ້າອື່ນໆພາຍໃນປະເທດລາວເທົ່ານັ້ນ, ແຕ່ຫາກຍັງໄດ້ສ້າງໂອກາດວຽກເຮັດງານທຳຢ່າງຫຼວງຫຼາຍໃຫ້ແກ່ຄົນລາວ. ຫຼັງຈາກໄປທັດສະນະສຶກສາຕົວຈິງ, ຜູ້ຂຽນໄດ້ເຫັນວ່າ: ວຽກງານຍົກຍ້າຍປະຊາຊົນໃນໂຄງການຕ່າງໆທີ່ກ່າວມານັ້ນ ຈະເປັນປະໂຫຍດໃຫ້ແກ່ວຽກງານຫຼຸດຜ່ອນຄວາມທຸກຍາກເຂົາເຈົ້າ. ຫວ່າງກ່ອນນີ້, ຜູ້ຂຽນໄດ້ໄປເກັບກຳຂ່າວຢູ່ເຂື່ອນໄຟຟ້ານ້ຳອູ ຊຶ່ງເປັນໂຄງການກໍ່ສ້າງຂະໜາດໃຫຍ່ທີ່ຕ້ອງຍົກຍ້າຍປະຊາຊົນ 2.300 ກວ່າຄອບຄົວ, ລວມມີ 12.600 ກວ່າຄົນ ໃນ 10 ເມືອງຂອງ 2 ແຂວງຄື: ແຂວງຜົ້ງສາລີ ແລະ ແຂວງຫຼວງພະບາງ. ທາງໂຄງການໄດ້ວາງແຜນສ້າງໃໝ່ 23 ບ້ານ ໃຫ້ແກ່ປະຊາຊົນຜູ້ໄດ້ຮັບຜົນກະທົບ. ໃນການເດີນທາງໄປບ້ານຫ້ວຍລໍແຫ່ງໃໝ່, ຜູ້ຂຽນໄດ້ເຫັນວ່າ: ປະຊາຊົນຜູ້ຍົກຍ້າຍເຂົ້າໄປຢູ່ເຮືອນຫຼັງໃໝ່ທີ່ມີມາດຕະຖານສູງກ່ວາເຮືອນຫຼັງເກົ່າ. ພ້ອມທັງມີເສັ້ນທາງທີ່ສະດວກສະບາຍ, ແຕ່ລະຄົວເຮືອນໄດ້ໃຊ້ນ້ຳປະປາ ແລະ ໄຟຟ້າຢ່າງສະດວກສະບາຍ, ຊຶ່ງສາມາດຕອບສະໜອງກັບຄວາມຕ້ອງການໃນການດຳລົງຊີວິດຂັ້ນພື້ນຖານ. ນອກຈາກສ້າງເຮືອນຫຼັງໃໝ່ແລ້ວ, ຜູ້ດຳເນີນໂຄງການຝ່າຍຈີນ ຍັງໄດ້ໃຊ້ຫຼາຍມາດຕະການທີ່ເອື້ອອຳນວຍ, ຕົວຢ່າງ; ເຊື້ອເຊີນຊ່ຽວຊານວິຊາການໄປແນະນຳເຕັກນິກການລ້ຽງໝູ, ລ້ຽງແບ້, ລ້ຽງປາ, ປູກຜັກປອດສານພິດໃຫ້ແກ່ພີ່ນ້ອງປະຊາຊົນ, ທັງໃຫ້ທຶນສະໜັບສະໜູນ ຫຼື ຊື້ເບ້ຍໄມ້, ແນວພັນປາ ໃຫ້ແກ່ປະຊາຊົນ, ເຮັດໃຫ້ຜົນຜະລິດອອກມາສາມາດເອົາໄປປ້ອນຕະຫຼາດພາຍໃນ, ປະຊາຊົນຈະມີລາຍຮັບເພີ່ມຂຶ້ນ, ສາມາດທຳມາຫາກິນໂດຍເພິ່ງຕົນເອງໄດ້ ແລະ ພາໃຫ້ເກີດມີຂະແໜງເສດຖະກິດທີ່ເຂັ້ມແຂງຂຶ້ນເທື່ອລະກ້າວ. ອີກຢ່າງໜຶ່ງ, ທາງໂຄງ ການໄດ້ໃຊ້ນະໂຍບາຍທີ່ນຳໃຊ້ແຮງງານກັບທີ່, ໂດຍຈັດຊຸດອົບຮົມສີມືແຮງງານ ແລະ ເສີມສ້າງຂີດຄວາມສາມາດດ້ານການບໍລິຫານ. ໂຄງການເຂື່ອນໄຟຟ້ານ້ຳອູ ໄດ້ສ້າງໂອກາດວຽກເຮັດງານທຳ 8.000 ກວ່າຕຳແໜ່ງໃຫ້ແກ່ປະຊາຊົນທ້ອງຖິ່ນ. ເຈົ້າໜ້າທີ່ໂຄງການໃຫ້ຮູ້ຕື່ມວ່າ: ໃນອະນາຄົດ, ຈະບັນລຸເປົ້າໝາຍທີ່ໃຊ້ແຮງງານຄົນລາວຮ້ອຍສ່ວນຮ້ອຍ, ໝາຍຄວາມວ່າ; ຈະໃຫ້ປະຊາຊົນລາວເອງເປັນຜູ້ຄຸ້ມຄອງບໍລິຫານ ແລະ ຜູ້ບຳລຸງຮັກສາໂຄງການທັງໝົດ. ສະຫຼຸບແລ້ວ, ໂດຍຜ່ານມາດຕະການຕ່າງໆໃນການສ້າງບ້ານແຫ່ງໃໝ່ໃຫ້ແກ່ປະຊາຊົນຜູ້ຍົກຍ້າຍ, ບໍ່ພຽງແຕ່ເຮັດໃຫ້ເຂົ້າເຈົ້າມີຊີວິດການເປັນຢູ່ນັບມື້ນັບດີຂຶ້ນເທົ່ານັ້ນ, ແຕ່ທີ່ສຳຄັນຈະເຮັດໃຫ້ພີ່ນ້ອງປະຊາຊົນລາວ ໄດ້ຫັນປ່ຽນແນວຄິດ ແລະ ເບິ່ງກວ້າງມອງໄກ, ມີຄວາມຮູ້ຄວາມສາມາດ ແລະ ສີມືສູງ ທັງມີສະຕິທີ່ເປັນເຈົ້າການດຳເນີນການຜະລິດເປັນສິນຄ້າ ເພື່ອສ້າງລາຍຮັບໃຫ້ແກ່ຄອບຄົວ ແລະ ບັນລຸການພັດທະນາແບບຍືນຍົງ. ນັບແຕ່ພັກ ແລະ ລັດຖະ ບານ ສປປ ລາວ ກຳນົດເປົ້າ ໝາຍຫຼຸດພົ້ນອອກຈາກຄວາມ ທຸກຍາກ ເມື່ອປີ 2001 ເປັນ ຕົ້ນມາ, ວຽກງານຫຼຸດຜ່ອນຄວາມທຸກຍາກ ໄດ້ຮັບຄວາມຄືບໜ້າຢ່າງຫຼວງຫຼາຍ, ທ້າຍປີ 2018, ຈຳນວນຄອບຄົວທຸກຍາກຫຼຸດລົງຍັງເຫຼືອພຽງ 6 ໝື່ນກວ່າຄອບຄົວ, ກວມ 5,34% ຂອງຍອດຈຳນວນຄອບຄົວໃນທົ່ວປະເທດ. ຈາກນີ້ເຫັນໄດ້ວ່າ, ວຽກງານຫຼຸດຜ່ອນຄວາມທຸກຍາກ ຍັງປະເຊີນກັບວຽກງານໜັກສົມຄວນ. ສະນັ້ນ, ເນື່ອງຈາກວ່າວຽກງານຍົກຍ້າຍປະຊາຊົນຜູ້ຖືກຜົນກະທົບໃນໂຄງການ "ໜຶ່ງແລວໜຶ່ງເສັ້ນທາງ" ນັ້ນໄດ້ມີປະສິດທິຜົນທີ່ດີໃນການຊຸກຍູ້ວຽກງານຫຼຸດຜ່ອນຄວາມທຸກຍາກ ແລະ ພັດທະນາແບບຍືນຍົງ. ການມີສ່ວນຮ່ວມຢ່າງຕັ້ງໜ້າເຂົ້າໃນໂຄງການຮ່ວມມື ໃນການຈັດຕັ້ງປະຕິບັດແຜນຍຸດທະສາດທີ່ຫັນເປັນປະເທດເຊື່ອມຈອດໃນອະນຸພາກພື້ນ, ອາດຈະເປັນໂອກາດດີທີ່ຈະເຮັດໃຫ້ວຽກງານຫຼຸດຜ່ອນຄວາມທຸກຍາກຂອງລາວໄດ້ຮັບຄວາມຄືບໜ້າໃໝ່.