ອາດສະພອນ ມີຜູ້ຕິດເຊື້ອພະຍາດໄຂ້ຍຸງລາຍ 84 ກໍລະນີ


...

08.05.2019 15:20     

   ເກີດການລະບາດຂອງພະຍາດໄຂ້ຍຸງລາຍທີ່ເມືອງອາດສະພອນ ແຂວງສະຫວັນນະເຂດ ຊຶ່ງເລີ່ມພົບຜູ້ຕິດເຊື້ອພະຍາດໄຂ້ຍຸງລາຍ ນັບແຕ່ເດືອນມັງກອນເປັນຕົ້ນມາ ໂດຍມີການລະບາດໜັກແມ່ນໃນໄລຍະເດືອນເມສາຜ່ານມາ, ປັດຈຸບັນມີຜູ້ຕິດເຊື້ອພະຍາດດັ່ງກ່າວໃນທົ່ວເມືອງແລ້ວ 84 ກໍລະນີ ໃນນີ້ ມີຜູ້ເສຍຊີວິດ 3 ກໍລະນີ. ສະນັ້ນ, ເພື່ອເປັນການສະກັດກັ້ນ ແລະ ໂຕ້ຕອບພະ ຍາດໄຂ້ຍຸງລາຍ ມາໃນວັນທີ 2 ພຶດສະພາຜ່ານມາ, ພາກສ່ວນຕ່າງໆ ຈຶ່ງໄດ້ມີການຈັດກອງປະຊຸມປຶກສາຫາລືຄົ້ນຄວ້າວາງແຜນໂຕ້ຕອບ ແລະ ຄວບຄຸມການລະບາດຂອງພະຍາດໄຂ້ຍຸງລາຍ ຂຶ້ນທີ່ສະໂມສອນເມືອງ ໂດຍການເຂົ້າຮ່ວມເປັນປະທານຂອງທ່ານ ແສງທອງ ວັງແກ້ວມະນີ ເຈົ້າເມືອງອາດສະພອນ, ມີທ່ານ ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງ, ມີຫົວໜ້າ-ຮອງຫົວໜ້າຫ້ອງການ, ອຳນາດການປົກຄອງບ້ານເຂົ້າຮ່ວມ. ທ່ານ ບຸນປອນ ໃສຈັນດີ ຫົວໜ້າຫ້ອງການສາທາລະນະສຸກເມືອງ ໄດ້ລາຍງານສະພາບການລະບາດຂອງພະຍາດໄຂ້ຍຸງລາຍ ຢູ່ເມືອງອາດສະພອນ ໃຫ້ຮູ້ວ່າ: ພະຍາດໄຂ້ຍຸງລາຍໄດ້ມີການລະບາດໃນ 5 ບ້ານຄື: ບ້ານໜອງບົວ, ບ້ານດົງທະດາ, ບ້ານທາດດອກແກ້ວ, ບ້ານນາທົ່ມ ແລະ ບ້ານນາເດືື່ອ, ປັດຈຸບັນມີຜູ້ຕິດເຊື້ອພະຍາດໄຂ້ຍຸງລາຍທັງໝົດ 84 ກໍລະນີ, ເສຍຊີວິດຈາກພະຍາດດັ່ງກ່າວ 3 ກໍລະນີ ດັ່ງນັ້ນ, ວິຊາການຄວບຄຸມການລະບາດຂອງພະຍາດໄຂ້ຍຸງລາຍ ຈຶ່ງໄດ້ລົງຕິດຕາມ ແລະ ທຳລາຍແຫຼ່ງເພາະພັນຂອງຍຸງຢູ່ໃນ 5 ບ້ານດັ່ງກ່າວ ທີ່ມີການລະບາດ ຄຽງຄູ່ກັນນີ້, ກໍ່ໄດ້ມີການໂຄສະນາສຸຂະສຶກສາ ໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈ ພ້ອມທັງມີການພົ່ນຢາ, ແຈກຢາຍຊາຍຂ້າໜອນນ້ຳ ແລະ ທຳລາຍແຫຼ່ງເພາະພັນຂອງຍຸງ ໂດຍສະເພາະ ບ່ອນທີ່ມີນ້ຳຂັງເຊັ່ນ: ຢາງຕີນລົດເກົ່າ, ກະໂປະ-ກະປ໋ອງ, ເຕົ້າດອກໄມ້ ແລະ ອື່ນໆ. ໂອກາດນີ້, ທ່ານ ບົງສຸວັນ ພັນທະວົງສາ ໄດ້ມີຄຳເຫັນວ່າ: ໃຫ້ເອົາໃຈໃສ່ເປັນພິເສດຕໍ່ກັບພໍ່ແມ່ປະຊາຊົນ ຜູ້ທີ່ມີຄວາມສ່ຽງຕິດພະຍາດໄຂ້ຍຸງລາຍ, ແນະນຳໃຫ້ວິຊາການແພດ-ໝໍ ລົງໂຄສະນາແນະນຳໃຫ້ພໍ່ແມ່ປະຊາຊົນໄດ້ຮັຍຮູ້ຕໍ່ກັບຜົນຮ້າຍຂອງພະຍາດໄຂ້ຍຸງລາຍເປັນໄລຍະ. ພ້ອມນັ້ນ, ກໍໄດ້ຮຽກຮ້ອງໃຫ້ພໍ່ແມ່ປະຊາຊົນຊາວເມືອງອາດສະພອນ ຈົ່ງຊ່ວຍກັນປ້ອງກັນການລະບາດຂອງພະຍາດດັ່ງກ່າວຢ່າງຈິງຈັງ ໂດຍເນັ້ນປະຕິບັດຫຼັກການ 5 ປ. ຂອງກະຊວງສາທາລະນະສຸກວາງອອກ, ນອນໃນມຸງຍ້ອມຢາ ແລະ ເມື່ອເປັນໄຂ້ບໍ່ໃຫ້ຊື້ຢາກິນເອງ ຄວນໄປພົບແພດ-ໝໍ ຕາມໂຮງໝໍ ຫຼື ສຸກສາລາໃກ້ບ້ານຂອງທ່ານ ນອກຈາກນີ້, ທ່ານຍັງໄດ້ນຳມຸ້ງຈຳນວນ 18.550 ຜືນ, ຢາພົ່ນຂ້າຍຸງ ແລະ ຢາຂ້າໜອນນ້ຳຈຳນວນໜຶ່ງ ເພື່ອນຳໄປແຈກຢາຍໃຫ້ພໍ່ແມ່ປະຊາຊົນ. (ຂ່າວ: ເມືອງອາດສະພອນ)