ສາລະວັນ ປະກາດຈົບຊັ້ນມັດທະຍົມຕອນຕົ້ນ ບຳລຸງ


...

02.05.2019 9:26     

   ແຂວງສາລະວັນ ໄດ້ຈັດພິທີປະກາດເປັນແຂວງຈົບການສຶກສາຊັ້ນມັດທະຍົມຕອນຕົ້ນບໍາລຸງສຳລັບປະຊາຊົນ ຢ່າງເປັນທາງການ ແລະ ເປັນແຂວງທີ 7 ຂອງທົ່ວປະເທດ ຂຶ້ນໃນທ້າຍເດືອນ ເມສາຜ່ານມາ ທີ່ສະໂມສອນຂອງແຂວງ ໂດຍໃຫ້ກຽດເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ກຳມະການສູນກາງພັກ ລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ສີສຸວັນ ວົງຈອມສີ ກຳມະການສູນກາງພັກ ເລຂາພັກແຂວງ ເຈົ້າແຂວງ ສາລະວັນ, ບັນດາຄະນະປະຈຳພັກແຂວງ, ຮອງເຈົ້າແຂວງສະຫວັນນະເຂດ, ຈຳປາສັກ, ເຊກອງ, ອັດຕະປື, ອະດີດການນຳ ແລະ ຕາງໜ້າຂະແໜງການກ່ຽວຂ້ອງຈາກສູນກາງ, ແຂວງ, ເມືອງເຂົ້າຮ່ວມ.
ທ່ານ ສຸນີ ນາມມະບົວລີ ຮອງຫົວໜ້າພະແນກສຶກສາທິການ ແລະ ກິລາແຂວງ ໄດ້ກ່າວລາຍງານກ່ຽວກັບຜົນສຳເລັດການບຳລຸງຍົກລະດັບການສຶກສາຈົບຊັ້ນມັດທະຍົມຕອນຕົ້ນບຳລຸງ, ຊຶ່ງໄດ້ປະຕິບັດການຮຽນການສອນລຶບລ້າງຄວາມບໍ່ຮູ້ໜັງສື ແລະ ບໍາລຸງວັດທະນະທໍາຢ່າງເປັນລະບົບຕໍ່ເນື່ອງ. ນັບແຕ່ປີ 2015-2018 ສາມາດປະກາດເມືອງຈົບຊັ້ນມັດທະຍົມຕອນຕົ້ນບຳລຸງ ໄດ້ 8 ເມືອງທົ່ວແຂວງ, ມີຜູ້ຮຽນຈົບມັດທະຍົມຕອນຕົ້ນທັງໝົດ 13.614 ຄົນ, ຍິງ 6.098 ຄົນ, ສຳລັບທິດທາງແຜນພັດທະນາ ຮອດປີ 2020 ແມ່ນການສຶກສາຈະຕ້ອງດຳເນີນໄປຢ່າງເປັນລະ ບົບຕໍ່່ເນື່ອງໃນທຸກຊັ້ນທຸກສາຍ, ສູ້ຊົນຜັນຂະຫຍາຍເນື້ອໃນຄາດໜາຍ 4 ບຸກທະລຸຂອງຂະແໜງການສຶກສາ-ກິລາ, ສືບຕໍ່ປັບປຸງບັນຫາຂາດເຂີນຄູເຫຼືອບໍ່ພໍ ໂດຍສະເພາະເຂດຫ່າງໄກສອກຫຼີກ, ເພີ່ມທະວີການລົງທຶນຂອງລັດເຂົ້າໃສ່ວຽກງານການສຶກສາ, ພ້ອມທັງປຸກລະດົມການສຶກສາເປັນຂອງທົ່ວສັງຄົມ ແນ່ໃສ່ປັບປຸງໃຫ້ມີຄຸນນະພາບ ແລະ ມີບາດກ້າວດີຂຶ້ນເປັນລຳດັບ.
ຈາກນັ້ນ, ໃນພິທີໄດ້ມອບໃບຍັ້ງຢືນການຈົບຊັ້ນມັດທະຍົມຕອນຕົ້ນບໍາລຸງໃຫ້ແຂວງສາລະວັນ ຢ່າງເປັນທາງການ ພ້ອມທັງມອບໃບຍ້ອງຍໍໃຫ້ກົມກອງບຸກຄົນທີ່ມີຜົນງານໃນການເຄື່ອນໄຫວການຮຽນການສອນ ຕອນທ້າຍຂອງພິທີໄດ້ມີການຕັດແຖບຜ້າ ແລະ ລັ່ນຄອງ ເພື່ອເປັນສັກຂີພິຍານໃນການປະກາດເປັນແຂວງຈົບມັດທະຍົມຕອນຕົ້ນບໍາລຸງຢ່າງເປັນທາງການ.
(ພາບ-ຂ່າວ: ກິນດາວັນ)